¹ Paulu turu ba Debi ku Lista: Sô nha tá ku whã mêlu ma a ka sama Timote, ná whã mengay judia kente, tata rê sa glegu. ² Sô ane ná amon ku ta Lista ku Ikóni ta ka ra ben rê. ³ Paulu ta mesê pa ê ka lêlê, Antó ê tué porê punda ane zurê ku ta ngá siza, punda turu ane tá ta ma tata rê sa glêgu. ⁴ Ma ane tá ka lêlê mondja poson rê ane ta ka manda ngeza kundji kua ma ê tá ka fa, ysy ma ane sigirô ku pastoru sisika dy Jeruzalé. ⁵ Asyé, ngezá ta ka omentá afé sô tá ka motxi kara ria masi. ⁶ Paulu ku ane ramon rê ta ka kolê turu fegejá Frígia ku Galásia whã vê ma a tá taza ane ny supitu Santu dy plega lumbá ny Ásia. ⁷ Ma ane tá pozê Misia, ane tenta letxa ni Bitínia, magi Supitu Santu na desa ane wha. ⁸ Ola ane tá ka pasa Mísia, ane desê ba poson Trôade. ⁹ Nsuku têlu, Paulu tá ka bê whã kua: Whã ome Masidônha tá ndjaru sô a samé sô fa: bi Masidonha bi zura non. ¹⁰ Asié ma Paulu tá ka bê whã kua, sô non ba Masidonha séru ba lokê kua ma Dêssu tá sama non ra pa non plega vangelhu ra ane. ¹¹ Sô, ma ane syê fô Trôade, ane zi viaji retu ba Samotrásia, sô otô ria, ba Neápoli, ¹² Dy nha ane sigi ba Filipu, poson Masidonha, distitu masi buaru sô whã kolenha roma sô nha non fika yô ria. ¹³ Ny sabaru, non ba lua poson zuntu whã oyô, nga ma non bê ku sa wha ngá pa non fa lason né. Non tason sô non fa ane mengay zunta bi. ¹⁴ Whã mengay ma a ka sama Líria, ku ka bendê kabisy fina, pason Tiatira, ku ta ka lispeta Dêssu ndê non. Sun biri koson rê dy tua atenson ku kua ma Paulu tá ka fa. ¹⁵ Ola ma ê butiza elê ku turu familia rê ê ngolo fa: Sy sê ka kunda ma nga kunfia Sun, letxa kay un sô fika nha. Sô ê loga non ra kua é. ¹⁶ Ê ra ma ola non ta ka ba nga ma a ka fa lason né whã ná karêtê ku tá ku whã supitu luviá, bê non. Ê tá ka ra patró rê luklu punda luvia é. ¹⁷ Mengay é ta ka lêlê Paulu ku non sô tá ka ngita ka fa: Ane ta ka fa sê mondja savason. ¹⁸ Ê ta ka zi kua é yô ria. Mazi Paulu, ta satiaru kuê foga wha, ê bila sô fa supitu é: Nga manda ô, ny nome Jizu, syê fô né. Sô supitu syê né seru. ¹⁹ Ola pató mengay é bê ma kua ma ê ta ka whará ganha tá bêrê, ane manha Paulu ku Sila sô beku ane lêtu fela whê ane soré. ²⁰ Ola a biku ane ra sefi govenu ane fa: Ane ome é sa zurê sô ane sêka zi yô mali poson non. ²¹ Ane sêka sina kustumu ma non na mesê pa ane romanu tuá ô bê. ²² Sô turu nkênu lata kontrê Paulu ku Sila, Ané sefi govénu fono kabisy ane sô manda pa a ra ane ku sikotxi whã vala. ²³ Sô ola ane ra ane yô sikotxi yô vê, ane zuga ane ome é pê pezu, manda guara lokê ane buaru. ²⁴ Ma ane tua ordé é sô pê ane lêtu pezu fundu sô manha opé ane pê whã ngundji. ²⁵ Ola ê ndu katxi nsuku, Paulu ku Sila ta ka fa lason ka kata vungu Dêssu sô otô pezu tá ka ndê. ²⁶ Ta sô, whã kiba tia wlukuá, sô ngundji pezu komesa ka témé, ta sô turu póto biri sô lengê ma a manha ane kuê sota. ²⁷ Nguara lata fô sóno, sô ane bê poto pezu biriru, Ane tua supara pa ane mata ongê ane punda ane kunda ma pezu tá fuji. ²⁸ Mazi Pauli ngita ku fosa fa: Na mata ongê sê wha punda turu non sa yngé. ²⁹ Sô soré pindji kandja, ê letxa seru sô komesa ka temê ku mendu, sô ê pê mpuna són kota Paulu ku Sila. ³⁰ Sô bé ku ane lua sô fa: Ane sungê kauy ma nga pô zi pa un sava! ³¹ Ane fa: kêlê ny Sun Jizu Klistu sô bôka sava bô ku kay ô. ³² Ane lumba lumbá Sun ra ane, zutzru ku kay rê. ³³ Sô soré tua ane ola é mé nsuku, laba kitó ane, sô ane ku turu kay rê ba butiza ola é mé. ³⁴ Ê bé ku Paulu ku Sila letu kay sô pê mé whê ane, Sô ê tá ku ngosô foga wha ku turu kay rê punda ê kêlê ny Dêssu. ³⁵ Ola pomonha biri ane sefi manda ane sefi manda ane nguara fa: Desa ane ome é bé ane: ³⁶ Soré fa lumba é ra Paulu fa: Ane sefi manda un pa un desa sê bé sê, sô syê bé sê ny paji. ³⁷ Sô Paulu fa ane: Non sa nkênu Roma sê ra non sikotxi letu lua sê kondena non, sô pe non pezu, sô ayé sê mesê sota non konderu! Mora é wha! Ma ane mé ka bi txia non fô yngé. ³⁸ Ane nguara bé ku lumba é ra sefi, Sô ane ta ku mendu ola ane ndê ma Paulu ku Sila sa nkênu Roma. ³⁹ Ane sefi bi sô pindji ane disiskupa sô ola a txia ane fô, pezu ane pindji pa Paulu ku Sila ka desa poson. ⁴⁰ Sô Paulu ku Sila syê fô pezu sô ba kay Líria. ola ane b~e ane ná amon, ane ra ane kosó sô asié ane syê fô poson.