¹ Wariòre, boholake wadohodỹỹna-ò bedeery-ò! Sõemy ywimy boholake rybe-di ijohodu rybe-ò! ² Tai dori kai ikiemy aõwiwirybe arati-ò birarenymyhỹkre, kia òbitilemy arybe rohonykre ibutumy aõtxile marybekre-ki. ³ Teeryteny aõbo wedena mahãdu tarybe bree riuhemyhỹre, kia adireny retehemyhỹre ixityre araatyrenykremy. ⁴ Irahudi tahe ixỹruna nihikỹmy adeereny rarootinymyhỹre, inihikỹmy iutxiemy iwese iny tõnoridi wiki rojymyhỹre wese wahe. ⁵ Mobõ wedena mahãdu hewo-my rariamyhỹre, kia òbitimy rubuna rydi rariamy ramyhỹre. ⁶ Kia heka bededỹỹnana hyy rare, kiemy dori tii rieryõhyymyhỹre tibo ryy òbiti ramyhỹre, kiemy rykòekòe-dile rariamy ramyhỹre aõ rierymy aõkõ. ⁷ Wariòre tai heka warybe-ò sõemy boholake uritre wadohodỹỹna-di alisiõ-my! ⁸ Urile wedena-ribi bexiwòke! Uritre iheto bire-ò dehemysỹ õmy! ⁹ Tai kai tiu aaõnawiwi aribi rexihuõtyhy kia tiu abededỹỹnanawiwi ixiribi mahuõtyhy, kia dori aruru aumywi tewahinyteri inywi mahãdu-ò acoracaõ kõmy tesisỹnymy. ¹⁰ Tai dori kai tiu anieru biwahinyõtyhy, aaõnawiwi iny witxira-ò; kia tiu abederaty ruru aribi rexihuõtyhy, aõmysỹdỹỹnawi-ribi. ¹¹ Tai tiu matuari-õ rehemynykreu, aumy aumywiwi tiu rabinaõtyhy webinadu-my txibo mawotõmõkeki tule, ¹² Uritre kai myy rybeõmy: "Be, aõherewe diarỹ urile waha dohodỹỹna-di risinyre", kia wahadohodỹỹna retyhynyõhyymyhỹre! ¹³ Aõherekibo aõ awityhy inihikỹmy rewahinyõre wadee rarybere hãrele waisinadỹỹdu-ò wadohodỹỹdu-ò? ¹⁴ Wiji tainihe sõemy aõhỹỹmy arutỹ ỹnykre ibutumy, waisỹru waribi ròhònykremy iny mahãdu ibutumy wamy robikremy! ¹⁵ Wariòre, abemy biõke ahãluurobemy kia dori awimy adeereny rỹire ahãwyy-wana! ¹⁶ Txibo tahe awimy ròhònyke uladu kia hãwyy hãbu-di rityhynyõmy rỹira rytyamy rỹira mahãdu ? ¹⁷ Aõbo tahe uladu-õ ratxikre ariòre kõreri hãre, kia tahe inywitxirale idi ròrenykre kia urihimyòmy teeryterimy aõkõ wahe? ¹⁸ Kia rybewile biuheke adee riwahinyre wahe. Bimyke kia irutaõmy tii adee rexiwahinykre umy reòarireri heribile wahe ahãwyy wesemy. ¹⁹ Tii heka aõhe-wana adee ahãwyy wirare irybeluu mahãduõ! Ahãwyy aramymyhỹre araywinymy kia heka adeewi riwinymyhỹre! ²⁰ Aõmybo tahe hãwyy wedena mahãdu aõwiwi biekre, aõnawiwi aõbo iny witxira-ò biwahinykre kia teeryõteri hãrele aõbo? ²¹ kia-ki heka Iny tybyreny adi araywinymy ariranadi retehemyhỹre ywimy. Tii dori ibutumy arayyrybe rierymyhỹre aõmybo tahõtinymyhỹte rybe rierymyhỹre! ²² Iny itxỹte mahãdu òraruna kia ixidee òbitile aõhyymydỹỹnana riwahinymyhỹre; reruti heka òrarudu mahãdu ritaataamy rimymyhỹre. ²³ tii rurukre, kiemy dori dohodỹỹna rybe mynamy ratxiõhyymyhỹre. Alisi alisimy, kia aõ rityhynyõmy rỹira heka òrarudu mahãdu rubu ry mahãdu ryòhòkỹle ridymyhỹre.