¹ Anton, kintú anzú toká tlombétá, hun pia uwã xtlelá d'ôsé ku kê ni télá. Sósó a dé uwã sabí di pôsô di abismú. ² Só ê bili pôsô sé di abismú, só kua subli fumasá ni pôsô mó fumasá di glandji fônô, ku fumasá sê sóló kua ôsé fika´kulú. ³ Nômê fumasá sé xê gafanhôtô bi télá, só inén tavá ku podê mô inén iskópion ku sá télá. ⁴ Sósó a ná dá inén dilêtú di dánifiká plantason nê nadaxi ku sá vêdê fá né flólestá, maxi iná tavá ku dilêtú di fé mali dá tudu ungê ká ná tavá ku xinali di Desú ni testá fá. ⁵ Ná fô plemitidú dá inén pô matá iné ungê sé fá, maxi pá inén pô bi ku suflimentú dá inén anté xinkú meji. Suflimentú sé sá mô, a ká fô modidú ku santópé olá ê ká môdê ungê. ⁶ Ni inén djá sé, inén ungê ká gôlô motxi maxi motxi ná ká bi ni wê dinpé fá. ⁷ Inén gafanhôtô tava ká plasê mô kavalú ku ká sá plépáladú pê pô bá gêlá, Ni libá kabésá diné, táva ku uwã kua mô kólóa di ôlô, ká diné tavá mõ kala ungê. ⁸ Iné tava ku kabélú mõ muwalá, dentxi ku iné tava kuê sá mô dentxi di leon; ⁹ ni glôpô iné tava ku uwã kua ku mô félú, asá ku iné tava kuê olá iné tá ká vuá ká fé mô kavalú ku kaluaji olá ká kôlê bá gêlá. ¹⁰ "E tava ku félon mô vúnvun. ni labú dê ê tavá ku pôdê pê pô fé ugê mali jina xinku mêji. ¹¹ Inen tavá ku alê ni libá dinen ku sá di abismú, ku ká samá ni heblaiku, Abadom, ni glégu, a ká samé Apoliom. ¹² Sósó plumê kidálê vala; sósó ê tê antawo dêsu kidálê ku iskabi. ¹³ Sextú anzu Desú toká tlombétá, sósó hun têndê uwã voji ku bi ni kwatlu pontá di atali ku sá do ôlô, ku sá ni wê Desú. ¹⁴ Sósó voji sé fla dá sextú anzú Désú ku tava ku tlombétá ni môn: "Livlá iné kwatlu anzú ku sá plésú pêtu di ôliô glandji ku ká samá Euflatis." ¹⁵ Isé sá Kwatlu anzú ku tavá plépaladú pá ólá, djá, meji, ku anu, ku ixká xê sôtô pa inén pô matá uwã têsú diné ugnê télá. ¹⁶ Inén kavalelu di tlôpá sá uwã numelú di duzentú milhon. Hun têndê numêlu sé. ¹⁷ Axén, ni vison sé, inen kavalu ku inén kavalelu tavá ku lompá mô félu vlêmê mô fôgô, zulu mô jasintu ku amalélu mô inxonfli. kabesá dinen kavalú sá mô kabesá dinen lion, só ni boká diné tavá ka xê fôgô, ku fumasá ku inxoflinê. ¹⁸ Uwã tésá patxi di populason ni mundu, môlê ku tlexi plagá sé: Fôgô ku fumasá ku inxofli ku xê ni boká dinen, ¹⁹ Pundá pôdê di kavalu tavá ni boka ku labú diné, Sósó labu diné tavá plasê mô koblô, só iné tava ku kabesá ni labu ku tava ka fé mali dá pôvô. ²⁰ Inén ungé ku tava ni télá, ku na môlê plovia plagá sé, inén ná lêpêndê di kwa mali ku inen fé ku môn, inén ná setá di gôgô ku démônô fá né di gôgô ku desú fasu di ôlô, di platá, di bolnzi, nê di budú nê di pó. ku ná ká pô pia, ná ká têndê na ka nda. ²¹ Inen ná lêpendê di tudu motxi ku inen fé, nê baia ku iné bá fé, nê di tudu sexu ku iné fé folá vontê Desú, nê di tudu kua ku iné futá