¹ Zawo, kua sé, un pia ôtlô anzu, ku ká dêsê d'ôsé, kua tava ku atolidaxi glanji, zó téla fô lijidu ku glolia dê. ² Zawô ê klitá ku uã vozu glaji, só ê flá: "Ê kê! Ê kê Babilônia ku sá glanji! Zawô ê bila kê di demônô, ³ Pundá tudu nanson tá ká bêbê vin dê ku táva ku paxon di kwa ku sá mali. Iné alê di télá fé kua mali zuntu ku ê. Iné ungê di negoxó ku sá télá bilá liku pundá pôdê di mali dê." ⁴ Sósó un têndê ôtlô vozu d'ôsé kua tava ká flá: "Xé dê, pôvô ku sá jimú, pá nansê ná sá klupadu dinen pakadu ku inen fé, pá nansê ná zuntá ni plagá ku sá da inen fá, ⁵ pundá pekadu dinen klesê montxi anté ôsé, só Desú lemblá di tudu platika mali ku inén fé. ⁶ Zawo Ê ka dá inen môdu inen dá ôtlô, inen ká pagá mô inen fê ôtlô; ni kôpu sé ku fé mistulá, zó a ka mistulé ni dôblu dá ê. ⁷ Zawô axén kumá ê gôgô dá ê mé, vivê ni tudu plazê, a ká pô dé ni migidá sé di tlomentu ku suflimentu. Pundá ê ká fla ni klosn dê: 'Un sá setadu mô lainha, ami na sá viuva fá sósó ami ná ká bê suflimentu fá.' ⁸ Zawo, ni uã djá tan, plagá dê ká bi: motxi, tlomentu, ku fomi. Ê ka bá sê kémadu ni fôgô, Pundá Sumu Desú sá Desú di pôdê Êlê só sá Zuxi dê". ⁹ Iné alê ku dumini kuê fé kua kua na ká pô fé fá, fé kua ku iné mêsê kuê, inen ká bá solá, inen ká sufli ni liba dê olá ku inen ká bá pia fumasá ku fôgô nê. ¹⁰ Inen ká kôlê fika distanti, pundá inen ká bi tê mendu di tlomentu, só inen ká bá fla: " kidalê! kidalê! kê babilônia mê ponson glanji, ku ê pôdê! Zawo miôlá sé ê xiká levá Desú libá bô". ¹¹ Inen ungê ku ká fê negoxó nê ká solá ká lamentá dá ê, pundá niuã ungê ná ká pô kompla kua ni poson dê fá: ¹² Kua di ôlô, platá, bubu ku sá plesiôzu, plelula, tesidu finu, tesidu vlêmê ku sá kalu, sedá, eskalata, tudu tipu di po madelá ku ká fé plefumi, tudu kua di mafim, tudu kua di madela kalu, blonzi, kua felu, kua di mamuli, ¹³ kanela, pimentá, mila ku sensu, vin, óliô, fainha finu, tligu, gadu ku ôveia, kabalu ku kalosa dê, inen xklávu, antê salima ungê. ¹⁴ Tudu kua ku bô tava ká tá kuê xá nê ná sen maxi fá, tudu ká xê fô wê bô. Tudu luxu sé ku bêlêzá ê plêdê; nanta bê kua sé maxi fá. ¹⁵ Inen ungê negoxó ku tê ben sé, ku bila liku plômê poson sê, ká mantê distansia pundá mendu di tlomentu, zawo inen ká solá ká lamentá atu. ¹⁶ Iné ka flá: Aiô! Aiô! Glanji ponson sé ku fô vitidu di lôpâ finu, ku tava ôlô, ku budu ku tê valô!" ¹⁷ "Pundá ni uã olá tan, tudu likeza blagá". Tudu pilôtô, tudu maiêlu, ku tudu ungê ku ká tava tlabá ku navegá ni ômali, plêmanêsê distanti. ¹⁸ Inén klamá olá iné bê fumasá ku fôgô. só iné flá: "kwali ponson sá mô poson sé"? ¹⁹ Inen sugá pó ni kabesá só inen klamá, solá ku lamentu: "Aiô! Aiô kê ponson nglanji, anji tudu ungê tava ku vapô dê ni ômali, inén bila liku plômê dê, zawo ni uã olá tan ê fô blagadu". ²⁰ "Gôgô liba dê, ôsé, nansê ku sá santu, apostulu ku plofeta, pundá Desú zugá kausa di nansê ku tava ni ponson sé"! ²¹ Uã anzu ku sá pôdelôzó, pegá uã bubu ku sá di tamanhu di uã glanji bubu ku a ká bê ni moinhu, só ê sugá ni ômali, só ê fla: "Di môdu sé, glanji ponson ku sá Babilônia, ká blagá ku fosá, niuã ungê ná ká bá bê ponson sé maxi fá. ²² Iné tokadô di hapá, kantôlô, iné ku ka toká flautá, inen ku ka toka tlompetxi a ná ká tendê ine maxi fá. Niuã atxi di niuã tipu a ká bê maxi fá ni poson sé. Niuã son di moinhu a ka têndê maxi. ²³ Kandjá di kandjá ná ká luji maxi ni bô. Iné vozu di ingê ku xká kasá na ká têndê maxi ni bô fá, punda inén ungê ku ká fê negoxó bê dinén, inen principe di télá ku tudu nanson fô nganadu pundá kua baia bô. ²⁴ Ni poson sé a kontla sangi di plofeta, dinen santu, ku inen tudu ingê ku molê ni télá".