¹ Ê sa asyé ma whã nkênu toka pia non, mora ná kia Kistu sô nkênu ku ka zi suvisu Dêsu. ² Di mora é sa whã vonté ma nkênu ku ka zi suvisu ka tê lispetu ku kunfiansa. ³ Mazi ra un ê sa sê sintxiru pa sê ô kuakuali tubulanu omé ka zuga un. Punda, né un mé na ku zuga un wha. ⁴ Na tê kuxensa pa né whã kuzason ka sa ziru kotê un wha: Mazi yé na ka sa ma un sa nosêntxi wha. Sun sô ka zuga un. ⁵ Sô na zuga kuakuali kua antizi tempu, atizi pa Sun bi wha. Ê ka bi ku kandja ra kua kondêru kosi kulu, sô tô biri turu vonté koson sô, kara whã ka tua bensa rê patxi Dêsu. ⁶ Ayé, ná amon, un komesa kua é ku an mé sô ra Apolu punda sê, pa sê siné ku non: Na bé masi rkê kua ku sa sisikaru wha, asyé né whã nkênu na ka sêka pê whê favolô whã ka bandona otô wha. ⁷ Punda ngê ka bê whã dêfetu katxi sê ku otô! Kuay ma sê tê ma sê na tué ngasa wha! Si sê tué ngasa, ra kuay ma sê sêka zi luxu mora kua ma sê na tué wha! ⁸ Sê tê turu kua ma sê ka mêsê za! Sê bila liku za. Sê komesa ka manda non! Di mora ma un mêsê pa sê ka manda, antó nga poy manda ku sê. ⁹ Punda un pensa ma Dêsu pê ra non ané mêlu, ny utimu nga, sô mora omé ku sentexa ra motxi. Non bila whã tiatu ra mundu, ku anzu sô ku ané omé. ¹⁰ Non sa malokô punda Kistu, mazi sê ta kua ku Kistu, Non sa flaku, mazi sê sa fotxi. A ka gaba sê, mazi a ka dispeza non. ¹¹ Atê ola é non sa ku fomi ku sêji, non sa ku yô mizeria bisiru, a ka ra non pankara butu, sô non na tê kay wha. ¹² Non taba duru ku non popi foga wha. Ola a ka zi non mali, non ka zi ben. Ola a ka tua konta non, non ka ngueta. ¹³ Ola a ka fa mali non, non ka ben. Non tô bila sô a tô pia non mora kua suzu mundu sô poreru ri turu kua. ¹⁴ Na ka sisika ané kua é ri zi sê vegonha wha, mazi pa un menda sê mora né un ma nga ngosa rê. ¹⁵ Punda, sê pô ka tê kuyni mili pisôru ry Kistu, sê na tê yô tata wha. Punda un bila tata sê ku kistu punda vangelhu. ¹⁶ Asyé nga vugu pa sê ka mindji un. ¹⁷ Ra kua é, un manda sê Timotiu ma nga ngosa rê sô sa ná un plontu ku Sun. Ê ka lembua sê mondja un ku kistu mora ma nga sina turu nga sô kara ngeza. ¹⁸ Whã whã sê bila ka zi luxu ka zi kua mora ma ná ka ba pia sê wha. ¹⁹ Masi ngosi nga ba lêlê sê, si Sun mesê. Sô nga bi ta né turu kua ma ané ka fa ku yô luxu, ma nga bi pia pôrê ané. ²⁰ Punda lênu Dêsu na sa ku lumba sô wha mazi ku porê. ²¹ Kuay ma sê mêsê! Nga ba lêlê sê ku whã vala ô ku amolê ku supitu ku ka yêngê!