¹ पेन ईशुय तिया वारा चेलाहान तिवाही हाद्या आन तियाय तिईहान पुतडे काडी टाकनु आन बादी जाती रोग दुःख हारे केअनु अधिकार दे दो. ² त्या वारा प्रेषिताहा नावे ई आथे पेअलो शिमोन जियाल पेत्र आखतले तो आन तिया पावुहु अंद्रिया जल्दी पोयरो याकोव आन तिया पावुहु योहान. ³ फिलीप्प वर्शलमय थोमा आन करपट्टी उकलनारो मत्तय अल्फी पोयरा याकोव आन. ⁴ तहय " शिमोन कनानी आन जियाय ईशुल तिई देदलो तो यहूदा इस्कायत. ⁵ ईशुई तिया बारा चेलाहान एहकी आखीन मोकल्यो का, जे माहे परमेश्वराल बोखुते नाहा तियाहाम जाहा मा. आन शमरोनी माहा केल्लाज शेहराम जाहा मा. ⁶ ता इस्त्राएला कुडलामने मेढाहा होच टाकाय गेहला लोकाहाम जा. ⁷ तुमा जाहा ताहा तियाहान ऐहकी आखीन संदेश या, " का होरगा राज पाही आलोहो. ⁸ दुख्याहान हारे केअंजा, मोअलाहान जिवते केओजा, कोडलाहान हारे केओजा, पुतडाहान ओडी काडजा, तुमहान फुकट मिल्योहो ईयाखोतोर तुमाली फुकट देजा. ⁹ तुमा होना चांदी नेता तांवा पोयसा केारामेने पटाम माअ लेता. ¹⁰ आन तुमा जाहा ताहा जे पोवले पोतडे आन पागुमेने चापले तोतेहेज ली जाजा. आजी बिहरी पोतडे चापले पिशवी आन लाकडी ल्याहा मा. काहाका काम केल तिया मोजर मिलीज. ¹¹ तुमा जाहा केल्लावी सेहराम गावाम जाहा ताहा तीही केल्लो माहु हारो हाय ईया होद काङजा आन विहरा गाबुल जावन टाईम आवे तावलुगू तिईयाहीज रेजा. ¹² जाहा तुमा ती कोअमे जाअहा ताहा शांती एहकी आखजा. ¹³ जर ती कोअमेने मसही तो शांती योग्य वेरी ता तुमा नाय बेरी ता तुमा शांती तुमाही फासे फिरि आवी. ¹⁴ आन जो केडो तुमाहान हादे नाय आन तुमा आखल्या गोठया उनाय नाय तहा तियाहा गावामने नेता शहरामने वारे निगाह ताहा तुमा पागालने उदलो पोटकी टाकजा. ¹⁵ आन आय तुमाहान खेरो आखुहु त्या न्याया दिहया दिहि त्या शेहरापेक्षा सदोम आन गमोराल खुव सोपो जाय. ¹⁶ जेहकी तोरसां मिचमे मेढाल मोकलुलो तेहकी आय तुमाहान मोकली रियोहो, ईया खातोर तुमा हापडा होच चतुर आण करता होच चोख मोना वेअजा. ¹⁷ पेन तिया माहाहीने हाचबिन रेजा ते तुमनेहेम न्याय केअनारा लोकहान तीई दी आन तुमनेहन ते भक्ती केअनु जागाप चापकाहाकी ठोकी. ¹⁸ आन तुमा मा चेला हाय ईया खातोर ते तुमनेहेन अधिकारी आन राजा हुंवुर लि जाय. आन तुमा तियाहा आगला आन विहिरी माअहा आगला मा वोद्दल साक्षी आखाहा. ¹⁹ जाहा तुमहान तिई देवृलाम आबि ताहा काय गोगु आन केहकी गोगु या चिंता मा केराहा. काहाका तुमा काय गोगा जोजे तो तुमनेहेन ताहाज होमजाय जाय. ²⁰ काहाका गोगनारा तुमा नाहा पेन तुमा परमेश्वर वाहका आत्मो तुमहाम रिईन गोगी. ²¹ पाबहु पावाहा विरूध्द आन वाहको कतिया पोयरा विरूध्द उठीन मांय टाकाखातार विहिरा लोकाहा होपो दी पोयरें बाहाकी आन वाहका विरूध्द उठीन तियाहान माय टाकावी. ²² मा नावा खातोर वादा लोक तुमा विरूध्द करी पेन शेवटीवलुग जो विश्वासाम टिकी रिई तो वाचाय जाय. ²³ एका गावाम तुमाहान जाहां तारास दी ताहा तुमा विहिरा गांवाम नाही जाजा, आंय तुमाहान खेरोज आखहुं, माअहा पोयरो फाचें आवहें ताबलुगु इस्त्राएल देशामेने गांवाहांम तुमा फिरी नांव पारवानारा. ²⁴ " चेलो तिया गुरूसे मोडो नाहा, आन आवायो तिया मालकासे मोडो नाहा. ²⁵ चेलो तिया गुरू हो वेरांज जोजे. मालिकाल तियाहाय बालजबुल एहेंकी आख्याता तिया कोअने बिहिरा माअहान ते केहेंकी नाय आखनारा ! ²⁶ तुमा तियाहान वियाहा मा. काहाका उगडो नाय वे एहन्डो कायुज बुजलो नाहा हाय. आन मालुम नय पोडे एहन्डो काविहीज दोवलो नाहा. ²⁷ जो आय तुमाहान आंदाराम आखहु तोअ तुमा उजबाडाम आखजा आन जो तुमा कानाहांकी उनाताहा, तोंअ तुमा उँचा जागावे उनी रिईन आखजा. ²⁸ जे लोक शरिराल माय टाकताहा पेन आत्माल माहा नाहा सेकता तियाहान वियाहा माअ. तियाहासे जो परमेश्वरा आत्माल आन शरिरल नासकी सेकहे, तियाल बिड़जा. ²⁹ वेन चिडे एका रूप्या वेचतेहे का नाय ? ते बी तुमा परमेश्वरा वाहका मोरजीवाची तियामेने एक वी चिडो तोरतीवे टुटी नाहा पोडतो. ³⁰ आन तुमा मुनकापेने चोअट्टो बी मोजले हाय. '' ³¹ खुप चिडाहासे तुमा किंमती हाय. इयाखतोर बीयाहा मा. ³² जो केडो वी मान माअहा आगला मानी ली तियाल आय बी मा होरगामने वाहका हुंबुर मानी लेहे. ³³ पेन जो केडो वी मान माअहा हुंबुर माने नाव तियाल बी आय मा होरगामने वाहका हुंवुर नाय बोअखु. ³⁴ तुमा एहकी मा होमजा हा का माय तोरतीप शांती लीन आलोहो. आय शांती पÎस्थापीत केरा नाहा पेन आय तारवा चालवा आलोहो. ³⁵ आय एकी कोअने माअहान जुदे जुदे केराखातार आलोहो. पोयराल तिया वाहका विरूध्द. पायरिल तियो वाहकी विरूध्द बोबडील तीयु हावडी विरूध्द केरावा खातोर आलोहो. ³⁶ सोवताहा कोअनेज माअहे तिया दुष्मन वीजाय. ³⁷ जो केडो मांसे तिया याहकी आन बाहको बाद मोया केअहे. तोअ मां खातोर काबिज काम्यो नाहा. आन तेहकीज जो केअडो मा से बाद तियाहा पोयराप आन पोयरिप बाद मोया केअहे तो मा खातार कायज काम्यो नाहा. ³⁸ जो केडो सोबताहा क्रुसखांव निईन मा फाचाडी आवतो नाहा, तो मा खातार काबिज काम्यो नाहा. ³⁹ जो केअडो सोवताहा जीव वाचावेहे तोअ तिया जिव गोमावी, पेन जो मा खातार जीव गोसावी तो तिया जिव वाचवी ली. ⁴⁰ जो माहु तुमाहाल मानी लेहे तो मान मानी लेहे, आन जो मान मानी लेहे तोअ तिया परमेश्वरा वाहाकाय मान मोकल्याहो तियाल मानी लेहे. ⁴¹ जो केडो परमेश्वरा निरोप्याल, परमेश्वरा निरोप्यो हाय एहकी जायन मानीली, तियाल परमेश्वरा निरोप्या फल तिली, तियाल धर्मा माअहाल फल मिली. ⁴² आंय तुम्हाल खेरीज आखहु, केडो वी ईया हानाम हानाल मां चेलो हाय एहेंकी जायन एकुज गिलास पांय पाजी तेवी तियाल तिया फल नक्कीज मिली."