( Yesus Lobeh Godong deripodo Musa ) ¹ Ulenyo iye, dulur-dulur nyo kudus, kowe nyo memiliki bageon delom pantouan sergawi, kolehlah Yesus Sang Rosul ngan Imam Godong pengakuon kite. ² Nyo setia kenempat Enye nyo lah menetapko-Nye, samo upa Musa nyo setia delom segelo rumah-Nye. ³ Sabab, Yesus de anggap layak untok mendepot kemuliaon nyo lobeh godong deripodo Musa, upa halnye seurang pembengun rumah nyo mendepot kehormaton lobeh godong deripodo rumah iye dewek. ⁴ Sabab, setiap rumah de bengun ule seseurang, hambuk pembengun deri segelo sesuatu adolah Allah. ⁵ Musa setia delom segelo rumah Allah sebage seurang pelayon, untok membori kesaksion kenempat hal-hal nyo bakal de kehatoko de kemudion ari. ⁶ Cuma, Kristus setia sebage Anak delom rumah Allah, yaitu kite, munye kite tetap bepogong toguh podo keyakinon ngan pengharapon nyo kite banggako sampoi aher. ⁷ Ulenyo iye, upa nyo Roh Kudus buikko," podo sari nie, munye kowe mendongor suaro-Nye, ⁸ Jengonlah karasko hatime upa delom pemberontako nyo kowe lakuko podo ari pencubaon de padang gurun. ⁹ Yaitu tekalo nenek puyangme mencuboi Ake ngan mengoleh perbuaton-perbuaton-Ke selamo empat puluh tahun. ¹⁰ Sabab iyelah Ake bemarah kenempat generasi iye ngan buik," Hati mike selalu sosot ngan mike hopi tereti jelon-jelon-Ke.' ¹¹ Jedi, Ake besumpah delom amaroh-Ke: ' Mike hopi bakal masuk ketempat perhention-Ke." Mazmur 95:7-11 ¹² Behati-hatilah dulur-dulur, jengonlah ado de antaro kowe nyo memiliki hati nyo jahat ngan hopi pecayo, nyo membuatme bepaleng deri Allah nyo hidop. ¹³ Sebeleknye, nasehatilah sikuk dengan nyo loin setiap ari, selamo lage ado nyo de sobut " sari nie " enggakkonyo hopi ado de antarome nyo de karasko ule tipu daya doso. ¹⁴ Kite lah mengambek bageon de delom Kristus, munye kite bepogong toguh podo keyakinon nyo semula sampoi podo ahernye. ¹⁵ Upa tetules," Podo sari nie, munye kowe mendongor suaro-Nye, jengenlah karasko hatime upa delom pemberontakon." Mazmur 95:7b-9 ¹⁶ Siapekah urang-urang nyo lah mendongor suaro Allah, hambuk memberontak? Bukonkah mike segelo nyo keluor deri Mesir de bewoh kepemempenon Musa? ¹⁷ Ngan, kenempat siapekah Allah bemarah selamo empat puluh tahun? bukonkah kenempat mike nyo berbuat doso sehingga mayat mike begelimpangon de padang gurun? ¹⁸ Ngan, kenempat siapekah Allah besumpah behwo mike hopi bakal perenah masuk ketempat perhention-Nye, munye bukon kenempat mike nyo hopi taat? ¹⁹ Jedi, kite mengoleh behwo mike hopi depot masuk ulenyo kehopipecayaon mike.