¹ Ulenyo iye, maro kite tinggalko pngajaron dasar tentang Kristus ngan melangkoh kenempat kedewasaon, hopi lage mengulang-ngulang ajoron dasar tentang pertubaton deri perbuaton nyo te'elek ngan iman kepodo Allah; ² Ajoron tentang pembasuhon ngan penumpangon tangon; ajoron tentang kebangketon urang te'elek ngan hukumon kekal. ³ Ngan, iyelah nyo bakal kite lakuko, munye Allah mengizinkonye. ⁴ Sabab, hopi mungkin mempertubatko belek urang-urang nyo sebolumnye lah mendepotko pencerahon, lah merasako karunia sergawi, lah mengambik bageon serompok Roh Kudus, ⁵ Mengicapi kebeikon firman Allah, ngan merasako kuaso deri denia nyo bakal njongok. ⁶ Munye mike meninggalko jelon Kristus, mengka mustahil untok memperbarui belek pertubaton mike ule mike sedang menyalibko Anak Allah untok nyo kedua kalinye ngan mempermaluko-Nye secaro tebuka. ⁷ Sabab, tanoh nyo menyerap lobot aek hujan nyo titek de pucuk nye, serta menghaselko panenan nyo bemanfaat bage mike nyo menggarapnye, bakal menerimo berkat deri Allah. ⁸ Cuma, munye tanoh iye anyo menumbuhko unok ngan somok-somok, mengka tanoh iye hopi beguna ngan parok dengan kutuk, ngan podo ahernye de tunu. ⁹ Cuma hambuk, dulur-dulurke nyo kukasehi, sekalipun kamie buik upa nio, kamie meyakini hal-hal nyo lobih beik tentang kowe, yaitu hal-hal nyo behubungon dengan keselamaton. ¹⁰ Sabab, Allah bukon hopi adel. Enye hopi melupako segelo pekerejaon ngan kasihme nyo kowe tunjukko demi namo-Nye dengan melayani urang-urang kudus upa nyo maseh kowe lakuko. ¹¹ Kowe ndelok maseng-maseng kowe menunjukko ketekunon nyo samo untok memiliki janinon pengharapon nyo sempurna sampoi aher, ¹² Enggak konye kowe jengon menjedi penyogon, hambuk mehalui teladan urang-urang nyo lah mewarisi jenji-jenji Allah melalui iman ngan ketekunon. ¹³ Tekalo Allah bejenji kenempat Abraham, Enye bejenji pucuk badan-Nye dewek ule hopi ado nyo lobih godong deripodo badan-Nye. ¹⁴ Allah buik, " Ake pasti bakal memberkatime," ngan " Ake pasti bakal melipotgandako keturunanme." ¹⁵ Ngan, lah menantiko dengan sabar, Abraham menerimo jenji iye. ¹⁶ Mendesio besumpah demi seseurang nyo lobih godong deripodo badanye dewek, ngan sumpah deboriko sebagai penegason untok mengaheri segelo perbentohon. ¹⁷ Jedi, tekalo Allah amat menunjukko dengan lobih meyakinko kenempat ahli waris jenji-Nye behwo tujuan-Nye hopi bakal beubah, Enye menjamin dengan membuat sumpah ¹⁸ Sehinggo dengan dua hal nyo hopi depot beubah iye, nyo mengenainye Allah mustahil pelato, kite nyo njongok dalak perlindungon bakal mendepotko dorongan nyo godong untok bepogong toguh podo pengharapon nyo deboriko kenempat kite. ¹⁹ Pengharopon nyo kite miliki nie adolah jangkar bage jiwo kite, kuat ngan pesti, nyo menombus masuk sampoi ke balik tirai, ²⁰ Kenempat nyo lah de masuki Yesus sebage pembuka jelon bage kite untok menjedi Imam Godong untok selamo-lamonye, sesuai dengan peraturon Melkisedek.