¹ Olá ma kuê ê pasa, ê ta uã fesa Zurê, ma Jizu banda ba Jiruzalê. ² Só Jiruzalê ta ku uã tanki, petu pôtô ombô, má lunguá arameu ka samé Betesda, y ê tê tá non mondja ku ka letxa kubiru dadu vota. ³ Yô nkenu ku duetxi, segu, mankêlê ku lezaru, ta kustumá ru ka tá ingé ê ni pôtó wuará auá ndjinga. ⁴ Punda anzu zunta ka desê ka ndjinga auá uã uã vê sô punda kuakuali nkenu ku letxa ola auá ka ndjinga ê ka yogô di kuakuali duetxi ⁵ Ê tá uã omé ku ta ka duetxi yô ta ku, makéri ná ké anu, sô ê tá nhã. ⁶ Yé bé dumiru sô ê ta má ê tá nhã naria, Jizu puté: Bô mêsê yogó? ⁷ Omé si ku ta ka duetxi Kundji: Sun, ná tê nê uã nkênu di pêu tanki olá auá ka ndjinga whá. Olá ngá bé, ôtô nkênu ka bá wê hun. ⁸ Jizu fará: Lata, tuá maka ô ndá. ⁹ Txó só omé é yogó; ê tuá maka rê, ê ndá, diê ta sábaru. ¹⁰ Só ané zurê fá omé si ku yogó. Ê sá sábaru, na ka ku sintxi ô kega maka wa. ¹¹ Só omé ê kundji: nkênu si ku kula hun fá; tua maka ô, ndá. ¹² Só ané puté: Ngué sá omé fá ô: Tua maka ô ndá? ¹³ Sô omé si ku yogó na tá ta nkênu si ku kulé wa, punda Jizu ta siê konderu punda yô ngué ta nhã. ¹⁴ Y masi ngó si Jizu bé omé ê ni ngueza sô faré: Bô tua suriá! Ná tô zi mali wa pa kua pióló na bi rá ku bô wa. ¹⁵ Sô omé é siê ba wanga kué ra ané zurê ma Jizu só zié netá. ¹⁶ Só ané sefi zuré komesa ka tua konta Jizu, Punda ê tá ka zi ané kua ê ni sábaru. ¹⁷ Só Jizu fará ané: Tata hun ka taba atê ayê an turu ka taba: ¹⁸ Punda kua ê ané zuré ta ka ngóló maté masi, na punda Ê kébia sábaru, wa, mazi, punda Ê sama Desu plopi Tata rê to zi mora Desu. ¹⁹ Jizu kundji ané: Ndá fará sê veré ma mosu na ka pô zi kua rê só wa, mazi kua ma ê ka bê Tata rê ka zi; Punda kua ma Tata ka zi, só na ka zi. ²⁰ Punda Tata ka ngôgô ku nã yê ka musé turu kua má Êlê mé ka zi, Yé ka musa kua mazi rokê Yé ma sê ka babaka. ²¹ Punda mora ma Tata ka kora motxi só ré vira, nã turu ka ra nkênu ma Ê mesê. ²² Punda Tata na ku zi zugamentú né wa nkênu wa, mazi Ê ka ku sitxi Mosu rê zi zugamentu. ²³ Pá turu nkênu ka ngôgô ku Mosu mora ma a ka ngôgô ku Tata. Nkênu si ka na ngôgô Mosu wa na ka ngôgô ku Tata ku mandé wa. ²⁴ Kua ngá fara sê veré veré ma nkênu si ku ka ndê lumba hun ku ka kêlê ni Isi ku manda Hun ka tê vira atê atê i ana ka maté wa magi ê pasá di motxi ba virá. ²⁵ Kua ngá fa sê veré veré ma ê ka bia rá tempu yê vitxa za ma motxi ka bi ndê vesu na Desu, só nkênu ku ka ndê, ka veviá. ²⁶ Punda mora má, Tata tê vira né mé, mora é mé, Ê ka kusintxi nã sa ku virá né mé; ²⁷ Sô Tata da Nã pôré di zi zugamentu Ê sa Nã omé. ²⁸ Ná babaka ku kua é wa, punda ê seka ndu tempu ma nkênu si ku sá tumba ka bi ndê vosu Rê sô ané ka siê. ²⁹ Ku zi buaru ka korá rá virá ku zi mali ka kora da zugamentu. ³⁰ Na ka pôi zi né uã kua ku fosá Hun só wa. Mora ngá ndé ngá zi zugamentu Hun sá zustu pan dá na sê ngóló zi vonté Hun wa, mazi vonté nkênu si ku manda Hun. ³¹ Si Hun ka fá zi mora wa, ku vonté Hun tá ê ná sá veré wa. ³² Ê tê wa Ôtô ku ka fá di An sô nta ma Ê ka fá veré Hun. ³³ Sê manda nã lekaru ba lêlê Zon yê fá veré. ³⁴ Só kua ma ndé ná sá di omé wa. Ngá fá kua é fa sê sá savu . ³⁵ Zon tá wa lampará ku ra ka yerê sô ta ka luzi txó tempu sô sê ta ku ngôsô ku kandja rê. ³⁶ Ku turu ká má ntê sá masi ngai dôkê di Zon, punda suvisu, ma Tata dá Hun pa unzi sa suvisu ê mé ma nga zi, ané ka fá di hun ma Tata mandá hun. ³⁷ Plópi Tata ku manda hun, fá ni an. Nuka sê ndê vosu rê nê pa sê bê mora rê wa. ³⁸ Yê sê na sa ku lumbaré ni sê wa, punda sê na kêlê ni Nguê si ma Ê mandá wa. ³⁹ Zi zamé kua ku sa sisikaru punda si sê kêlê sê ka tê vira nê atê atê, só kua si ku sa sisikaru é ka fa di lixipêtu hun. ⁴⁰ Mazi sê na mesê bi lêlê hun pá sê ra tê vira wa. ⁴¹ Na ka tua gloia omé wa. ⁴² Mazi hun ta ma lêtu sê na tê amolê Desu wa. ⁴³ Hun bi ni nomi Tata Hun y ré na tua hun wa; Si kuakuali ôtô ka bi ni plópi nomi rê, sê ka tué. ⁴⁴ Ma sê ka pô kêlê sê kua ka tua ngloia di uã ku ôtlô, mazi sê na ka tua ngloia ku ka bi ni Desu wa? ⁴⁵ Sê na ka pensa mó nga biri sê ni wê Tata wa. Nkênu ku ka biri sê sa Muzé, ma sê seka wara. ⁴⁶ Si sê ka kêlê ni Muzé; sê ka kêlê ni An, punda ê fa ni lixipetu hun. ⁴⁷ Sô si sê na kêlê ni kua ma ê sisika wa ma sê ka kêlê ni lumba Hun?