¹ जाहा ईशु आन तिया वारा चेला शव्वाथ दिही एका खेतामने जाहला. तांहा तिया चेलाहान पुख लागी आन ते खेतामने कोअहे तोडीन खां लाग्या. ² तो विईन यहुदी जाती लोकाहामने परूशी लोक तियाल आखा लाग्या, " देख शव्वथ दिही जो नाय केरा जोजे तोअज तो चेला की रिवाहा. ³ तियांय तियाहांन फुच्या; दाविद राजाल आन तिया आरी माहीं आथे तियाहांन पुख लागली तियाय काय केअला ? इ तुमांहाय शास्त्राम नाहा वाच्यो का ? ⁴ तो परमेश्वरा मंदीराम गियो आन मंदीन अर्पन केला मांडो जो याजका शिवाय केडालुज खावुलो अधिकार नाव आधा त्या तियाही केहकी खाद्या. ⁵ तुमाहाय नाहा वाच्या का, शव्वाथ दिया दिही मंदिराम सेवा केअनारो याजक मंदिराम काम केअहे, तो नियम तोडहे ते वी तोअ केहेंकी दोषी नाहा रेतों. ⁶ पेन आय तुमहान आखुहु मंदिरासेवी मोडाम मांडो हाय तो ईही हाय. ⁷ शास्त्राम लेखलो हाय. मान अर्पन नाय (जनावरे माअवीन तिया रोगांत पाडुलाकी मान खुशी नाहा मिलती) पेन मान दया गोमेहे. ईवा अर्थ तुमा होमजी लेताता. तियाहा चुक नाहा तियाहा हारा लोकाहान दोष नाय लागवुता. ⁸ काहका माअहा पायरो शव्वाथ दिहया वी प्रभु हाय. ⁹ फांचे ईशुई तिहीने निगीन यहुदी लोकाहा भक्ती कॅनु पाँगाम गियो. ¹⁰ तिही एक आअहु आथो तिया आथ हुकाय गिहिलो आथो. ताहा यहुदीलोक ईशुल चुकीम सापडावा खातार तियाल फुचताला? दुःखी माहाल शव्वाथ दिया दिही हारो केअनु इ नियमाहाकी हारो हाय का नाहा ?" ¹¹ ईशुई तियाहान आख्या. तुमाहावेने केडाप वी एकुज मेंढा हाय आन शव्वाथ दिया दिही तो खाडांम पोडी गियो ता, तुमा तियाल खाडांमने वारे नाय काडाका. ¹² मेंढा से वी माअद्दु कोओतावी किंमती हाय, तियाहाल दुःखी माहाल शव्वाथ दिया दिही हारो केअनु नियमशास्त्र परवानगी देहे." ¹³ फाचे ईशुई आथ लांवो केअ; तियाय तोअ आथ लांवो केअयो ताहा तिया विहीरा आथा होच ओ आथ वी एकदम हारो बी गिया. ¹⁴ ताहा परूशी लोक वारे जायन ईशुल केहेकी माय टाकूहु इया वद्दल तिया तियाहांज ठाकज विचार केरा लाग्या. ¹⁵ परूशी लोक काय वी रिया इ ईशुल मालुम आथो, तियाखातोरे तोअ भक्ती केअनू पाँगामेने निंगीन जाहलो ताहा खुवुज लोक दुःखी आधा तिवाहान तियाय हारे केअये. ¹⁶ आन तियाय तियाहान हारकी होमजावीन आख्यो, तुमा मा वादल गोठया विहिरान मा आखाहा. ¹⁷ परमेश्वरा निरप्या यशया की जो वचन आखलो आथो. तोअ पुरो वेरा खातोर एहकी आख्यो. ¹⁸ '' देखा ओ मा सेवक झ्याल मायुय निवडूला हाय, आय इयावे माया किअहु. इयाकी आय खुश हाय, आय मा तियावे मोकलेहे, तोअ दुन्यामेने लोकाहान परमेश्वरा न्याया गोठया आखी. ¹⁹ तोअ केडआरी चुलानोरो नाय. वॉवलुनारो नाय, तिया आवज वाटिपने माअहे उनायनारे नाय. ²⁰ तोअ न्यायाल हारी ली तांबलुग. वुरू काठकी मुडनारी नाय. आन वाय वोलनारा दिवाल ओलवुनारो नांय. ²¹ विहरे माहे तीयाप आशा थोवी. ईशुप जो सामर्थ हाय तो परमेश्वरापणे हाय. ²² ताहा लोक एका माआहाल ईशुही ली आला. तियाल पुतडाय आंधलो आन मुको केअलो. तिवाल हारो केअयो ताहा तो गोगा आन वेरा लाग्यो. ²³ तो विईन वादा लोकाहान नांवाय लागी ते आखां लाग्या, " दाविदा जातीमेने जिया आपु वाट जोवताहा तो ख्रिस्त ओज नाय का?" ²⁴ लोक ऐहकी आखताला तो उनायन परूशी लोक आखा लाग्या काल्योपुत (वालजवुल) पुतडाहा मोडो अधिकारी हाय, तिया आधाराकी ईशु पुतडे काडी टाकेहे. " ²⁵ ताहा तियाल विचार जाय लिईन तियांय तियाहान आख्यो, केललो वी फुट पोडली राज्य उजाड वी जाहे आन केललो वी फुट पोडलो सेहेर नेता पोंगा टिकतो ²⁶ आन जर काल्यापुत पुतडाहांन काडी टाकहेता. तीया तियाहांमुत विरोध वी जाणारि फाचे तियाहा राज केंहकी टिकणारो. ²⁷ आय 'काल्यापुता अधिकारांकी पुतडे काडी टाकुहुता. तुमा पोयरे केंडा आधाराकी पुतड काडते हैं? इयाकी तुमा लोकुज तुमा चुक्या काडी. ²⁸ पेन आय परमेश्वरा आत्माकी पुतडे काउहुंता परमेश्वरा राज तुमाही आवी गियोहो इ नक्कीज होमजी लेजा. ²⁹ तेहकज केडो वी केलला वी पेलवान (सोकतीवाला माअहा) कोअ चोरी केरां गियांता, पंअला तिया पेलवानाल वांदी टाक पोडनारो ताहाज तोअ तिही चोरी की सेकनारो. ³⁰ जो केडो वीमा आरी नाहा तोअ मा विरूध्द हाय, आन जो केडो वीमा आरी हेंगलावतो नाहा तोअ खागा वागा केअनारो हाय. ³¹ इया खातार आंय तुमाहांन आखहु, मांअहु वादी जाती पाप आन निंदा केरी तिया माफी मिली पेन पवित्र आत्मा विरूध्द जो माअंहु निंदा केरी तिवाल माफी नांय मिलनारी. ³² एगदो माअहां पोयरा (मा) विरूध्द निंदा केरी तियाल तिया माफी मिली जाय, पेन केडो वी पवित्र आत्मा विरूध्द निंदा केरी तियाल तिया माफी नाय मिलणार या युगावी नाही आन आवनारा युगाम बी नाहा. ³³ हारा चाडवा हारो फल, माठा चाडवा माठों फल एहेंकी तुमा चाडो हारो केअरा काहाका चाड तिया फलापेने ओअखायेहे. ³⁴ ओ हापा पिलकाहांय, तुमा खोडा हायता हाच्या गोठया केहंकी आखी सेकनारा? जो मोनाम पोअलो हाय मुवावाटे निंगहे. ³⁵ हारो माअहु मोनामने हाच्या गोठया का अहेडे. आन खोटो माअहु, तिया खोटा मोनामेने खोटया काडहे. ³⁶ आजी आय तुमाहांन आखंहु का केलाले वी माअहु जे खोटया गोठवा गोगी. तिया हिसाव तियाल न्याया दिही दां पोडी. ³⁷ काहाका तु तो गोगुलापेन निर्दोष होमजावह आन तु तो गोगुलापणेज दोषी वी होमजाव. ³⁸ जाहा शास्त्री आन परूशी लोकहाय ईशुल आख्या, " ओ गुरू, तु ख्रिस्त हाय तियाल आमाहांन पुरावा देखाव." ³⁹ ताहा तियांय तियाहान आख्यो, "इया पिठी खेटा आन परमेश्वरा आरी तियाहां संवध हारो नाहा एहेंडा लोक चतत्काराकी पुरावा मागताहा, पेन तियाहान परमेश्व निरोप्यो योना निशाणी शिवाय, विहिरी निशाणी देता नाय आवणारि. ⁴⁰ योना जेकी तीन दिही आन तीन रात मांडा मासा डेडीम आथो तेहकीज, मरअहर पायरो (आय) वी तारती देडीम तीन रात आन तीन दिही रहे. ⁴¹ परमेश्वर जाहा इ दुनिया न्याय केरि. ताहा निनवे सेहरा माहि उठीन तुमा विरूध्दाम गोगी ते तुमनेहेन दोष लागावी काहाका योना आखल्या गोठ्या मानीन तियाहाय पश्चताप कीन मोन फिराव्या. पेन आमी तुमाहाम योना से वी मोडो केडो तेवी हाय. ⁴² न्याया दिही शवा राणी इयां पिठी लोकाहां आरी उठीन इयाहा विरोधाम गोगी.काहाका शलमोन राजा ओकली गोठया उनाय खातार ती तोरती शेवटया सेडहिंन आलली. देखा, इही जो हाय तो शलमोना से वी मांडो हाय. ⁴³ पेन जाहां दृष्ट आत्मो माअहामेने वारे निंगी जाहे. ताहां तो जिही पाय नाहा रेतो एहेंडा जागाहांम आरामा जागो होदतो फिरहे जागो तियाल मिलतो नाहा. ⁴⁴ ताहा दृष्ट आत्मों आखहे, जिहीने आय निंगी आलोहा, तिहीज मा कोअमें आय फाचे जाहाय, जाहा तिही तो आलो ताहा. तो पाँगो तियाल हारो साफसुफ केअलो, रिकामा आन सोवतो केअलो देखायो. ⁴⁵ फाचे तो वारे निंग्यो आन तीवासे वी खाराव एहंडे सात पुतडें आरी ली आलो. आन ते वादा आविन तिया माअहांम रेतहां तांहा तिया माअहा दशा पेअला से खुवुखाराव वी जाहे. तेहकीज इयो खोटी पिठी वेरि. ⁴⁶ ईशु लोकहान गोठया आखतोलो ताहा तिया याहकी आन पावहु तियाआरी गांठया केराखातार आललें, ते वारे रेअले आथें, ⁴⁷ ताहा केडाय तेवी तिवसाहान आख्यों तो याहकी आन पावहु आरी गोठया केरा खातारे वारे इवले हाय, " ⁴⁸ पेन तियाय तियाल आख्यो; केळी हाय मा याहकी ? ⁴⁹ फाचे तियाय तिया चेलाहांवेल आय आगाडी किइन आख्यो," देख मा याहकी आन पावहु इंज हाय. ⁵⁰ काहाका जो केडो मां होरगामेने परमेश्वरा वाहका मोरजीकी चालेहे तोज मां पावहु, मां बोअही आन मा याहकी हाय, "