¹ Festu letxa fegêja sô ri tezi ria ê syê Sezarêa ba Jeruzalé. ² Sefi ngeza na kulú ku zurê tô bi ku kuzason ra Festu kontê Paulu. ³ Sô ane pindjié mora whã favolô kotê Paulu, pa ka sama pa ê ba Jeruzalé, sô asyé ane ká poy maté mondja. ⁴ Sô Festu kundji ma Paulu tá pezu Sezarêa, sô pa elê mé ká syê seru ba nha. ⁵ Sô nkênu sy ku ka poy ká bé ku non. Sy kua mali sa kua ome é a ka kuzé. ⁶ Sô ri ta ku ane na sa masy rokê náke ô kuin ria, ma ê tuka ba Sezarêa. Otô ria ê tua nga tubulanu sô manda pa ane ka bi ku Paulu. ⁷ Ola ê vitxa, ane zurê Jeruzalé fika vota rê sô bi ku yô kuzason ma ane na ka poy pové wha. ⁸ Paulu defendê sô fa: Na zi né whã kua mali kontê alê zurê, kontê ngeza ô kontê Sezalu wha. ⁹ Sô Festu, ta ka mesê nganha favolô ane zurê, sô kundji Paulu: Bô mesê ba Jeruzalé pa un mba zuga ô ri kua é! ¹⁰ Paulu fa: Ayé nsa lêtu tubulanu Sezalu nga ma a tê zuga un né. Na zi ane zurê kuakuali mali, mora ma bô mé ta veré. ¹¹ Sô sy un zi kua mali ô sy zi kua ku toka pena motxi na ka mendu muê wha. Mazi sy na tê né whã kua ma ane ka kuza un wha né nkênu na ka poy trega un mon ane wha. Nga fa ra Sézalu: ¹² Sô Festu puta ane konsê rê, sô kundji: Bô pindji ra Sezalu ra Sézalu bô ka bé. ¹³ Sô ri whã dôsu ria, alê Agipa ku Berenisi vitxa Sezarêa ba zi whã vizita biriru ku Festu. ¹⁴ Ola ê ta yô ria nha, Festu pezenté kazu Paulu ra alê: A desa whã ome yngé ku Feli mora pezu. ¹⁵ Ola ê ta Jeruzalé, sefi ngeza na kulu ku sôba zurê bi ku kuzason kontrê ome é sô pindji pa kondené. ¹⁶ Un fa ane ma ane romanu na sa kustumaru ka trega whã ome pa ê muê sê pa nkênu ma a kuza sa ku nkênu ku kuzé pa ê pô defendê ri kuzason ma ane zié. ¹⁷ Sô ola ane bi yngé, na wharé, sô otô ria, ntason tubulanu sô un manda pa ane bi kuê. ¹⁸ Ola ane nkênu ku kuzé lata ri kuzé, na bê né whã kuzason sétu katxi ane nkênu ku bi kuê wha. ¹⁹ Ri otô mora ê ta ku whã dôsú pontu ma ane patxi katxi ane punda religion ane plopi sô ku whã sétu Jizu ku tá motxi, ma Paulu ka kêlê ma Ê ka vevia. ²⁰ Un ta kunfundiru ku mora nga ngoló ta kazu é sô un puta sy ê ka poy ba Jeruzalé pa a zugé nha ra ane kua é. ²¹ Mazi ola Paulu pindji pa nguara Alê ta kuê, un manda pa ê ka fika ny kontroli atê nga mandé ra Sezalu. ²² Agipa fa Festu: Un ta mesê ndê. Festu fa: Mungu bô ka ndê. ²³ Sô otô ria Agipa ku Berenisi ta bi ku yô pompa sô letxa sala audiensia ku sefi soré ku ane ome masi fotxi poson. Festu ra komendu sô ane bi ku Paulu. ²⁴ Festu fa: Alê Agipa, ku turu ome rê ku sa yngé ku non sê bê ome é mora ma ane ta puta un yngé, un samé ma ê na poy tô vevia wha. ²⁵ Mazi un tô vevié ma ê na zi né whã kua ma ê toka muê wha. Sô ma ê loga Alê ngoló mandé. Punda na bê kua sétu pa un sisika ra alê ri vira rê wha. ²⁶ Punda kua é mbi kuê masi ra ô. Alê Agipa, mora ma nga poy tê kua sisika ra kua é. ²⁷ Punda ê na kakô sétu un manda whã pezu sê ngoló ta kuzason kontré wha.