¹ Ná amon un, na ka poy fa sê mora nkênu ku supitu wha, mazi mora nkênu ku kany, mora na pikina ny Kistu. ² Un ra sê lêtê, na ku mé aua wha, punda sê na sa plontu wha. Sô né ayé sê na sa wha. ³ Punda sê sa kany anda. Punda si sê saku sumi ku demanda anda, sa sê na sêka vevia ku kany wha sô sêka nda mora omé! ⁴ Punda ola ngê ka fa: nga lêlê Paulu, sô otô ka fa: nga lêlê Apolu. sê na sêka vevia mora omé wha! ⁵ Ngêy anto sa Apolu! sô ngêy sa Paulu! Ná kia ma sê ka kêlê, mora suvisu ma Sun ra kara whã. ⁶ Un kuna, Apolu minha, mazi Dêsu ré fosa. ⁷ Sô né ku ka kuna né ku ka minha na sa né whã kua wha. Mazi Dêsu sô ka zié kula. ⁸ Ayé ku ka kuna sô ku ka minha sa whã, sô kara whã ka tua luku mora suvisu rê popi. ⁹ Punda non sa nkênu ku ka zura Dêsu. Sê sa nga fori sô kay ma Dêsu zi. ¹⁰ Mora gasa Dêsu ma a ran mora whã nkênu ku ta zi kua, un lema, sô otô zi pê riba rê. Mazi ma kara omé ka taté mora ma ê zié pê riba rê, ¹¹ Punda a na ka poy zi otô mora si ê na sa mora ma a lemé ku sa Jizu Kistu. ¹² Ayé si nkênu zi pê riba rê ku ôlô, plata, buru ngavi, pó otô kua ô paya. ¹³ A ka ta suvisu ma kara ngê zi, punda kandja pomonha ka bi musé. Punda a ka bi ta ku fogô: fogô ka bi plapa mora ma kara whã zié. ¹⁴ Si suvisu nkênu fika, yé ka tua pagamentu. ¹⁵ Mazi si suvisu nkênu kema ê ka pêndê. Yé ka sava, mazi mora ma ê skapa ku fôgô. ¹⁶ Sê na ta ma sê sa ngéza Dêsu sô ma Supitu Santu Dêsu ka vevia ku sê wha! ¹⁷ Si nkênu loké ku ngéza Dêsu, Dêsu ka loké kuê. Punda ngéza Dêsu ku sa sê sa santu. ¹⁸ Ma né whã ngê na ka ngané mé wha, si ngê katxi sê ka kunda ma ê ta kua tempu é, ma ê ka bila whã malokô. pa ê bila ka ta kua. ¹⁹ Punda ta kua mundu é sa malokô ra Dêsu. Punda ê sa sisikaru: Ê ka manha supetu kua supêtêza rê. ²⁰ Sô ê ka tô fa: Sun ta ma kua ma sêbêrô ta sa duri. ²¹ Sô na tê whê ra nkênu wha! Punda turu kua é sa ri sê. ²² Ê pô sa Paulu, ô Apolu, ô Sefa, ô mundu, ô vira ô motxi ô kua ayé, ô kua ku sê ka bi. Turê sa ri sê. ²³ sô sê sa ri Kistu, sô Kistu sa ri Dêsu.