¹ Sabab, Melkisedek, Rajo Salem ngan imam Allah Nyo Mahatinggi, menomui Abraham lah Abraham belel deri membantai rajo-rajo, ngan memberkatinye. ² Kenempat Melkisedek, Abraham jugo Memboriko sepersepuluh deri segelo reto ramposon nyo de perulehnye. Pertamo-tamo, namo Melkisedek retinye, " Rajo kebonoron", Selanjutnye, " Rajo Salem" nyo retinye " Rajo Damai ". ³ Enye hopi be bepak atau be induk, hopi besilsiloh, ngan hidopnye hopi beaol atau beaher. Cuma hambuk, upa Anak Allah, enye bakal menjedi imam untok selamo-lamonye. ⁴ Perhatikolah, betapa agungnye urang nie, bahkan Abraham leluhor kite pun menyerahko kenempatnye sepersepuluh deri segelo hasel ramposon perangnye. ⁵ Menurut Hukom Torat, anak-anak Lewi nyo menerimo jabaton imam behak mngumpulko persepuluhon deri umat nyo adolah dulur-dulur mike, waloupun mike samo-samo keturunon Abraham. ⁶ Cuma, Melkisedek nyo hopi deri keturunon Lewi, menerimo persepuluhon deri Abraham ngan memberkati enye nyo memogong jenji-jenji Allah. ⁷ Ngan, hopi depot de sangkol, nyo lobih rendah de berkati uleh nyo lobih tinggi. ⁸ Delom sikuk hal, persepuluhon de terimo ule mendesio fana nyo pacok te'elek. Cuma, delom tong nie, deterimo ule enye, nyo depastiko hidop. ⁹ Ulehnyo iye, depot dekehatoko behwo kaum Lewi nyo behak menerimo persepuluhon pun jugo membayar persepuluhon mike melalui Abraham, ¹⁰ Sabab tekalo Melkisedek menomuinye, Lewi lage ado delom badan nenek puyangme. ¹¹ Kinie, munye ksempurnaon pacok de capai melalui keimanan Lewi ( Nyo ulenyo, umat Israel memperoleh Hukom Torat ), untok ape ado imam loin nyo arus de bangketko menurut aturon Melkisedek, ngan bukon imam deri garis keturunon Harun ? ¹² Sabab, munye aturon keimaman beubah, mengka hukom Torat pun arus de ubah. ¹³ Urang nyo sedang kite buikko nie berasol deri suku nyo loin, ngan hopi ado seurang pun deri suku-Nye nyo perenah betugas sebage pelayon altar. ¹⁴ Sabab, sodah jelas behwo Tuhan kite berasol deri suku Yehuda, suku nyo tentangnye Musa hopi perenah ngehatoko hal ape pun nyo bekaitan dengan padong imam. ¹⁵ Segelo tong nie menjedi semakin jelas tekalo kite ngoleh munculnye seurang Imam loin, nyo mirip dengan Melkisedek, ¹⁶ Nyo menjedi imam bukon bedasarko persyaraton kturunon jasmani, hambuk berdasarko kuaso khidupon nyo hopi depot binaso. ¹⁷ Sabab, Kitan Suci bersaksi tentang Enye : " Kowe adolah Imam untok selamo-lamonye, menurut peraturon Melkisedek." ¹⁸ De sikuk sisi, peraturon nyo bilek sodah beraher ul memiliki kelamahon ngan hopi beguna, ¹⁹ Ngan uleh hukom iye hopi menyempurnako ape pun. Cuma, de sisi nyo loin, ado pengharopon nyo lobih beik nyo de perkenalko kenempat kite, ngan pengharapon iye menarek kite untok memaroki kenempat Allah. ²⁰ Ngan ule pengharapon iye de unda kenempat kite dengan sebuah sumpah- imam nyo loin menjedi imam hopi de sertai sumpau. ²¹ Cuma, enye menjedi imam dengan sumpah nyo de buat ule Enye nyo buik kenempat-Nye, " Tuhann lah besumpah ngan Enye hopi bakal beubah pekeron : ' Kowe adolah Imam untok selamo-lamonye."Mazmur 110:4 ²² Ule sumpah nie, Yesus lah menjedi jaminon deri perjenjion nyo lobih beik. ²³ Sebolumnye, ado lobot imam sehingga tekalo ado imam nyo te'elek, ado nyo depot menggantikonye. ²⁴ Cuma, Yesus memogong keimanan secaro tetap selamonye ule Enye bakal terus hidop selamonye. ²⁵ Munye upa iye, Yesus depot menyelamatko dengan sempurna mike nyo njongok kenempat Allah melalui-Ny, ulh Enye selalu hidop untok bedoa bage mike. ²⁶ Imam Godong upa iylah nyo kite butuhko, yaitu Imam Godong nyo kudus, hopi becela, murni, de pisahko deri urang-urang bedoso, ngan de tinggiko melobihi tingkat-tingkat sergawi. ²⁷ Yesus hopi upa padong imam godong nyo loin. Mike arus mempersembahko kurban setiap ari, pertamo bage doso mike dewek, mengka bage doso-doso umat. Cuma, Yesus hopi perelu melakukonye. Enye anyo mempersembahko kurban sekali untok selamonye, yaitu badan-Nye dewek. ²⁸ Hukom Musa menetapko mendesio nyo ponuh kelamahon untok menjedi imam-imam godong. Cuma hambuk, sumpah nyo berasol deri Allah, nyo njongok lah hukom Musa, nyo lah dejediko sempurna sampoi selamo-lamonye.