¹ Inen manu ê, non ku tê ploméssa sé, bamu pulifika di tudu kwa impulu ni klôpô i ni suplitu non. Buka santidaji ni temor di Dêsu. ² Guadá non ni kloson nansê. Non na fé mali nê plovoka danu da n´uwa nguê i non na txila vantagem di n´uwa nguê. ³ Na fla kwa sé di kondena nansê fa, punda um ta fladu kuma nansê sa ni kloson non, pla non pô mólê zuntu i zuzntu vivê. Nga konfia ni kloson nansê, um sa ôrgulhôsu di nansê. ⁴ Um sa chá di konsolason i di aleglia, axem mé ku tudu aflison non. ⁵ Ôla non bi di Masédónia, klôpô non na tinha diskansu fa; só só, non foi tlibuladu di tudu modu: demanda ni patxi lua i temor ni patxi glêntu. ⁶ Maji Dêsu ku ka konfortá desanimadu, ê konflôta non ôla Titu plasé. ⁷ Ê na punda ôla ê plasé ku Dêsu konflôta non fa, maji témbêté plu konflôtu ku ê lêsêbê di nanê. ê fadá non di afeison sé glangi ku nansê tê, sentimentu i pleukupason plôfundu ku nansê tê ku ami: kwa sé mé um legla maxi. ⁸ Andéji mé ku kata mu intlêstê nansê, na ka lêmpêndê fa, andeji um tá lêpêmdidu ôla k´um bê ku ê désa nansê tlisti, antawô ku ê sa uwa momentu. ⁹ Miolé nga lêgla, na sa punda nansé sufli fa, maji punda tlisteza nansê bê ku nansê lêpêndimentu. Nansê xplimentá uwa tlistêza segundu Dêsu, anton, nansê na sufli n´uwa perda plovia di non fa. ¹⁰ Punda tlisteza divia ka bi ku lêpêmdimentu ku ka dá stlavason sê lêmosu; tlistêza di mundu, ka bi ku motxi. ¹¹ Pia mêmê determinason tlistéza plômé di Dêsu plôduzi ni nansê. Foi mêmê determinason nansê di plôva nosensa. Indignason nansê fô glanji, temor, vonté, zelu i deseju di bê justisa fédu. Di tudaxi bô plova sa nonsentxi ni kwa sé. ¹² Anta wô k´um tava sclévê nansê, na sclévê punda malfeitor fa, nê nguê ku sufli mali fa, pla sinsélidadji nansê ku non ka sa konxidu plu nansê ni wê di Dêsu. ¹³ Punda kwa sé, non tê kloson. Alem di plopi konfortu non, non ka lêgla maxi plu alêglia di Titu, punda suplitu dê foi lênovadu plu tudu nansê. ¹⁴ Nga ôrgulha di nansê ni wê dê i na fô vlêgonhosu fa, d´ôtló modu, kuma tudu kwa ku non fla nansê sa vêdê, ôrgulhu non ni wê di Titu plova non kuma ê sa vêdê. ¹⁵ Aféson dê pla nansê sa maxi, témbêté ni mijida ku ku ê ka lêmbla di ôbdiênsia di tudu nansê i di kuma nansê lêsêbê ku temor i tlémor. ¹⁶ Nga lêgla punda um tê konfiansa komplétu ni nansê.