¹ Ola a tua disizon pa non ba Itália, ane ra Paulu ku otô pezu ra whã sefi soré ma a ka sama Julio, ku ta toka fotxi Govenarô Agostô. ² Nón bé ku vapô Adamíti, ku ta kuaji siê begá Ázia. Sô nón ba mionga, Aristaku nkênu Masidónha kiba Tésalónia tá bi ku nón. ³ Sô otô ria non tuka ba pason Sidon, nga ma Julio tlata Paulo buaru foga wha sô desé ba atê kota ané migu rê ba tua kua ma ê tá mesê. ⁴ Sô ola non siê fô nha, non ba mionga sô siê ba kondoka ya sipi, ku tapa non ra ventu, punda ê ta ka venta kotê non. ⁵ Ola non siê non tuka ku aua petu Silísia ku Panfília, sô non Mirra whã poson Lísia. ⁶ nha sefi soré bê whã vapô Alexandrea, ku ta ka ba Italia ku bé ku non. ⁷ Non bé leve-leve yô ria sô ola non vitxa araska, petu ku Snido, ku turu kua é, ventu na desa non lelê mondja wha. Sô non bé kiba kreta taparu ra ventu ku bé ku non Samona. ⁸ Non bé bega-bega araska atê ma non vitxa whã nga ma a ka sama Bons Portu, ku sa petu pason Lazaia. ⁹ Non ta gasta tempu foga wha, non ta pasa tempu ku jizun zurê, ku bila pigú pa non siê. Sô Paulu viza ane, ¹⁰ sô fa: Ane Ome, un bê ma viaji sy ma non seka bi zi ka bi raná sô ku pendê foga wha, ne ku kega ô vapô sô wha mazi ku vira non turu. ¹¹ Sô sefi soré tua atensó masi ra mése ku donu vapô dôkê kua ma Paulu fa. ¹² Pontxi na ta buaru pa a pasa ngavana wha, masi motxi manhêlu ra non konsê pa non fô nha, sy non tê meiu ô non ka poy vitxa poson Fênix, pa non pasa ngavana. Fênix sa whã pontxi kreta, ku bila ra notxi ku sulu. ¹³ Ola ventu sulu komesa ka sopua leve-leve, ane melu kunda ma ane tá mesê. Sô ane saya buru kolá sô ka ba pozê kreta petu ntary. ¹⁴ Mazi ta sô whã ventu ketxi tovara ma ka sama Euroakilon ku bi fô ilha komesa ka sagury non. ¹⁵ Ola ê komesa ka ra pê vapô ku fosa sô non na poy zi fosa ku ventu wha non desé bé ku non. ¹⁶ Non la whã ngá ma whã ilha ma a ka sama kauda tapa non, sô ku yô vugu-é non tua botxi sava-vira. ¹⁷ Ola ane lata botxi ane tua kóro rê pa ane ba manhé pê memé vapô. Ane ta ka mendu pa ane na ba kiba banku nsekê sirte, antó ane mata leva sô ka lema. ¹⁸ Non ta turu kansaru punda tovara é. Sô otô ria ane nkênu ka ta ka zi viagi komesa ka zuga kega fô lêtu vapô. ¹⁹ Dy tesi ria, ane manhelu turu sata ba mionga ku plopi mon ane, ku kabisi vapô. ²⁰ Sô ma sólo ku tetembu na tô yerê diba non yô ria wha, ma non ta ka tua pankara ndjigi tovara é, non na tô konta ku vira wha. ²¹ Ma ane tá yô ria sê mé, Paulu lata katxi manhelu sô fa: Ome sê toka ka ndê un, na ba kreta wha pa non na ka pendê yô kua é wha. ²² Sô ayé, nga ra sê fosa tê kosó punda sê na ka tô pendê vira wha, mazi vapô sô sê ka pendê. ²³ Punda whã nsuku pasaru, whã anzu Dêssu ma nga toká, tô sivi ndja bóro un. ²⁴ Sô fa: Na mendu wha, Paulu. Bô ka ngolo bê Sêzalu, sô Dêssu ka ra ô vira ku turu ane ku seka zi viaji ku bô. ²⁵ Sô, ome, tua kosó! Punda nga kufiá Dêssu ma ê ka ra mora é ma Ê fa un. ²⁶ Mazi non tê zi viaji ba kuakuali ilha. ²⁷ Sô ola kuyne kuana nsuku bi, ma non ta ka bé mondja é, ku tá mionga Adriatiku, katxi-katxi nsuku ane nkênu ku ta ka zi viaji kunda ma ane tá ka pôzê kuakuali tia. ²⁸ Ane zi sonda sô ane bê vintxi basa, ta sô ane tô zi sonda ane bê kuyne tanó. ²⁹ Ane tá ku mendu sota pê begá ntary, sô ane mata kuana ponta vela, sô fa lason pa pomonha biri séru. ³⁰ Ane manhelu ngolo whã mora desa vapô sô ane desê botxi pê mionga ku vonté manha kabu kola pê plôa. ³¹ Mazi Paulu fa sefi soré ku soré: Ameno pa ane ome é ta lêtu vapô sê na ka poy sava wha. ³² Sô ane soré kota kota kóró botxi sô desé berê. ³³ Ola pomonha biri, Paulu kora turu ane pa ane mé. Ê fa: Yé sa kuyne kuana ria ma sê ta ka whara, sô sê na mé netxó wha. ³⁴ Sô nga pindji sê pa sê mé, punda yé sa pa sê tê fosa, sô né whã pena ntê sê na ka pendê wha. ³⁵ Ola ê ba kua é, ê tua mpó sô ra Dêssu gasa whê turu ane, Sô patxié komesa ka mé. ³⁶ Asyé, turu ane ta ku kosó sô mé turu. ³⁷ Non tá tanon sentu ku kuyne kuy samano nkênu letu vapô. ³⁸ Ola ane mé siaru, ane zi pa vapô ka fika masi lévé zuga tigú pê mionga. ³⁹ Ola pomonha biri ane na tô ta tia wha, mazi ane bê whã béga ku whã paá, sô komesa ka pufia sy ane ka beku vapô atê nha. ⁴⁰ Antó ane kota ka bi kolá sô sifa pê mionga. Ola é mé ane sota koro lemu sô lata vela ra ventu, Sô antó ane lêlê ba paá. ⁴¹ Mazi ane ba whã nga ma ane ta bê dosú kolentxi sô vapô bé rumu ra paá. Plôa vapô kunha pê paá sô kebea punda mionga buri. ⁴² Ane soré ta pa ane mata ane pezu pa né whã ane na ka landa sô fuzi wha. ⁴³ Mazi sefi soré ta mesê sava Paulu, antó ê na desa ane wha sô manda pa ane ka poy landa pa ane ka sata fô vapô pumbê sô vitxa paá. ⁴⁴ Sô otô ome ka toka lêlê whã-whã ane diba tába, ô kuakuali kua vapô. Dy mora é, turu non vitxa sosegaru paá.