¹ Non ndê lekaru ma katxi sê otô ka dumi ku otô, whã mora dumi ku otô ma né zintxi na ka kundji kua é wha. Lekaru sa ma whã sê sêka dumi ku mengay tata rê. ² Sê ka zi luxu foga wha! Ra kua é, sê na toka ngô wha! Nkênu ku zi kua é toka pa txié katxi sê! ³ Sô un pô ka sa londji sê ku ongê, mazi masi petu ku supitu, un zuga nkênu si ku zi kua é za, mora ma nga sa yngé. ⁴ Ola sê ka zunta ku nomi Sun non Jizu, sô ku supitu un ku sa yngé turu ku porê Sun Jizu. ⁵ Da ané omé é ra demono pa ê loké ku kany, sô asyé supitu rê ka pô sava ria Sun. ⁶ Whê sia na sa buaru wha. Sê na ta ma txo fomentu sô ka sia turu masa wha! ⁷ Laba turu fomentu vé pa sê sa whã masa novu, mora ma sê sa ayé, mpó sê sia. Punda Kistu ombô non Paskal a pê kusu. ⁸ Asyé non ka zi fesa sê fementu vé, fementu ku ka poto mali sô ku turu mali, mazi ku mpó sê sia ri vonté ku veré. ⁹ Un sisika ku leta un pa sê na zi sosi ku né whã nkênu ku ku dumi ku otô wha. ¹⁰ Ri né whã mora nga mesê bandiru mundu é, ô ané ku ka tê ngana, ané tapasêlu ô ané nkênu ku ka sivi fegula, whã vê pa sê ta londji ané sê ka pisiza siê fô mundu. ¹¹ Mazi ayé un sêka sisika ra sê pa sê na zi sosi ku nkênu ma a ka sama ná amon, mazi ku sêka vevia ka dumi ku otô, ô ku ka tê ngana, ô ku ka sivi fegula, ô ku ka fa mali otô ô ku sa whã beberaru ô whã tapaselu. Né na mé whã mé ku nkênu é wha. ¹² Punda mora ma nga pô sa musturaru ku zugamentu ané ku sa lua ngêza! Pa kua é a na ka zi zugamentu ku ané ku sa lêtu ngeza wha! ¹³ Mazi Dêsu ka zuga ané ysi ku sa lua: Txia nkênu mafé katxi sê.