¹ Ku kua ma bô sisika: Ê sa buaru pa omé na tua mengay wha. ² Mazi punda visu ku tentason, kara omé tê dêtu tê mengay rê popi sô sô kara mengay tê dêtu tê omé rê popi. ³ Omé tê dêtu ra mengay dêtu ku toké mora é mé ma mengay tê dêtu ra omé dêtu ku toké. ⁴ Na sa mengay ku tê porê riba ongê rê wha mazi omé mora é mé ma omé na tê porê riba ongê rê wha mazi mengay rê. ⁵ Na puvi otô wha mora ma si kuxensa dodôsu ka say ku tempu setu masi buaru sa pa ané ka zi lason. Sô ola kua é, sê ka tô zunta ningi. Asié demono na ka povega sê punda fata kontroli. ⁶ Punda nga fa sê kua é mora whã konsê na punda un sêka manda wha. ⁷ Un ta ka mêsê pa turu sê ka sa mora an: ku turu kara whã ka tê popi porê rê ku Dêsu, whã ri whã mora otô ri otô. ⁸ Nga fa ané omé sôlê kua ané mengay sôlê ma ê sa buaru pa sê ta sê kaza asyé mora un! ⁹ Mazi si ané na ka pô tê porê wha tê ki kaza. Punda ê sa masi buaru kaza rôkê venxa. ¹⁰ Ayé ra kazaru nga manda, né an wha mazi Sun, Mengay na pô baga ku omé rê wha. ¹¹ Mazi si ê baga ku omé rê, ê pô ta sê kaza, ô ê ka pindjié peron. Sa mó omé na ka pô baga ku mengay rê wha. ¹² Mazi ra otô nga fa, né sun wha ma si otô ná amon tê whã mengay mundu sô si ê sa ku ngoso vevia kuê ê na ka baga kuê wha. ¹³ Si whã mengay tê whã omé mundu sô ê sa ku ngoso vevia kuê ê na ka baga kuê wha. ¹⁴ Punda omé mudu ka sa limpu punda mengay rê sô mengay mundu ka sa limpu punda omé rê sa kiston. Otô mora ná ané ka pô sa suzu ola ma ané veré sa kiston. ¹⁵ Mazi si mêlu mundu bêrê desé bé. Mora é ná amon na sa pezu ku kua ma ê zi wha. Dêsu sama non ri vevia ku paji. ¹⁶ Punda mora ma bô ta si mengay ka ba sava omé rê! Ô mora ma bô ta si omé ka ba sava mengay rê! ¹⁷ Sô kara whã ka vevia vira ma Sun ka ra sô ra kua é ma a sama ô ra. Yé sa kua nga manda turu ngêza. ¹⁸ Nkênu ta poraru ola a sama a samé pa ê kêlê! Ê na pô ngolo kondê maka ma a poré wha. Nkênu ta sê pora ola Dêsu samé pa ê kêlê! Ê na pô pora wha. ¹⁹ Ra kua é ne poraru ne sê pora na ka pota wha. Kua ku ka pota sa lispêta kua ma Dêsu ka manda. ²⁰ Kara whã ka ta mora ma a samé ma ê ta ku Dêsu pa ê kêlê. ²¹ Bô ta pezu ola Dêsu sama ô! Na mendu ku kua é wha. Mazi si bô bila livi zi buaru. ²² Ra nkênu ma Sun sama mora ná kia, yé sa whã omé livi ra Sun. Mora é mé, nkênu ku sa livi ola a samé pa ê kêlê, sa na kia Kistu. ²³ A kopua sê ku whã pesu na tô bila ná kia omé wha. ²⁴ Ná amon mora ma kara whã non ta ola a sama non ri kêlê, ban ta asié. ²⁵ Asyé ra ané ku nasi kaza wha, na tê whã odji Sun wha. Punda nga ra whã punhon ma nkênu ma punda pena Sun ê ka kunfia. ²⁶ Punda nga kunda ma punda parisê si ku sa ingé é ê sa buaru pa omé ka ta mora ê sa. ²⁷ Bô sa ku kumpimisu ku whã mengay! Na ngolo baga wha. Bô sa livi whã mengay! Na ngolo baga wha. ²⁸ Mazi si bô sa kazaru, na zi pekaru wha. Sô si whã mengay sôlê kaza, ê ka zi pekaru wha. Asié nkênu si ku kaza ka tê yô demanda ma ê sê ka vevia, sô un mesê popa ô ku kua é. ²⁹ Mazi yé nga fa ô ná amon: tempu sa kutu. Ayé ba whê desa ané ku sa ku mengay ka vevia mora ma ê na tê wha. ³⁰ Ané ku ka sua mora nkênu ku na sêka sua wha, ané ku sêka legéla, mora ma ê na sêka legela wha. sô ané ku sêka kopa, mora nkênu ku na tê posi kuakuali kua wha. ³¹ Sô ku sêka zi nogoxo ku mundu, mora nkênu ku na sêka zi nogoxo wha, punda mora mundu ayé sa ligaru ku fin. ³² Untá mesê pa sê ka ta livi pokupason. Omé sê kaza ka pokupa ku kua Sun, mora ku ka bua Ré. ³³ Mazi omé kazaru ka pokupa ku kua mundu ri mora ku ka bua ra mengay rê. ³⁴ Ê sa patxieu. Mora é turu ma mengay sê kaza ô ku viji sê ka pokupa ku kua Sun, ku mora sa santa ku ongê ku Supitu. Mazi mengay kazaru ka pokupa ku kua mundu pa ê buara omé rê. ³⁵ Nga fa kua é ra povetu sê popi, sô ê na sa ri obiga sê wha mazi sa buaru pa sê ka seka zi kua Sun sê kêsê né whã kua wha. ³⁶ Mazi si nkênu ka kunda ma ê na sêka tlata mengay rê ku lispêtu wha, sô si ê sêka bila vé ri kaza, sô si ê tê ku sa asyé, zi mora bô mêsê. Ê na ka zi pekaru wha, ma ê ka kaza. ³⁷ Mazi si ê sa setu kosó rê sô ê na sa kosi mó wha, mazi ka lêgula vonté rê popi sô si ê tua disizon ku kosó rê popi zi kua é, pê mengay ô popi ku viji, bô sê ka zi buaru. ³⁸ Sô nkênu si ku kaza ku mengay ô viji zi buaru, sô ku ka koyê na kaza wha, zi masi buaru. ³⁹ Whã mengay sa ku omé rê turu ola ma ê sêka vevia. Mazi si omé rê muê ê sa livi pa ê kaza ku nkênu ma ê mêsê, mazi ku Sun sô. ⁴⁰ Ku zugamentu un anda ê ka sa ku masi ngoso vevia mora ê sa. Nga kunda ma untê Supitu Dêsu.