( Keselamaton Godong ) ¹ Ulenyo iye, kite arus lobeh teliti memperhatiko ape nyo sodah kite enggakkonye kite hopi teheret arus. ² Sabab, sembe ajoron nyo de sampaiko ule padong malaikat tebukti hopi depot de ubah, ngan setiap pelanggaron atau kehopitaatan bakal menerimo hukumon nyo adil, ³ Upamone kite depot lolos munye kite mengabaiko keselamaton nyo godong iye? yaitu, keselamaton nyo pertamo-tamo de beritako ule Tuhan, ngan de buktiko kebonoronnye kenempat kite ule urang-urang nyo mendongor-Nye. ⁴ Seloin iye, Allah jugo membori kesaksion melalui tando-tando ngan hal-hal ajaib, berbagai mujizat sereta karunia-karunia Roh Kudus nyo de bageko menurut kehendak-Nye. ⁵ Allah hopi menaklukko denia nyo bakal njongok, yaitu denia nyo sedang kita buikko, kenempat padong malaikat. ⁶ Cuma, ado sikuk urang nyo lah membori kesaksion delom sebuah nas:" siapekah mendesio sehingga Kowe memekerkonye? siapekah anak mendesio sehingga Kowe memedulikonye ? ⁷ Untok setegal, Kowe membuatnye lobeh rendah deripodo malaikat; Kowe memahkotainye dengan kemuliaon ngan hormat. ⁸ Kowe menaklukko segelo sesuatu de bewoh kakinye." Mazmur 8:5-7 sabab, dengan menaklukko segelo sesuatu de bewoh kaki-Nye, mengka Allah hopi membiarko sesuatu pun nyo hopi takluk kenempat-Nye. Cuma hambuk, kinie kite bolum mengoleh segelo sesuatu takluk kenempat-Nye. ⁹ Cuma, kite lah mengoleh Yesus nyo untok setegal de buat lobeh rendah deripodo padong malaikat, yaitu Yesus nyo de mahkotai dengan kemuliaon ngan hormat ulenyo lah menderito kemation enggakkonyo ule anugerah Allah, enye depot merasako kemation bage segelo urang. ¹⁰ Sodah selayaknye enye nyo bage Enye ngan melalui Enye segelo sesuatu menyempurnako perintis keselamaton anak-anak-Nye melalui penderitaon, untok mengunda mike kenempat kemuliaon. ¹¹ Sabab, beik enye nyo menyuciko maupun mike nyo de suciko, segelonye berasal deri sikuk Bepak; iyelah sababnye Yesus hopi malu menyobut mike sebage dulur-dulur-Nye. ¹² Dengan buik;" Ake bakal menyatako namo-Me kenempat dulur-dulur-Ke. De tangah-tangah segelo umat-Me, Ake bakal menyanyiko pujion bage-Me." Mazmur 22:23 ¹³ Ngan lege;" Ake bakal memotekko keyakinon-Ke kenempat Allah." Yesaya 8:17 ngan lage," Nielah Ake, serompok anak-anak nyo lah de boriko Allah kenempat-Ke." Yesaya 8:18. ¹⁴ Ulenyo anak-anak iye adolah mendesio nyo memiliki deroh ngan dageng, mengka Yesus jugo mengambek bageon delom keadaon mike enggakkonyo melalui kemation-Nye, enye depot membinasako enye nyo memiliki kuaso pucuk kemation, yaitu beles. ¹⁵ Ngan, membebasko mike nyo seumur hidopnye de perbudak ule ketakuton bakal kemation. ¹⁶ Jedi, jelaslah behwo enye hopi membori pertolongan kenempat padong malaikat, hambuk kenempat keturunon Abraham. ¹⁷ Ulenyo iye, delom segelo hal Yesus arus menjedi upa dulur-dulur-Nye, enggakkonyo enye depot menjedi Imam Godong nyo ponuh belos tesihan ngan setia delom pelayanon kenempat Allah. Dengan demikion, enye depot mengunda penobuson pucuk doso-doso umat. ¹⁸ Sabab, Yesus dewek menderito tekalo de cuboi, mengka enye depot menolong mike nyo sedang de cuboi.