¹ Bedeery mahãdu heka aheto riwinyre, debo-ò inatxi reurò-my itisõe. ² Kia tahe ixenanihikỹ heto riwinyre sõemy brorenide sõemy mona òtaòta. ³ Rybe riwinyre irybe-my, kia tahe hãwa tya-di rariamyhỹre deòarina-di tebo-ki: ⁴ Mynake waheto-ò coracaõ-di iraymy atximyhỹtenyte mahãdu aõòtaòtaõ-my! ⁵ Mynake waheto-ò kaki biroxikre warỹsỹnawihikỹmy, wamonawihikỹmy biõkre wamona besò-my. ⁶ Abiòwa mahãdu biatyke, kia abiòwa mahãdu iitxỹre tai ta urile birike; tai tahe kai awi-my atxikre òbitimy. Idi tahe maria-my makre ryòbiti-di maria-my makre. ⁷ Txibo kai iny aõòtaòta ixãwidỹỹmy mohõtinykeki, iny debure ixỹrutere-di urile idi awoki ibinamy idi betehekre. Txibo kai idi betehekreki kia tahe tii òbitile ixiki ibinamy rahãkre, ihyy tahe aõòtaòta-ribi rexiixãwidỹỹnykre. ⁸ Tai heka iny kia wesena mahãdu urile birimyhỹke, uritre tamy ixiwelòròsòõ-my! ⁹ Idi beteheke tahe biixinanyke òbitimy ratxikremy, tai tahe tii awimy ratxikre bede riery-my. Sõemy biixinanyke tahe tii iny wimy ratxikre iny òbitimy. ¹⁰ Bedeery mahãdu rawoki òbitidỹỹna rỹimyhỹre tawedu rityhynymyhỹre. Mobo Deuxu deòdu rierymyhỹre tii heka awimy ixidireny ratximyhỹre. ¹¹ Diarỹ bedeery wihikỹ adee ariwahinykre idi irehemy bede biekremy. ¹² Itxi aõbo õhõti teata bedeery mahãdu heka aõmysỹdỹỹna riwymyhỹre; kai sohojile iribi bitake. Txibo kai iwitxira weribi-ò wadi bisinykreki sõemy aõhỹỹ-my butỹỹnykre ixisohojile. ¹³ Iny itxỹte heka iwitxirare, hãwyy aderana wesemy heòty-di ixiwo-ki rỹimyhỹre tanohõtinamy, aõ heka rieryõhyymyhỹre aõmybo rexitòenykre. ¹⁴ Heto ijò-ki heka runymyhỹre tiwyna tahe hãwa ryweijyti-ki runymyhỹre. ¹⁵ Hãbu dee rybeòta riwinymyhỹre hãbu mahãdu ibire-di rariamyhỹre mahãdu-ò. ¹⁶ Myheka rarybemyhỹre rexiijeõhyymyhỹre tabededỹỹnana-di: "Manake wahetoku-kò waruramy"! ¹⁷ Mona heka wasimy rewymhỹre anoni heka ibrekewire! Paõ wasimy rewasinymyhỹre tai tahe awimy rekymyhỹre! ¹⁸ Sõemy heka hãwyy hewo-my rariamyhỹrenyre, tahe rieryõhyymyhỹrenyre rydi rariamyhỹre rubu rydi, sõemy heka itxỹte mahãdu rỹira wiji tahe sỹywomy rỹire hãluuromy.