¹ Nielah pokok utamo pemboekkon kite : kite mempunyoi Imam Godong nyo duduk de sebelah kanon tahta Nyo Mahatinggi de serga. ² Enye melayoni de ruang Mahakudus ngan de kemah suci sejati nyo de togokko ule Allah dewek, bukon ule mendesio. ³ Ule setiap imam godong de tunjuk untok mempersembahko pemborian ngan kurban, mengka Imam Godong nie jugo arus mengunda sesuatu untok de persembahko. ⁴ Munye Imam Godong nie hidop de behumi, Enye hopi bakal menjedi imam samo sekali sabab de behumi sodah ado imam-imam nyo mempersembahko pemborian sesuai Hukom Torat, ⁵ Yaitu mike nyo beribadah menurut tiruon ngan bayang-bayang deri hal-hal sergawi upa tekalo Allah memperingotko Musa tekalo enye hendak menogokko kemas suci : " Pastikolah kowe membuat segelo sesuatunye sesuai dngan rancangon nyo lah kutunjukko kenempat me de pucuk gunong." ⁶ Cuma, Kinie, Yesus menerimo tugas pelayonon nyo jouh lobih mulia ule perjenjion beheru nyo de perantarai ule-Nye iye jugo jouh lobih tinggi ngan detetapko berdasarko pado jenji-jenji nyo lobeh beik. ⁷ Sabab, munye perjenjion nyo pertamo hopi mengandung kesalahon, hopi nak ado nyo membutuhko perjenjion nyo keduo. ⁸ Ulenyo Allah mendepoti kesalahon mendesio, Enye boek, "koleklah, saatnye bakal sampoi, ujo Tuhan, tekalo Ake nak mengadako sebuah perjenjion beheru ngan kaum Israel ngan kaum Yehuda. ⁹ Hopi upa perjenjion nyo lah Kuadako ngan nenek moyang mike, nyoiye tekalo ake menunton mike ngan tangon-Ke untok memimpen mike keluor jak tanoh mesir. Ulenyo mike hopi setia pado perjenjion nyo kuboriko, mako Ake hopi memeduliko mike, ujo Tuhan. ¹⁰ Nielah perjenjion nyo bakal Kuadako ngan kaum Israel setelah masa iye, ujo tuhan: Ake bakal menaruh hukom-hukom-ke delom pikiron mike, ngan Ake bakal menuliskonye pado hati mike. Ake bakal menjedi Allah mike, ngan mike bakal menjedi murid-Ke. ¹¹ Mike jugo hopi bakal lagi mengajor sesamo bengesonye atau dolornye ngan boek, Kenallah Tuhan ulenyo segelo urang bakal mengenal Ake, jak nyo kecik sampoi nyo paling godong. ¹² Sabab, Ake bakal berbelas kasihan atas pelanggaron ngan doso-doso mike. Ngan, Ake pun hopi bakal lagi mengingot kesalahon-kesalahon mike." ¹³ Tekaloh Allah mengucapko perjenjion beheru, Nye membuat perjenjion nyo lamo hopi berlaku lagi. Ngan, ape nyo sudah hopi berlaku lagi ngan usang bakal segera lenyap