¹ Bahkan perjenjion nyo lamo pun berisi tentang peraturon ibadah ngan tempat kudus nyo ado de behumi. ² Ulenyo demikion Kemah Allah depersiapko : bageon luor, nyo podonye terdepot lampu, meja, ngan roti sajion, de sobut Tempat Kudus. ³ De belakong tirai kedua adolah bageon kemah nyo de sobut Ruang Mahakudus, ⁴ De tempat iye terdepot altar pedupaan nyo terbuat deri emas ngan Tabut Perjenjion nyo segelo sisinye de lapisi emas. De delom tabut iye, terdepot sebuah kendi emas nyo berisi manna, tungkat Harus nyo perenah betunas, serta dua lempeng betu perjenjion. ⁵ De pucuknye, ado dua kerub kemuliaon nyo menaungi tutup pendamaion, hambuk saat nie bukonlah waktu tepat nak mengomongkonye secaro terperinci. ⁶ Lah segelonye iye de persiapko sedemikion rupa, padong imam masuk ke bageon pertamo deri kemah iye secaro rutin, nak melakuko pelayanon ibadah kenempat Allah. ⁷ Cuma hambuk, anyo imam godong bae nyo de perbolehko masuk kebageon kedua deri kemah iye, iye pun anyo setahun sekali, ngan mengunda deroh nak depersembahko kenempat Allah demi badannye dewek ngan demi doso-doso umat nyo de lakuko tanpo sengajo. ⁸ Roh Kudus menyatako kenempat kite behwo jelon menuju Ruang Mahakudus bolum tebuka selamo Ruang Kudus lage ado, ⁹ Hal iye adolah kiason mengenai zaman nie. Demikion jugo berbagei pemborion ngan kurban-kurban nyo de persembahko hopi depot menyempurnako nurani urang-urang nyo beribadah, ¹⁰ Sabab anyo bekaiton dengan makonon, minumon, ngan ritual pembesuhon nak badan jasmani nyo berlaku sampoi tibanye waktu pembaharuon. ¹¹ Cuma, tekalo Kristus njongok sebagei Imam Godong pucuk hal-hal beik nyo bakal njongok, Enye masuk melalui tempat Kudus nyo lobih godong ngan lobih sempurna; nyo hopi de buat ule tangon mendesio ngan bukonlah suatu ciptaon. ¹² Enye masuk ke Ruang Mahakudus sikuk kali untok selamonye, bukon dengan mengunda deroh kambing jenton ngan deroh anak sapi, hambuk dengan mengunda deroh-Nye dewek sehingga mendepotko penebuson nyo kekal. ¹³ Sabab, munye pemercikon deroh kambing jenton ngan sapi jenton, ngan jugo abu anak sapi betina kenempat urang nyo najis depot menyuciko badan jasmani mike, ¹⁴ Lobih-lobih lage deroh Kristus, yaitu Enye nyo melalui Roh nyo kekal mempersembahko badan-Nye sebagei kurban nyo hopi becacat kenempat Allah untok menyuciko hati nurani me deri perbuaton sio-sio empuknye kowe depot melayoni Allah nyo hidop. ¹⁵ Untok aloson nielah Kristus menjedi perantaro deri perjenjion nyo beheru empuknyo mike nyo lah de pantau Allah boleh menerimo warison kekal nyo lah de jenjiko-Nye; sabab sebuah kemation lah terjedi untok menobus mike deri pelanggaron-pelanggaron nyo mike lakuko de bewoh pernjenjion nyo pertamo. ¹⁶ Munye ado surat wasiat, mengja arus ado kemation deri urang nyo membuatnye. ¹⁷ Sabab, surat wasiat anyo belaku munye urang nyo membuatnye sodah te'elek; surat iye hopi memiliki kuaso selamo urang nyo membuatnye lage hidop. ¹⁸ Iyelah sababnye, mengka perjenjion pertamo pun hopi belaku tanpo kurban deroh. ¹⁹ Sabab, lah Musa memboritahuko setiap perentah delom Hukom Torat kenempat umat Israel, enye mengambek deroh anak sapi ngan kambing mengka mencampurnye dengan aek. Ngan, menggunako kain wol abang serta sebetong hisop, enye memercikkonye podo kitab Torat ngan podo segelo umat. ²⁰ Sambel buik," Nielah deroh deri perjenjion nyo lah Allah perentahko untok kowe taati." ²¹ Ngan caro nyo samo, Musa jugo memerciko Kemah Suci ngan segelo perlengkaponye nyo de gunako delom ibadah dengan deroh. ²² Menurut Hukom Torat, hamper segelo sesuatu arus de suciko dengan deroh, ngan tanpo adonye penumpahon deroh, hopi bakal ado pengampunon. ²³ Ulenyo iye, segelo sesuatu nyo melambangko hal-hal segawi sajo perlu de suciko dengan hal nie, hambuk segelo sesuatu nyo de serga de suciko dengan kurban nyo lobih beik. ²⁴ Sabab, Kristus hopi masuk ke delom Ruang Mahakudus nyo de buat ule tangon mendesio, nyo anyolah tiruon deri nyo sebonornye, hambuk enye masuk ke delom serga iye dewek ngan kinie berado de hadopon Allah demi kite. ²⁵ Kristus jugo hopi mempersembahko badan-Nye bekali-kali, upa imam godong nyo arus masuk deri tahun ke tahun dengan mengunda deroh nyo bukon derohnye dewek. ²⁶ Munye upanio, Kristus arus menderito beulang kali sejak denia de ciptako. Cuma hambuk, Kristus anyo menyatako badan-Nye sikuk kali bae untok selamo-lamonye podo zaman aher nie demi menghapus doso, dengan caro mempersembahko badan-Nye dewek. ²⁷ Upa mendesio, nyo de tentuko untok te'elek sikuk kali bae ngan sesodah iye menghadop penghakimon, ²⁸ Demikion jugo Kristus; Enye de persembahko anyo sikuk kali bae untok menanggung doso lobot urang, ngan bakal njongok untok kedua kalinye, bukon untuk menanggung doso, meloinko untok mengunda keselamaton bage mike nyo menantiko Enye.