1-2 Wariòre, txibo kai adewedỹỹna biòwynykremy tarybete-wana abiòwa wijina dee da iny witxira-ò aõbo tuu tarybeta, ka tahe wiji ròtena-ò malokre ixi arybe òrarulemy; kia uhuari òhãru-txi teseta. 3 Aõtxile aõrutaõ biwinykre iribi wylemy bòhònykremy, kiemy dori kai ròtewo-ki atxiteri, abiòwa-ò tarybete-ki biòwynykremy. Abiòwa biekre sõemy idi bisỹnykre, kiamy tamy bexitòenykre, aõnaõna riwinyrenyra-ribi teòrehemy ratxikremy. Uritre iny ixiradỹỹ õmy uritre tuu ixinihõtidỹỹõmy kia dori ixỹruna iny widee riwahinymyhỹre. 4 Uritre txuu iròtedỹỹõmy kia biwinykexieryle ralòmyhỹkre; uritre tỹhiõmy komy heka bede òhãru-ribi bexitake. 5 Txibo kai iribi bexitakreki kia bexihedỹỹnykre, iwese bròre riòre riudu mahãdu-ribi rahenymyhỹre wesele wahe, iwese nawii hãinaje-ribi rexiwòmyhỹre wesele wahe. 6 Iny deywese mahãdu, ywimy òlòburedi betehemyhỹbenyke iribireny tahe aõmysỹdỹỹ bierybenykre tii boho-wana. 7 Tii boho heka idinodureny ihoõre tamyreny bede riywike 8 Ihãrele tahe bede jutàtà bedeu raõmysỹdỹỹnymyhỹrenyre, kia tahe rỹsỹna ributunymyhỹrenyre idi bede tòtee rierenykremy. 9 Kai tahe tỹhile sohojile aerynare! Tiweseu botahe kai kia wesemy bede biekre? 10 "Txioini urihimyòmy arexielehynyke!" Kohe, uhimyòmy bexielehynykre, 11 Kia aõkõna iòhòtyhylemy adee rehemynykre, wasidu wesele. Kia iòhòtyhylemy aõnaõna bina atyre resekre tiutxulemy, iwese wasidu tebònadimy ralòmyhỹre wesele. 12 Adeereny arityyritinykre hãbu aõkõ teòsa hãbu aõki awikõmyhỹre. 13 Ihãre tahe tii taõwiwiriteòsinymyhỹre tebòdile aõ riwinymyhỹre, tawadile rexiukỹnymyhỹre irahudi ta taruedile aõ riteòsinymyhỹre. 14 Acoracaõ sõemy rỹsimy aõbinabina-di rỹimyhỹre; tii urile bede irehemy aõwidỹỹõmy ratximyhỹre, kiemy urile rõhõtinymy ratximyhỹre, iwitxiramy itỹmyramy aõibina riwinykremy irahudi iny witxiralemy taehehe riuberanymyhỹre. 15 Tai kiehe tii tiulebo aõhỹỹmy rutỹỹnykre; kiemy rexirubunykre kia tamy tuahi ihokõre. 16 kiemy dori tii debo-ò sohoji-my reurõmy aõnaòna bina riwinyra, iny tybyreny tai ibinamy rahãre kiemy inatyhymy tuu radònyre; kaki tii boho rỹire. 17-19 Widi iny retehemyhỹre kai wiratyremy rỹimyhỹremy tacoracaõ-ki ixidi ratximyhỹre, kia urile raroimyhỹre, wasidu, rubudỹỹdu, kia iratireny aõ ibina riwinykrelemy raraykynymyhỹrenyre, Roidu mahãdu aõ ibina riwinymyhỹrenyre iny witxira binadỹỹlemy, irahudi tahe taehehe taseriòre boholemy riuberanymyhỹre, tabiòwa boholemy riuberanymyhỹre. 20 Jyre mahãdu ikiemy bureny bityhynybenyke; uritre adireny dohodỹỹna ribiòtu titxi noõmy. 21 Bureny òbiti acoracaõ wo-ò birarenyke; kiemy dori ahekile ratximyhỹre. 22 Tii dori ary adee riywinykre; tii adee tỹhiwi riwahinykre awimy kia txuu tỹmyre-my ròhònymyhỹkre adee ixinadỹỹdumy ratxikre, aõ òbitimy rỹikre riteòsinykre. 23 Buu aratohonymyhỹre adi tule aratohonymyhỹre kia heka jusarana rare ary adee ritxusaranymyhỹre awimy bede biekremy. Txibo tiu buboho aõnaõna lau aratòenymyhỹreu, kia heka òbitimy matxikemy adi risỹnymyhỹre bede bedesamy matxikemy. 24 Kiemy dori araòhãrunymyhỹrenyre, hãwyy deòsa arabònyke lau tii boho dori tarybe breemy taroimy jyre mahãdu ribònymyhỹreki. 25 Uritre aõ wityhy kia wesena hãwyy-ò ixiwahidỹỹõmy, uritre tamy ijereõmy kia dori aitxenadỹỹmy tarue adee riyrenykre. 26 Hãwyy tahãbu ririmyhỹre kia heka wedena mahãdu ratyremy rỹimyhỹre! Hãwyy wedena kia nieru riòre ritamyhỹre, ka hãwyy tahãbu ririmyhỹre tahe jyre mahãdu bede rihumyhỹre. 27 Kia aõbo irutaõki iny-õ `rina lyby-di araaxiòtinyke-ki abreti risỹ õreribihikỹle? 28 Kia aõbo irutaõki inyõ helootyre rariakeki iwa rooõhylemy? 29 Iyrybyle tahe iny isiramy wihãwyy-di rawasinymyhỹre, kia tiu taòrarumy aõhỹỹ rutỹỹnyõkre! 30 Hãbu, wasidu mahãdu-di rityhyõmy idi rỹimyhỹre, iyrybyle tahe tiu rawasinymyhỹre taramasa ixiribi rahukremy. 31 Tai heka inyõ iwasinaòle rimykre, kia tahedebo-ò inatximy reuròmy riòwynykre aòwiwihikỹ riwasinyre òwymy wahe, ihãre tahe iaõna-di ijoho rỹikre ibutumy aõ tai rỹikre-di. 32 Itxỹte sohojile heka irayky ijõdimy hãbu witxira hãwyy-di riwasinymyhỹre! Iny òbitile heka iny wijira-ò ixirubudỹ ỹmy rexitòenymyhỹre aõnaõnamy! 33 Anonana heka aleerylemy, wotõmolemy ixỹrunuhukỹmy matxikre, 34 kiemy dori hãbu ihãwyy ririra-ki reburemyhỹre, tahãwyy rihãrumyhỹre òrarumy kia tahe aõtxile aõ riwinykre reerynykremy. 35 Tii tiu aõtxile òwydỹỹna-ò reòbyõtyhy, tiu aõruxera rimyõtyhy; kia mobo ihãwyy-de rawasinyrale rimykemy idi risỹnykre.