¹ Sabab, setiap imam godong nyo de peleh deri antaro mendesio de tunjuk untok menjedi wakel mendesio delom hal-hal nyo berkenaan dengan Allah, enggakkonyo enye depot mempersembahko persembahon-persembahon ngan kurban-kurban pucuk doso-doso. ² Ulenyo imam godong jugo ponuh dengan kelamahon, mengka enye jugo depot besikap lombut terhadop urang-urang nyo hopi memiliki pengetahuon ngan mudah tesosot. ³ Iye sababnye, enye wajib mempersembahko kurban penghapuson doso, bukon anyo untok umat, hambuk jugo untok badannye dewek. ⁴ Hopi ado imam godong nyo depot mengambek kehormaton nie untok badannye dewek, enye anyo menerimonye tekalo enye de pantou ule Allah, upa halnye Harun. ⁵ Demikion jugo Kristus hopi memuliako badan-Nye dewek untok menjedi seurang Imam Godong, hambuk ule Enye nyo buik kenempat-Nye, " Kowe adolah Anak-Ke. Podo ari nie Ake lah menjedi Bepa-Me." Mazmur 2:7 ⁶ De bageon loin enye jugo buik," Kowe adolah Imam untok selamo-lamonye, menurut peraturon Melkisedek." Mazmur 110:4 ⁷ Delom hidopnye sebage mendesio, Yesus mempersembahko doa maupun permohonan dengan ratopon ngan aek mato, kenempat Enye nyo depot menyelamatko-Nye deri kemation. Ngan, enye de dongor ulenyo kesalehon-Nye. ⁸ Walaupun Yesus adolah Anak, hambuk Nye belajor untok taat melalui penderitaon nyo de alami-Nye. ⁹ Dengan lah de sempurnako, Nye menjedi sumber keselamaton kekal bage segelo urang nyo taat kenempat-Nye, ¹⁰ Ngan Nye lah de pantaou ule Allah sebage Imam Godong sesuai peraturon Melkisedek. ( Bejelon Menuju Kedewasaon Rohani ) ¹¹ Ado lobot nyo depot de kehatoko tantang hal nie. Cuma hambuk, sulet untok menjelaskonye ulenyo kowe sodah menjedi lamban untok mendongor. ¹² Sabab, sekalipun saat nie kowe searusnye sodah menjedi pengajor, hambuk ternyato kowe lage membutuhko seseurang untok mengajorime lage tentang prensep-prensep dasar firman Allah. Kowe lage membutuhko susu, bukon makonon nyo padat. ¹³ Sabab, urang nyo hidop deri susu adolah urang nyo bolum bepengalaman delom memami ajaron tentang kebonoron, enye lage abong. ¹⁴ Cuma hambuk, makonon padat adolah untok urang-urang nyo sudah desawa, yaitu mike nyo sodah melateh indera mike untuk membedako ape nyo beik ngan nyo jahat.