¹ Só Jizu té lumba ene kuê, bé ku ene mielu Rê pa ôtô kiba di oiô di Cedrom, andji ta ku wã jardin ma Ê létxa ku ane maielu Rê. ² Sô Zura, ixi ku ta ba ngané Ê ta ka konsê lugué, punda Jizu ta ka banha semplé ku ene maielu Rê. ³ Zura ta bi kuê wã grupu dy soré, so txo oficiali ene sefi sasedote ene farizeu, ndu nha ku lantena, toxa so pingara. ⁴ Anto Jizu, ta turu ene kuê ki ka bi ra kuê, ki wê so punta ane: Nguê sê sa ngolo! ⁵ Sô ene kundji: Jizu, ixi Nazarenu. Jizu fa ene: Ya Un ya. Zura, trasueiru ta njaru té kua ane soré. ⁶ Anto, ola Ê fa ané: Sa Un, ene saia ba mema so kiê ni mavu. ⁷ Mora émé, punta ene: Nguê sê sa ngolo! Otô vê, ene fa: Jizu, ixi Nazarenu. ⁸ Jizu kundji: Aun fa sê Aun Sa, anto, si sê sa ngolo Un, desa ene ixi otô bé. ⁹ Pa kumpli lumba ixi ma ê ta fa: Na pendê né whã di ene ma ô Ra un. ¹⁰ Sô Simon Peru, ku ta ku wã supara, saié sô da wã xivirô di sumu sasedoti koté oria gletu. Sô nomi xivirô sa Malku. ¹¹ Sô Jizu fa ra Peru: Pê supara dingui ni bandji. Punda kuai, bô na bêbê kasi ma Pai da un wha. ¹² Antó, grupu Soré, sô kapiton y ene ofisial dy zurê ndama Jizu, sô manhé. ¹³ Ane bé ku Ê pumbelu da Anas, punda ê sa soglu di Kaifas, sumu sasedoti dy anu xiza. ¹⁴ Éra Kaifas ku ta da konsê ra ene zurê ku sa presizu di wã ome toka muê ra pôvô. ¹⁵ Simon Peru ta lelê Jizu, sô mora émé tê otô maielu. Maielu ixi za sa konsidu dy sumu sasedoty, sô letxa ku Jizu ni salon di sumu sasedoty, ¹⁶ Maji Peru ta fika ndjaru ni boró lua dy potó. Antó, ôtô maielu, ku sa konsidu dy sumu sasedoty, xiê sô fa ku serva ku ta ka nguara ny potó, sô bé ku Peru ba lêtu. ¹⁷ Sô serva ku ta ka nguara ni potó fa ra Peru: Bô té na sa wã mielu di Oméé! Ê fa: Na sa wha. ¹⁸ Ane sivirô é ene Ofisiali ku ta nha, ane ta zi wã fogô, punda ê ta fiô, sô sa ka kenta. Peru té ta ndja nha, ka kenta ku ene. ¹⁹ Sô, Sumu Sasedoty punta da Jizu sobli ane maielu Rê y ene insinu Rê. ²⁰ Jizu kundji ane: Aun ta fa biriru ra mundu, Aun ta ka xina ni xinagoga y ni nguêza nga ene zurê ka zunta né. Na fa né wha kua ni segêru. ²¹ Punda kuai sê sa punta un! Punta ngê ku ndê ku ma Un fa. Ane ngê ta kua ma un fa. ²² Sô Jizu fa kuê, wã ene ofisiali ki ta nha da whã suru ni Jizu, sô fa: sa ni mora é ma ô ka kundji sumu sasedoty! ²³ Jizu kundji ene: Xi Aun fa mali, da sestemunha dy mali. Sô, xi un fa buaru, punda kuai ma béta un! ²⁴ Antó, Anas mandé É manharu da Kaifas, ixi sumu Sasedoty. ²⁵ Simon Peru ta ndjaru ka kenta, sô ene punté: Bô na sa wã maielu Rê a! Ê nega sô fa: Na sa wha. ²⁶ Whã ene sivirô dy sumu sasedoty, ku sa ná amo di ome ki Peru ta kota oria, fa: Na bê ô ni jardin ku Êlê! ²⁷ Peru tô nega dingui, sô welewelemé galu kanta. ²⁸ Sô, a bé ku Jizu ni wê di Kaifas ba palaxu dy govenadô. Era pomonha sô ene na letha ni palaxu pa na kontamina, pa ene mé Paxikua. ²⁹ Sô, pilatu xiê pa tué é, sô fa ene: kua sê tê di kuza kontra Omé é! ³⁰ Si Omé é na ka sa mau, non na ka da ô elê wha. ³¹ Zô Pilatu fa ane: Bé kuê sê mé, zuguê segundu alê sê. Fa ane zurê: Ê na sa da nó setu beku né wã ngê motxi wha. ³² Ane fa pa lumba Dêssu mê ta fa sa kumpiru, musa mora ma ê ka a muê. ³³ Antó, Pilatu tô letxa palaxu dingui, sama Jizu y fé: Bô sa Alê dy zurê! ³⁴ Jizu kundjé: Bô fa kua é da ô mé, ô ôtô nguê fa ô kuê é dy Un! ³⁵ Pilatu kundji: Ãn sa zurê! Povô Ô plopi y ane sasedoty tua Ô da un. Kua Ô zi! ³⁶ Jizu kundji: Lenu Un na sa dy tia é wha. Sy lenu Un ka sa dy tiaé, nkênu Un ka luta pa Un na ka sa dáru da zurê wha. Mazi lenu Un na sa dy inguê wha. ³⁷ Pilatu fé: Antó, Bô sa wã alê! Jizu kundji: Bô fa man sa alê. Pa kua é un nansê y bi tia é, pa nda sesemunha dy véré. Turu nguê ki sa veré ka ndê voji Un. ³⁸ Pilatu fé: Kua sa véré! Ma ê fa kua é, ê siê dingui da zurê, y fa ané: Na bê né wã krini ni ome wha. ³⁹ Mazi sê tê kustumu ma un nga libeta da sê wã omé ny Paskua. Antó, sê mesê pa un liberta da sê Alê dy zurê!. ⁴⁰ Sô ane guita, fa: Ê na sa omé wha, mazi Barrabas. Barras sa wã kriminozu.