¹ Olá ma Jizu bi tá má Farizeu ta ndê ma Ê ta ka butiza masi melu dokê Zon ² Jizu, pô na ta ka butiza wha mazi ané melú rê. ³ Ê fô Zurêé atô ba Galileia. ⁴ Ê tá pa Ê lá Samaia. ⁵ Sô ê bi whã, poson ma a ka sama Sikar, petu ane tia ma Jakó ta ra ná rê Zozé. ⁶ Nha ta ku kóbo aua Jakó. Jizu ta kansaru di nda, Ê tason kota kóbo aua é. Ê ta kuaji samanon hola. ⁷ Whã mengai Samaia bi jê aua, sô Jizu faré: Da Mu aua bebê, ⁸ Punda ané melu rê ta ba pason ba kopua mé. ⁹ Sô mengai Samaia-é Faré: Ma Bô Zurê ka pindji un ku sa mangai Samaria, kua bebê! Punda Zurê ku nguê samaia na ka da buaru wha. ¹⁰ Jizu kundji: Si bô ka ta porê Desu y nguêi ku fa ô: Damu aua pã bebê bô ka pindjê sô ê ka ra ô aua vivu. ¹¹ Sô mengai é kundji É: Sumun-ê Bô na tê baldi, sô kóbo aua sa fundu foga wha. Andji Bô ka txia aua vivu-é né! ¹² Antó Bô sa masi tamé tata nó Jakó, ka ra nó kóbo aua ma elê plopi bebê ku na rê ku kia son rê! ¹³ Jizu kundji: kuakuali nkenu ku bebê aua-é ê ka tô tê sêri, ¹⁴ Masi kuakuali nkenu ku bebê aua si ma Nga ré, nuka ê ka tô tê seri wha. Di ôtô mora, aua si aua si ma nga ré ka bila pê lêtu rê kolentxi aua ku ka kolê ba vira atê atê. ¹⁵ Sô mengai Faré: Sumbê, Dã aua-é ma na ka, tô tê sêri wha, ma na ka tô bi ynguê bi txié wha. ¹⁶ Jizu faré: Ba sama ome ô sô tô bi ynguê. ¹⁷ Mengai-é kundjê: Na tê ome wha. Sô Jizu kundji-é: bô fa buaru: Na tê ome wha. ¹⁸ Punda bô ta ku tanon, Ayé ma bô tê na sa diô wha! Yé bô fa veré. ¹⁹ Mengai-é Faré. Un sê ka pia ma Bô sa ná lekaru. ²⁰ Tata nón ta ka pê mpuna són baza ntê ni mundu-é, mazi sê ka fa ma Jiruzalé sô sa nga ma a tê pê mpuna son rá. ²¹ Jizu kundji. Mengai, kelê ni aun punda ê ndu tempu ma né mundu-é, né Jeruzalé, bô ka pê mpuna son ra Tata. ²² Sê ka pê mpuna son ra kua ma sê na ta wha, nón ka pê mpuna són ra kua ma non ta punda savason ka bi di Jurê. ²³ Ma ê seka, ndu ola sô ê ndu za, ma nkênu ku ka ngôgô, ka ngogô ku Tata ni supitu ni veré punda nkênu ku ka zi mora é sô tata seka ngoló. ²⁴ Punda Desu sa supitu sô nkenu ku ka ngogô kuê ka ngogô kuê ni supitu ni veré. ²⁵ Sô mengai Faré: nta ma Mése sêka bi, Nkênu ma ka sama Klistu, Olá Ê ka bi Ê ka musa nón turu kua. ²⁶ Jizu faré: Ãn só sê ka fá ku bô. ²⁷ Sô ola é me ané melu rê vitxa sô fika babakaru punda Ê ta ka fa ku whã mengai: mazi né whã ané na Puté, kuai bô sêka ngoló! Ô punda kuai Bô seka fa kuê ra! ²⁸ Sô mengai desa buli rê, tô ba posó, sô fa nguê: ²⁹ Bi pia ome ku tanga un turu kua ma un zi . Na yé mé ku sa klistu wha! ³⁰ Ané desa pason bé atê kotá rê. ³¹ Ra kua é-é ané melu Rê ta ka pindjê Mése mé. ³² Mazi Ê fara ané: Ntê whã me pa amé ma sê na té wha. ³³ Ane melu rê komesa ka puta otô. Ane melu rê komesa ka puta otô. Nkenu biku mé ré pa Ê mé. ³⁴ Jizu fara ané: Mé un sa pa a zi vonté Nkenu si ku manda Un loké suvisu Rê. ³⁵ Sê na ka fa: Ma ê fata kuana mbési pa a koiê mé a! nga fa sê wha kua: lata wê pia mevia, punda ê sa ola pa ã koiê! ³⁶ Ma nkenu si ku ka koiê ka tua pagamentu sô ê ka zunta mé ra vira atê atê, ra nkenu ku ka kuná ku isi ku ka koiê ka sa ku ngosô. ³⁷ Asié kua ma a ka fa sa veré: Whã ka kuna otô ka koiê. ³⁸ Un manda sê pa sê koiê ni nga ma sê na tabá wha, Otô tabá sô sê letxa ni suvisu ané. ³⁹ Yô ané nkenu Samaia poson-é kelê Né punda kua ma mengai-é fa: Ê tanga un turu kua ma ntá zi. ⁴⁰ Sô ola ma ane nkenu Samaia bi kotá Rê, ane pindji foga wha pa Ê fika ku ane, sô Ê fika ku ane nha dosú ria. ⁴¹ Yô nkenu kelê punda lumba Rê. ⁴² Ane ta fa mengai-é: Non kelê na punda lumba ô sô wha, mazi non ndê ku oria non mé, aié non ta ma Ê sa Savarô tia veré. ⁴³ Sô otô ria, ê ba Galileia: ⁴⁴ Punda Jizu plopi ta fa ma a na ka ngogô ku whã ná lekaru nitia rê wha. ⁴⁵ Ola Ê vitxa Galileia, ane nkênu tia-é Tué. Ane ta bê turu kua ma Ê ta zi ni Jerusalé ni fesa punda ane turu ta ba fesa Pasukua. ⁴⁶ Ê tô bi kaná Galileia, nga ma Ê bila aua vin né. Ê ta ku wha sefi soré alé ma ná rê ta ka duetxi ni Kafanaun. ⁴⁷ Ola ma ê ta ndê ma Jizu ta desa zurê sô tô ba Galileia, ê bé atê kota Rê sô pindji pa Ê desê bi kula ná rê ku ta kuaji muê. ⁴⁸ Sô Jizu faré: Si bô na bê sinali ku kua ma Un zi wha, bô na ka kelê wha. ⁴⁹ Sefi soré kundji: Sun, desê ku an antji ma mosu un ka muê. ⁵⁰ Jizu faré: bé mosu ô sa vivu. Ome-é kelê ni lumba ma Jizu ta fa sô bé. ⁵¹ Sô ê ta ka desê, ane ná kia rê bi lelê, faré ma mosu rê sa vivu. ⁵² Sô ê puta ane kuantu ola ma ê yogó: Ane kundji: Mazó nsuku vota sambari ola ma féble desé. ⁵³ Tata rê pia ma ola-é mé ma Jizu ta fa: Mosu ô sa vivu. Sô elê ku turu familia rê kêlê. ⁵⁴ Yé fô segundu milagli ma Jizu zi ola ma Ê bi fô zurê pêba Galileia.