( Jenji Untok Masuk Kenempat Perhention Allah ) ¹ Ulenyo iye, selamo jenji untok masuk ketempat perhention-Nye lage belaku, biarlah kite meraso takut, munye mumunye ado de antaro kite nyo gagal mendepotko jenji iye. ² Memang bonor, kabar beik lah de beritako kenempat kite, upa jugo lah de beritako kenempat mike, hambuk berita nyo mike dongor iye hopi menguntungko mike ulenyo hopi de satuko dengan iman urang-urang nyo mendongornye. ³ Ulenyo kite nyo pecayo, bakal masuk ketempat perhention iye, upa nyo de kehatoko-Nye," Ake besumpah delom amaroh-Ke:" mike hopi bakal perenah masuk ketempat perhention-Ke," Mazmur 95:11 mengka pekerejaon Allah sodah selesai sejak penciptaon dasar denie nie. ⁴ Sabab, delom sebuah nas, Allah buik upanio tentang ari ketujuh, " Podo ari ketujuh, Allah berenti deri segelo pekerejaon-Nye." ⁵ Cuma hambuk, upa nyo lah de kehatoko Allah," Mike hopi bakal masuk ketempat perhention-Ke." ⁶ Jedi, lage ado kemungkinon untok sebageon urang masuk ketempat perhention, ngan ado sebageon urang nyo sebolumnye lah mendongor kabar beik, hambuk gagal masuk ulenyo kehopitaatan mike. ⁷ Jedi, sekali lage Allah menetapko sikuk ari tertentu, nyo de sobut " sari nie", nyo lah de kehatoko Daud jouh hari sebolumnye," podo sari nie, munye kowe mendongor suaro-Nye, jengonlah karasko hatime upa delom pemberontakkon."Mazmur 95:7-8 ⁸ Sabab, Munye Yosua sodah membori mike tempat perhention, mengka Allah hopi bakal lage buik tentang suatu ari loin de kemudion ari. ⁹ Munye upanio, mengka lage ado perhention podo ari sabat untok umat Allah. ¹⁰ Untok mike nyo lah masuk ketempat perhention Allah, mike jugo lah beristirahat deri pekerejaonnye, upa nyo Allah lakuko deri pekerejaon-Nye. ¹¹ Ulenyo iye, marolah kite bejuang untok masuk ketempat perhention iye, sehingga pi seurang pun titek ulenyo mehilui contoh kehopitaatan nyo samo. ¹² Sabab, firman Allah iye hidop ngan bekuaso, ngan lobeh tajam deripodo pedang bemato dua mone pun. Firman iye menusuk jouh sampoi memisahko jiwa ngan roh, antaro sendi ngan tulang sumsum, sereta sanggup menilai pekeron ngan kehendak hati kite. ¹³ Hopi ado suatu mahluk pun nyo tekerawo deri pengolehon-Nye. Sebeleknye, segelo sesuatu telanjong ngan pi tekerawo deri mato-Nye. Kenempat-Nyelah kite arus membori pertanggungjawabon pucuk segelo nyo kite lakuko. ¹⁴ Ulenyo iye kite mempunyoi Imam Godong Agung nyo sodah noek ke serga, yitu Yesus, Anak Allah, marolah kite torus bepogong toguh podo pengakuon kite. ¹⁵ Sabab, kite hopi memiliki Imam Godong nyo hopi depot memahami kelamahon-kelamahon kite, hambuk kite memiliki Imam Godong nyolah de cuboi delom segelo hal, samo upa kite, hambuk enye hopi bedoso. ¹⁶ Ulenyo iye, dengan keyakinon, marolah kite njongok menghamperi tahta anugerah enggakkonyo kite menerimo belos tesihan ngan menomuko anugerah untok menolong kite, tekalo kite membutuhkonye.