¹ Ola ma whã sê tê whã demanda kontrê otô ná amon, ma sê ka tivi ba tubulanu whê zuxi mundu ma ê na sa whê santu wha! ² Sê na ta ma Santu ka zuga mundu wha! ³ Sê na ta ma non ka zuga ané anzu wha! Kuntu masi kua ku ka toka vira é! ⁴ Sô si sê tê ki zi zugamentu ku ka pô sa ra vira, ra kuay ma sê ka pê kazu é whê nkênu si ku na ka ra ku ngêza wha! ⁵ Nga fa kua é ra vegonha sê. Katxi sê na tê nkênu ku ta kua buaru ri rezovê demanda katxi ná amon wha! ⁶ Sô si whã kenti ka ba tubulanu ku otô kenti sô yé sa pê whê wha zuxi mundu. ⁷ Ri mora pa ê tê demanda zugamentu katxi kenti sa vegonha ra sê. Ra kuay ma sê na ka parisê mali ra wha! Punda sê na ka pimiti pa sê mé sa nganaru wha! ⁸ Mazi sê zi mali sô ngana otô ku sa popi ná amon sê! ⁹ Sê na ta ma nkênu ma fé na ka lera Lenu Dêsu wha! Na ngana wha: ané nkênu ku ka dumi ku otô naé ku ka sivi fegula, ané bandiru, ané lifiron sô ané omé ku ka dumi ku otô omé. ¹⁰ ané ladlon, ané golozu, ané beberaru, ané ku ka fa mali ku ané ku ka futa, né whã ané na ka lera Lenu Dêsu wha. ¹¹ Si ê sa kua kuakuali sê. Mazi a laba sê zi sê santu sô fika sê zustu ku Dêsu ny nomi Sun Jizu Kistu sô ku Supitu Dêsu non. ¹² Turu kua é sa pa un zié: mazi né turê ku sa buaru ra un wha, Mazi na ka romina né whã rê wha. ¹³ Mé sa pa stômagu, sô stomagu sa ra mé, mazi Dêsu ka loké ku dosu re. Ongê na sa pa a dumi kuê a tôa wha, mazi ra Sun sô Sun ra ongê. ¹⁴ Dêsu tô kora Sun sô ka tô kora non ku porê Rê turu. ¹⁵ Sê na ta ma ongê sê sa memblu Kistu wha! Sô a ka tua memblu kistu sô zi sosi ku whã puta! nta ma ynga! ¹⁶ Sê na ta ma nkênu ku ka zunta ku puta ka bila whã ongê kuê wha! Mora ma bibilia ka fa: Dôdôsu ka bila whã kany sô. ¹⁷ Sô nkênu ku ka zunta ku Sun ka bila whã supitu kuê. ¹⁸ Fuzi ka rumi otô a tôa! Kuakuali pekaru ma nkênu ka zi sa fora ongê, mazi nkênu bandiru puta ka zi pekaru kotrê popi ongê rê. ¹⁹ Sê na ta ma ongê sê sa templu Supitu Santu, ku ka ta ku sê, ma sê tua mon Dêsu, sô ma sê na sa ri sê mé wha! ²⁰ Punda a kopua sê ku whã pesu. Sô gaba Dêsu ku ongê sê.