^1-3 Boholake, kai taholaõleteri? Uritre ijohona renyõmy kia hãwalò ratyy-ribi adeereny ryryrenykre, kia rytya-ribi tule adeereny ryryrenykre, ixielehyna-ribi tule adeereny ryrykre, iny heto ijò sohoji sohoji-di? Boholawibenykre aõmybo rarybekre-ò: ⁴ Hãbu mahãdu boholawibenykre diarỹ ararybekre! ⁵ Kai boho araykyreny ihoõre abededỹỹnanareny-di, diarỹ ariwahinykre inatyhymy warati lydu. Diarỹ rybewi adeereny ariwahinykre. ⁶ Boholabenyke wadohodỹỹna-ò, wadohodỹỹna heka aõnityhymy birarenybenyke. Ibutumy heka òbitimy rarybere. ⁷ Kohe, diarỹ ararybekre òbitimy diarỹ heka reburemyhỹre roimy rybe-ki òraru-ki tule. ⁸ Kohe, ibutumy wadohodỹỹna bedeeryna rare ibinake aõkõre. ⁹ Aõtxile iny urihimyòle ibedeery aõwaxina warybe rierykre, tahe tule idi retehekre tii inatyhymy òbitimy ratxireri. ¹⁰ Wadohodỹỹna heka sõetyhymy raerymyhỹre prata ratyremy; iny-õ riwaerymyhỹre iraky sõemy rarytyhydỹỹ myhỹre prata-ribi tii isỹrutyhymy. ¹¹ Kohe, bedeerytyhy heka sõetyhy mynawi-ribi ratyhydỹỹmyhỹre; kai mohõtinykre aõtxile ityhy mahãdu-di, kia heka rawitxiraõhyymyhỹre bedeery mahãdu wana. ¹² Diarỹ heka bedeery rare, waijoi mahãdu heka awilehekỹrenyrare; sõemy heka wadohodỹỹna ijõdire, ryòbiti aõnityhymy hãbu-ò. ¹³ Iwesemy, iny bityhynybenyke irybe birarenyke Deuxu sõemy reburemyhỹre aõnaõna bina-ki: Tai heka diarỹ bedeery sõemy reburemyhỹre ibinamy rỹimyhỹre, iny aõta òtamy rỹimyhỹre ibutumy aõtxi iny raroimyhỹre. ¹⁴ Inywi heka inatyhymy awire wadee wire. Diarỹ òbitimy ruruna ariwahinykre. ¹⁵ Waòararu-ki heka Iòlò hãwa ridinodunymyhỹre, kia tule aõwedu nihikỹ raaõmysỹdỹ ỹnymyhỹre òbitimy wahe. ¹⁶ Diarỹ aõwedu mahãdu-di aretehekre hãwa nihikỹ-di raõmysỹdỹỹnykremy ibutumy sudi. ¹⁷ Diarỹ ibutumy inydee raruxetòemyhỹre, iny wadee raruxetòemyhỹre-ò. ¹⁸ Diarỹ wadee awire iny raityhynymyhỹre, iny witxira rityhynymyhỹre aõ iõnaõnamy aõkõ riuberanykre hãbu mahãdu-ò. ¹⁹ Diarỹ aõ rewahinymyhỹre sõetyhymy ramymyhỹre mynarỹsỹribi. Iny-õ bedeerymy ratximyhỹre kia òsieresyna-di nihikỹ-di ratximyhỹre prata txirie ratyremy. ²⁰ Wary heka awire rytyahyy heka rare, ²¹ mobo wadi awimy ratximyhỹre, kia sõemy aõwiwihikỹmy ratxikre. Diarỹ inieru hyna aritỹxinykre mobo waki rahãmyhỹre-ò. ²² Diarỹ awynahyy raremyhỹ, tiubo tii biu bede riwinyreu. Tii juhuhykỹle ratxire aõnaõna relekõhykỹle. ²³ Diarỹ juhu bedeuhukỹle raremyhỹ suu relekõuhyyle. ²⁴ Diarỹ watxihyyre bero nihikỹ relekõuhyyle iwory relekõuhyyle. ²⁵ Hãwalò nihikỹ, juhu bedeu ihoõhyyre, diarỹ watxihyyre. ²⁶ Kai heka suu releremy tabiõhyyte, syraro-my suuramy tule diarỹ tahe watxihyyre. ²⁷ Diarỹ tii-wana butulemy watximyhỹ, tii warukile biu bede riwinymyhỹ,tahe warukile esõti riterenymyhỹ. ²⁸ Tii wakile biuwetyy riwinymyhỹ biu ròakremy, bero heka bero heka bero nihikỹ rirỹsỹmyhỹre. ²⁹ Tii iwory riwinymyhỹ bero-ò, tiwese bero-bo tahe ròhònyõhyymyhỹre. Diarỹ heka ibutumu aõnaõna lòrana-di retehere warukile riwinyre. ³⁰ Diarỹ tii-wana butulemy watximyhỹ, diarỹ heka awidỹ ũdure! Diarỹ boho heka juhuu wabedesa-my roiremyhỹ iny dee. ³¹ Diarỹ heka iny-ki awimy rahãre bede nihikỹ relere-ki, iny mahàdu tuu rahãwanymy rỹire-ki. ³² Tai heka jyre mahãdu boholabenyke wadohodỹỹna-ò, mobo wadohodỹỹna-ò roholakre tahe rityhynykre tii awimy teysamy ratxikre. ³³ Kia tahe tule ibedeerymy ratxikre! Wadohodỹỹna-ò boholabenyke uritre tuu rybeõmy aõmy! ³⁴ Iny-õ warybe-ò roholamyhỹre rityhynymyhỹre, tii heka wawe-ribikihyy ratxikre kia tahe ibedesamy ratxikre! ³⁵ Iny-õ waki rahãkre, kia bede wihikỹ-txi reakre Deuxu rybe rierykre. ³⁶ Mobo waderakre tahe tamy bedebina inihikỹ ariwahinykre iwesele. Ka mobo wadee ibinakre rubu tamy ariwahinykre bede wihikỹ ratyremy.