¹ Wariòre heka, wadohodỹỹna rityhynymyhỹre, tahe tule taratiò rirarenymyhỹre wadohodỹỹna. ² Wadohodỹỹna bityhynyke tai heka eysamy matxikre; wabededỹỹnana ywidỹỹna yrybule iyrybutyhyle heka arue-ò tewahinymyhỹte. ³ Idi mohõtinyke tiu aõ biwinykeki ebòdi; birarenyke òbitimy aray-ò. ⁴ Bedeerytyhy bimyke ixidee abirena wesemy; bedeerytyhy bimyke ixidee asỹ mahãdu wesemy. ⁵ Iwese tahe tii tiu abòdỹỹõna wedena wesemy, iwese heka weryrybò ribònymyhỹre tarybewimy taroimy. ⁶ Diarỹ txu-my retehemyhỹ waheto ijanela-ribi, ⁷ tahe weryrybò nade kia tahe iitxỹtere ijõ weryrybò nade tahe tule kia òbitimy nodu aõkõ rare. ^8-9 Kia hãwyy mahãdu heto bire-dile rare, ihyy bede rurunyre. ¹⁰ Kia tahe tamy ròhònyre weryrybò-wana witxi reakremy; tii heka aõni ixỹrutere rare, kia urile weryrybò mahãdu tatyy tỹmyra-di riijenanymyhỹre. ¹¹ Tii heka iwesena rare, iitxỹte hãwyy tiu taheto-ki runyõhyymyhỹre. ¹² Kia rirariralemy ratximyhỹre kia rytyalemy rariamyhỹre ixielehynalemy runyrunymyhỹre, hãbu heka tuu riijemy ratximyhỹre ixidee rimyke-my tabiòwa-my ikiwana ratxikemy. ¹³ Tahe tii tamy rehemynyre weryrybò-ò tahe rirytore, tamy sõemy rybebi-nabina-my tamy rarybere: ¹⁴ — Rỹsỹna rekywinyra rikirỹsỹkremy brorenide juhuku rewinyre. ¹⁵ Dikarỹ rare aitxese-my rare waheto-kukò makre-my, tamy kole tahe tehemynyte! ¹⁶ Waherina wahãna wihikỹ-di roimyhỹ, Egito riijemyhỹ. ¹⁷ Watỹhina tahe tỹnyremy roimyhỹre aderona-di tarina-di tule. ¹⁸ Manake, rakakre kua-ki mona-my rikiõkre kia tahe ixawikre txuu kanakòkunydihikỹle! ¹⁹ Wahãbu heka tasỹki anokõ ratxireri, kia irehekò tỹhina-my rare. ²⁰ Kia sõemy nieru riwyre idi bede irehemy txuu riekremy. ²¹ Myheka, tii weryrybò ribònymyhỹre tarybewi-my, tarybe sõemy taroimy. ²² Tii heka ijadòòma rihelydunyre, iwese broreni tawedu hewo-my ramyhỹre wesemy wahe, iwese iny hãluurotxi resemyhỹre wesemy. ²³ Kia tahe rubule riraòmyhỹre, tiu riudu itxi reamy rirubunymyhỹre myawa-di, iwese nawii botoruu-ò ralòmyhỹre wesele, tii rieryõhyymyhỹre tiu irumy botoruu-ribi ròhònyõtyhy. ²⁴ Tai heka wijina mahãdu wadohodỹỹna-ò boholabenyke tahe bityhynybenyke. ²⁵ Uritre rywi-ribi òlòrenyõmy, uritre hãwyy hewo-my òlòrenyõmy uritre idi nohõtirenyõmy, uritre tamy dehemysỹrenyõmy tii ratxiwana-ki. ²⁶ Tii dori sõemy rexibinabinanyre weryrybò mahãdu-ò; sõemy rexiõnodỹ ỹnyre tabededỹỹnana hãwyy òraru-ki. ²⁷ Heto-ki tii tai ratximyhỹre tamy-ò heka hãbu mahãdu ridymyhỹre tai heka ryy tamy itxuure.