¹ जाहा ईशु तिया वारा चेलान ऐ गोठया आखी पारवाया, ताहा तोअ तिहीने निग्यो आन गालील प्रांतामेने सहेराहांम फिरिन परमेश्वरा हाय गोठया आखीन हिकवा लाग्यो. ² पांयाहाकी वाप्तीस्मा देनारो योहानाल जेलुम कोंडलो आथो, तिही तियाल ख्रिस्ता कामा वोल मालुम पोड्यो, ताहा तियाय तिया चेलाहान ईशुही मोकल्या. ³ तियाहांय तियाल फुच्यो, "जीया ख्रिस्ता आमा वाट जोवताहा तो तुज हाय का, का आमा विहीरा बाट बेअजी "? ⁴ ईशुई तियाहान आख्यो, " जो तुमा उनाताहा आन वेअताहा तो जायन योहानाल आखजा. ⁵ आंदले वे अतेहे, पांगले चालतेहे, कोडले हारे वे अतेहे, बेरे उनातेहे, मोअले माहि जिवते वेअतेहे, गरीब माअहान परमेश्वरा गोठया आखतेहे. ⁶ जो माअहु मा वादल गोठया उनायन मोनाम विहीरा विचार नाहा केअतो तो सुखी हाय." ⁷ ''फांचे ते आगाडी जाहला तांहा ईशुई लोकाहान योहाना बोहल आखा लाग्यो, "तुमा डोगाम काय बेरा गेहला? बारो ओहवे तांहा आलहे तोंअ पाथडो वेरा का ? ⁸ तुमा काय बेरा खातोर गेहेला ? हारम हारो पोतडो पोवलो माअहाल वेराखातोर गेहला का ? हाराम हारे पोवले माही राजा मेहलाम रेतेहे. ⁹ तुमा काहाल डोगाम गेहला ? परमेश्वरा निरप्याल बेरा का? हा, आंय तुमाहान आखहु, "परमेश्वरा वाद निरप्याहांसे तो मोडो हाय." ¹⁰ तिया बोहल एहेकी लेखलो हाय." तो तोअ खातोर बाट तियार फेरि. ¹¹ आय तुमहान खेरोज खाऊहु. इया दुनियाम वाईपेटे जोल्मुलो जो वाप्तीस्मों देनारो योहान इयासे मोडो माहांम केडोज नाहा पेन स्वर्गाम जो वादासे हानो हाय तो तियासे मोडोहाय. ¹² जो वाप्तीस्मो केनारो योहान आधो ती दयाहालने ता आज लुगू स्वर्गा राज्याप आक्रमन वि रियोहो. आन आक्रमन केअनारे ते पेंदी लेते हे. ¹³ काहाका पेहला नेज योहान आलो ताव लुगु परमेश्वरा संदेष्टा आन नियमशास्त्रा या भविष्य आखलो. ¹⁴ जर तुमा ते गोठया माना तियार बोई ता जो आवनारो एलिया तो ओज हाय, ¹⁵ तियाल कान हाय तो उनाय ¹⁶ इ पिढी लोकाहान आय केडा होच एहकी आखु ? जे पोयरे वाजाराम वोहीन तियाहा हेंगात्याहान हात केअतेहे, तियाहां होच इ पिढी हाय. ¹⁷ ते पोयरे आखतेहे, आमाहितुमा खातार खुषी की बाजंत्रे बाजवे जेवी तुमा नाच्या नाहा. आन तुमा खातोर आमाही दुःखा गिते आख्ये तेवी तुमा रोडया नाहा. ¹⁸ योहान कायुज खायन पिइन नाहा आलो तेवी ते आखताहा याल काल्यो पुथ लागलो हाय. ¹⁹ माहा पोयरो खातो पितो आलो इयाखातार लोक आखताहा. "देखा ओ खादाड आन पिड़नारो हाय, ओ करपट्टी उकलावनाराहा आन पापी लोकाहा हेंगात्या हाय, पेन ओखाल आपू कामांहाकी हारो हाय का. माठों हाय, तिया पुरावा देहे." ²⁰ ताहां तिया सेहेराम ईशुई वादाहासे बाद चमत्कार केअला. तिया संहरामने लोकाहांय पासतावो नाहा केअयो इयाखातार तियाहान दोष देदो. ²¹ ओ खोराजिना सेहरामेने लोकाहांय तुमाहान हाय हाय, ओ वेध सैदा सेहेरामने लोकाहांय तुमाहान हाय हाय, काहाका तुमाहाम जे चमत्कार केया ते आय फिनीशीया देशामेने सोर आन सिदोन सेहेरामने लोकाहाम केअतोता. तिहिने लोक ताहाज तुरूतुज डिलापसे फाटले पोतडे वेटाली लिईन, खाआवा ठेराप वोहिन पासतावो केअता. ²² पेन आय तुमाहान आखुहु."न्याया दिनी सोर आन सिदांन सेहेरामने लोकाहान सोपो जाय. ²³ ओ सेहेरा जुग जोतोहो उँचो हाय तोअतो तु उँचो वेरा मागातोहो का ? तु ता पातालाम निचे उती जाहोका ! जे चमत्कार मायुव इही केअया ते जर आंय सदोम सेहेरामने केअतोता. तो आजलुगु टीकी रेतो. ²⁴ आ तुमहान आहु, न्याया हयाहा दिही तुमा से सटोम सेहेरामने लोकाहांन सोपो जाय." ²⁵ फाचे ईशुई ऐहकी प्रार्थना केअहे." ओ परमेश्वर वाहका. जुग आन तारती प्रभु, आय तो आभार मानुहु काहाका तुंयुय ऐ गोठया खुव हिलला आन ओकलीवाला लोकाहांहीने दोवावी थोवीन. तुयुंय जियाहा मान हाना पोयराहा होच हाय तिवाहान देदया. ²⁶ हा ओ वाहका. तुयुय ई खुव हारो केअयो काहाका तुल ई गोमलो. ²⁷ फाचे ईशुई आख्या मां परमेश्वरा वाहकाय वाटोज मान होपी देदला हाय, वाहका सिवाय पोयराल केडोज वोअखुतो नाहा, आन पोयरा पाची केडोज वाहकाल वोअखुतो नाहा, ²⁸ ओ थाकला आन वोजाहाकी दावला लोकाहांय. तुमा आदे माईही आवा. आय तुमहान आराम देहे. ²⁹ आंय नंम्र आन गरीव मोना हाय. तुमा मा जुहरो ली लेजा आन मापने हीकी लेजा ताहा तुमाहान आराम तिली. ³⁰ काहाका मां जुहरो सोपो आन मां बोजो ओलको हाय.