¹ Sô ri tanó ria Anania sefi ngeza na kulu, ku whã dosú pastoru ku whã divogaru ma a ka sama Tétulu ane desê atê Sezaréa. Ane ome é bi ku kuzason kontrê Paulu ra govenarô. ² Ola Paulu tá whê govenarô, Tétulu komesa ka kuzé ka fa: govenarô, punda ô nó tê yô paji, sô punda porê ô bô ka bi ku mora buaru ra nkênu tia non. ³ Asyé ku turu vonté non bi ta turu kua ma bô ka zi, sefi Féli. ⁴ Sô pa nón na traza ô dingi wha, nga pindji ô ma whélemé bô ka ndê un ku vonté. ⁵ Punda non mbê ma omé é sa whã pagá sô nkênu ku ka bé ku zurê turu tia ka bi levota. Ê sa whã sefi Seta Nazarenu. ⁶ Sô atê ê ngoló mura ngezá, Sô non pê pezu. ⁷ Sô Lija komandanti bi ku fosa txié fô mon non. ⁸ Ola bô ka puta Paulu ri turu kazu é, bô turu ka pô bi ta kua sy ma non kuzé né. ⁹ Zurê turu kuza Paulu zuntaru sô fa ma kua é sa veré. ¹⁰ Sô ola govenarô zi Paulu sinali pa ê fa, ê kundji: nta ma ku yô anu ma bô sa zuxi ane povô é sô nsa ku ngosô foga-wha ma bô spika un ra ô. ¹¹ Bô sa plontu ri pia ma ê na ka zi masi rokê kuine dôsu ria ma un banda pa un ba gogô ku Dêssu ny Jeruzalé. ¹² Sô ola ane bê un ngeza, na pufia ku né whã nkênu wha, sô na ndjinga ane nkênu, né ngeza sô né poson wha. ¹³ Sô ane na poy pova ô kuzason ma ane ka zi ayé kontê un wha. ¹⁴ Mazi nga dimiti yé ra ô ku ku ma non kundji ku mondja ma ane ka sama seta, ku mondja é mé ma nga sivi Dêssu ane nkênu non na kulú. Nsa plontu ra turu kua ku sa sisikaru ny alê pofeta. ¹⁵ Nseka whara Dêssu é mé, mora ane ome é ku sêka whara kua é mé, ma motxi ka tô bi kora, tantu zustu kuma inzustu. ¹⁶ Sô ny kua é nga goló sa ku whã kuxensa sê kupa whê Dêssu ku turu ome ku turê. ¹⁷ Sô ri yô anu nga bi ku zura ra povô un ku pezentxi lêlú. ¹⁸ Ola un zi kua é ane zurê Azia bê un ny fesa ri laba ny ngeza, na sa ku yô nkênu ô whã kioyô wha. ¹⁹ Ane ome é toká sa whê ô ayé, pa ane fa kua ma ane tê kontê un sy ane tê kua fa. ²⁰ Ô antó ane ome é toka fa kua ma ane ka kunda mali un, ola ane tá whê kosê ane zurê. ²¹ Pa ê na sa ra kua é ma un ta whê ane ma un fa: Punda ra ola motxi ka korá ma a seka zuga un óze ku sê. ²² Féli sô tá ta buaru ri mondja, sô asyé ê kontê liunion é. Ê fa: Ola komandanti Lísia ka tô bi fô Jeruzalé nga tua disizon kazu ô. ²³ Antó ê manda pa soré ka manha Paulu, mazi ku yô demanda sô ê na tlaza ane migu rê ri zuré ô bi lelê wha. ²⁴ Sô whã dôsú ria, Feli tô bi ku mengay rê Druzila, zurê, sô mandé bi ku Paulu sô ta ka ndê ri afé ny afé ku Kistu Jizu. ²⁵ Sô ola Paulu tô fa kuê ri zustisa, ku domini plopi ku zugamentu ku ka bi, Feli fika ku mendu sô kundji: Ayé bê ô. Mazi ola nga tê tempu masi ngosi, nga sama ô. ²⁶ Tempu é mé ê tá ka whara pa Paulu ká ré whã lêlú, ra kua é ê manda samé masi seru sô lumba kuê. ²⁷ Ku turu kua é ola dôsu anu pasá Pósiu Festu, bila govenarô sô Feli, sô mesê búara ane zurê, ta ku Paulu pezu.