¹ Zawo kwá sé, un tendê ni ôsé mô uã fotxi vozu di uã glanji multidon, ku ká flá: "Luvadu sejá YAHWEH! Salvason, glolia ku pôdê ká petensê Desú non. ² Zugamentu Dê sá védadêlu, ku zuxtu, pundá ê glanji plostituta ku kolompê télá ku tudu platiká di sexu mali ni télá. Ê tomá vingansá pundá sangi dinen selivu dê, ku plostituta sê bloká". ³ Zawo ni segundu vê, inen flá: "Louvadú sejá Yahweh! Fumasá dê subli dá tudu sémplé". ⁴ Inen vintxi Kwatlu ansion ku inen kwatlu sê vivintxi, vlegá só inen gôgô dá Desú, ku tava setadu ni tlônô, inen fla:" Amém. Louvadú sejá Yahweh"! ⁵ Zawo ê xê uã vozu ni tlônô, ku flá: "Louvadu seja Sumu ku sá Desú non tudu selivi dê, nansê ku ká onlé, piquiná ku glanji". ⁶ Zawo un tendê uã vozu mô glanji mutidon di ungê, mô lujidu di iô awá, mô vozu di tlovon fotxi, ku flá: "Louvadu seja Yahweh! Pundá Sumu, ku sá Tudu Pôdê ká, Lená. ⁷ Non ká leglá, non ká flogá, non ká Dê glolia, Pundá ê sá xigadu Fesá di Kodêlu, Noiva dê sá plepaladu". ⁸ Fô plimitidu ku ê pô bixi lopa di linhu finu, pulu ku ká floli" (Inen linhu finu sé sá inen atu zuxtu dinen santu.) ⁹ Zawo qanzu fáda mu: "xklevê kua sé; Ben ventuladu inen ungê ku sá konvidadu dá fesá di Kodêlu". Ê tembêtê fla: "Isé só sá palavla desú di védé". ¹⁰ Sósó un vlegá pan pô gôgô kuê, sósó ê fla mu: "Ná fé kua sé fá! un sá uã selivi kuma bô ku inén manu bô ku ká mentê testemunhu di Jizú. Gôgô ku Desú, pundá testemunhu di Jizu só sá Suplitu dinen plofetá". ¹¹ Zawo un bê ôsé bétu só un pia, ê tava ku uã kabalu blanku ku uã kavalelu nê ku ká samá Fieli ku Vadadelu. Ê ka zuga ká fé géla ku zuxtisá. ¹² Wê dê sá mô fogo olá ê ka lêdê. ni kabesá dê tê yô diadema ku uã nimi ku sá xklitu ku niuã ungê ká konxê só Ê tan sêbê. ¹³ Ê sá vistidu ku uã mantu ku sá mlakadu ku sangi, nimi dê a ká sama Palavla Desú. ¹⁴ Tudu sôdê d'ôsé tava ni tlaxi Dê ni kabalu blanku, ku lôpa finu, blanku pulú. ¹⁵ Ni boká dê tavá ka xê uã xipadá ku tê fi ku Ê ka fili nason kuê. Ê ka govená inen ku pó di felú só ê ka pisá lagar ku levá di Desú ku tê Tudu Pôdê. ¹⁶ Ê tê uã nomi xklitu ni lôpá Dê ku ni koxá Dê : Alê di alê ku Sumu di sumu. ¹⁷ Un bê uã anzu mujadu, ni sóló, ku tava ká sama tudu bisu d'ôsé, só ê fla: "Bi nansê tudaxi, zuntá dá glanji bankêntê di Desú. ¹⁸ Bi bi kumé kani di inen alê, kani di inen komandatxi, kani di inen ômê di pôdê, kani di kabalu, ku inen kavalelu dê, kani di tudu ungê, inen livli, inen xklavu, inen piquina inen glanji.". ¹⁹ Un bê bestá ku iné alê di télá ku ine sôdê dinen. Inen tava ka plontá pá inen pô ba gela kontla Isé ku sá montadu ni kabalu ku iné tlopá Dê. ²⁰ Bestá sé fô kapituladu, kuê têmbêtê tava falisu plofetá ku tava ka fé xinali ni wê diné. ku xinali sé ê nganá iô ngê ku lêsêbê xinali di besta ku gôgô imagi ku ê fé. Iné dôsu fô lansadu vivu ni lagu ku ká lêdê ku inxofli. ²¹ Ôtlô inen Ê mata ku xipadá dê ku tava ká xê ni boká Dê Sun sé ku sá montadu ni kabalu. Inen bisu d'ôsé fatá ku kani di tudu kadavé sé ku môlê.