¹ Sô ê kole atê poson Afipolis Apolónia, vitxa Tessalónika, nga ma wha sigagoga judeu sa né. ² Paulu, mora ê sa kostume, rê ê bé atê nha ku tesi sábaru, pufia ku ane serka dy Eskritura. ³ Biri Eskritura, sina ku sa pisiza ma Klistu soflê, ressusita ny motxi. Ê fa: Ixié sa Jizu ma nga plokama da sê ê sa Klistu. ⁴ Whã whã zurê bé nganaru zunta ku Paulu y Silas, ku yô nkênu dy divota grego, yô mengai ku tê influênsia. ⁵ Sô judeu ikredulu, moviru ku sumi, tuaOme impio dy fela, zunta multidon luma ni poson. Sata kai dy Jason a tia bi ku Paulu ku Sila y atê povô. ⁶ Sô, ane na béua, arrasta Jason ôtô ná mon rê ba wê sfi soré poson, tava ka fa: Ane ome xié bila mundu intê ba kosi, vitxa ingê. ⁷ Ixié, sa ngê Jasom tuá pê kai ane sá kontra dekreto dy Sêzar y ane ka fa ma êtê ôtô Alê, Jizu. ⁸ Sô yô nkênu ku sefi soré poson é ndê kua si é, fika satiaru. ⁹ Sô tua lêlu dy Jasom y dy ôtô ane txia anefô pesu. ¹⁰ Unsuku si za, ane ná mon manda Paulu ku Sila ba Bereia. Siga nha, ê ba sinagoga dy judeu. ¹¹ Ni Bereia, nkênu sa maxi buaru ku nkênu Tessalonika, sô lesebê lumba ku turu dispuzison dy ntê, turu ria ane ka examina Eskritura, pa ta si dy veré ku kua si é sa axi. ¹² Sô kua si é yô ane kêlê, ku ôtô mengai grega influenti ku yô ome. ¹³ Dy mora é sô judeu dy Tessalonika bi tá ma Paulu sa plokama lumba Dêssu ny Bereia, bé atê nha ba insita multidon. ¹⁴ Wêlé wêlé mé, ane ná mon manda Paulu pa litoral, mazi Sila y Timotio fika ingê. ¹⁵ Nkênu si ku nda Paulu bé kuê atê poson dy Atena ka tô bi, ku kué da Sila Timotio bé atê êlê masi séru possivel. ¹⁶ Sô Paulu sa whara ane ny Atena, supitu rê satia sô mê bê poson xiaru dy idolo. ¹⁷ Sô ê ta ka fa sinagoga ku ane judeu ku nkênu ku ka gôgô ku Dêssu, sô ku êlê by turu ria ny fela. ¹⁸ Turu kué whã ane filôzofo epikure estoiko, turu débatê kuê, fa: Ku ixié sa ma tagarela ta mêsê fa! Ôtô fa: Ê ko pregaro dy dêsu estranho, punda ê sa fa dy Jizu y ressurison rê. ¹⁹ Ané tê Paulu bé atê Areópago, fa: Non mêsê ta mora sina navu ma bô fa! ²⁰ Punda bô sêka bi ku kua estranhu da ôdia non. Sô nón mesê ta kua ma kua é sa. ²¹ ( Turu antiniense strangeiro ku vivê ingê na gasta tempo rê ku neua kua konta ô ndê novidade). ²² Anto Paulu lata ndja ny katxi dy Areopago fa: Ome ateniensi, un ta ma sê sa yô religiozu ny turu mora. ²³ Sô, Un ta ka bê kua dy adorason sê, aun bê whã altar ku seguinte sixi ka: Dêssu ma nón na konsêua. Sô bê, nkênu ku ka adora sê ta ngê ma sê sa fa mé. ²⁴ Dêssu ku kia mundu y turu kua ku sa né, Sun dy osé dy tia é, na ka tá ngêza wha jiru ny mon ome. ²⁵ Né serviru ku mon ome, mora si sê mêsê kua si é a bê whã ane ku Êlê mé da nkênu vira, respirason turu kua si é. ²⁶ Whã ome sô Ê kia turu rasa omém ku ka ta ny kosy dy tia é, sa determinado tempo limite dy habitason rê. ²⁷ Sô ane tê ku ba ngóló Dêssu é lugê talivê sê ka pô bê ta nga embora Ê na sa longi kada wha nón. ²⁸ Punda nón ka ta Né, ka nda Né, ka existi Né, mora whã poéta rê fa: Nó sa gerason Rê. ²⁹ Non sa gerason Dêssu, na ka pô pensa ku divindade sa mora ôlô, prata ô buru imagem kiaru dy aty imaginason dy ome. ³⁰ Axi ma Dêssu na tê konta tempo dy ignoransia wha, mazi aié Ê manda pa turu ome, ny turu nga, leplendê. ³¹ Punda Ê manda whã ria ma Ê ka bi julgá mundu ny justisa katxi dy ome ku Ê koiê. Dêssu da plova ndji na ome turu, ressusita katxi motxi. ³² Sô ane ome dy Atena ndê lumba dy ressurison dy motxi, whã whã zomba dy Paulu, mazi ôtô fa: Nón ka ndê sobre assunto xi é. ³³ Sô dy kua xi é, Paulu desa ane. ³⁴ Whã whã ome, sô, zunta kuê, kêlê, ku Dionizio, memblu konsê dy Areopago, whã mengai ka sma Damary, ku ane maxi ôtô.