¹ Ba whê, Agipa fa Paulu: bô ka pô fa ra ô mé. Sô Paulu sendê mon sô defendê vira rê: ² Nga sa ku ngoso, Alê Agipa pa mpôy kundji oze whê ô, turu kuza ma ane zurê zi: ³ Masi buaru sa punda bô ta turu kua ma ane zurê kustama né. sô nga pindji pa bô ndê un ku paxensa. ⁴ Kua veré turu ane zurê ta mora ma nga vevia zinz un ta masivi katxi nkênu tia un ku Jiruzalé. ⁵ Ane ta un na komesa sô toka dimiti ma ngá vevia mora wha fasu, whã gupu plontu ny ligion nó. ⁶ Ayé un sa yngé pa a zuga un punda nga whara pomesa ma Dêssu zi táta non. ⁷ Ra lazon é, kuini dôsu tibu ka whara ka sivi Dêssu nsuku ku pomonha sô non ka whara ganhé. Sô punda whara é ma ane zurê ka kuza un, alê Agipa! ⁸ Ra kuay ma bô ka zuga ma ê sa siriga ma Dêssu ka tô kora motxi! ⁹ Zina whã tempu un ta ka pensa ku an mé ma un toka zi whô kua kontê Nome Jizu ri Nazaré. ¹⁰ Un zi kua é Jeruzalé.Un pê yô ngê Dêssu pezú punda porê ma un tá kuê ane sefi ngeza na kulu pa un zié asyé: sô ola ane tá motxi, nta ka bé ku ane sefi é kotê ane. ¹¹ Sémpe ntá ka pê ane pezu ny turu sinagoga, sô tá ka tenta zi pa ane ka fa mali, ntá ku leva ku ane sô nta ka tua konta ane atê posó stangeru. ¹² Ma ntá ka zi kua é, mba Damasku kosi porê kuu oji ane sefi ngezá na kulu. ¹³ Sô ny mondja, mê ria, sô alê mbé whã kandja ku bi fô osé, luzi masi rokê sólo yerê pê ongê un ku ane ku tá ka zi viaji ku an. ¹⁴ Ola nón kyê son ndê whã vozu ku lungua hebêu, ka fa ku an, ku ta fa: Salu, Salu, ra kuay bô seka tua konta un ra! Ê ka kusta ô peza ku ngion. ¹⁵ Sômputa: ngey sa ô Sun! Sô Sun kundji: Sa Jizu, ma bô seka tua konta Rê. ¹⁶ Ayé bô ka lata ndja. Punda ra kua é ma mbi ra ô pa nzi ô na kia ku seseminha kua ma bô ta ri Un ku ka ma nga ba musa ô masi ngosi. ¹⁷ Nga liva ô mó povô é ku ane zintxi, ma nga manda ô. ¹⁸ Pa bô biri whê ane, liva ane ni kulu pê kandja dy porê demono ba Dêssu dy mora ma sê ka tua peron pekaru món Dêssu ku ledêlu ma Nga ra nkênu sy ma Un zi santu ku afé ku An. ¹⁹ Sô, Alê Agipa, na bila mema ra kua ma mbê fô osé wha. ²⁰ Ri otô mora, ma mprega pa turu nkênu ka lependê bila ra Dêssu, ka zi suvisu buaru ku lependementu. Pumbê ra ane Damasku, sô ri Jeruzalé ku turu fegeja zurê ku zintxi turu. ²¹ Ra kua é ane zurê pê un pezú ngeza sô ngoló mata un. ²² Dêssu zura un atê dié, antó nga lata fa kua, tantu ra nkênu ximpi kuma buaru ma pofeta Muzé tá fa ma ê ka bi ra. ²³ Ma Kistu toká parisê sô ka sa pumbêlu tô kora motxi sô ba musa kandja ra povô zurê ku zintxi. ²⁴ Ola Paulu kopeta defeza rê, Festu fa ku fosa: Ê sa malokô. Ane kua sy ngayru ma bô tá ka zi ô bila malokô. ²⁵ Mazi Paulu fa: Na sa malokô wha soba Festu, mazi nga lumba veré ku kosó ku whã ntê buaru. ²⁶ Punda alê ta turu kua é, manda nga fa biriru punda nta ma né whã kua na sa kondêru wha: Punda né whã kua na ka ra konderu wha. ²⁷ Bô ka kêlê ane pofeta, Alê Agipa! Nta ma bô ka kêlê. ²⁸ Agipa fa Paulu: Ê fa ta txo sô bô sêka mesê zi un sa kiston! ²⁹ Paulu fa: Nga fa lason ra Dêssu ma ra pokô ô motxi na ra ô sô wha mazi ku turu nkênu ku ka ndê un oze ka sa mora un mazi sê lengê é. ³⁰ Sô alê lata ku govenarô ku Berenisi ku turu ane ku ta tasoru kuê. ³¹ Ola ane desa salon, ane fa whã ku otô: Ome na zi ne whã kua ma ê toka muê ô ta pezu wha. ³² Agipa fa Festu: A toka sota ome é sy ê na ka apela Sezalu wha.