¹ Jyre mahãdu wadohodỹỹna-ò boholabenyke! Sõemy boholabenyke kiata bede òbitimy rỹira bierybenykre. ² Waisinadỹỹna heka awirare òbitimy iny tai rỹimyhỹre uritre iribi ixitarasaõmy! ³ Diarỹ tule juhuu uladu rare; diarỹ sohoji uladumy ruare nadi riòremy, kiata waha ijoi mahãdu tule riwamymy wadi rỹimyhỹre. ⁴ Tii waisinadỹỹmy reòarire myy wadee rarybemyhỹre: Arati-ò warybe birarenymyhỹke. Kia ikiemy wadohodỹỹna bityhynykreki bede bedesamy matxikre. ⁵ Bieryke bedeerymy atxikemy! Kia heka bieryke aõòbiti aõ ibinamy relemyhỹre wahe! Uritreta araisinanyre-ribi nohõti lusaõmy; uritre warybe-ribi ixilòhòrariedỹ ỹ õmy! ⁶ Uritre bedeery mahãdu ixiweribi-ò irisiõmy, tii dori aõnaõna bina lau aratòenykre; bedeery mahãdu-di awimy atximyhỹke tii sõemy adi taruki-my rỹikre. ⁷ Kia komy iny bedeerumy ixidi risỹnymyhỹre, kia inatyhymy aõnaõna binabina lau rexitòenymyhỹre aõtxile aõriòre lau. ⁸ Tamy biwahinyke aõnaõna-ki tedewenymyhỹte wahe, irahudi tahe bimykre tii dori tatyhydỹỹna-di arahetynykre. ⁹ Tii rati hetyna adee riwahinykre ikiemy idi matxikremy, idi bede biòtiinybenykremy bityhynybenykremy. ¹⁰ Wariòre, boholake ywiywimy wadohodỹỹna bimykremy; Tai kai bede sõemy irehemy abedesamy atxikre. ¹¹ Diarỹ dori adee reteòsinyre timybo bedeery mahãdu rydi mariakremy; wary adee reteòsinyre ryòbiti-di mariakremy. ¹² Tii boho-wana mariabenykre, ixideewimy elemy aõbo da ywimy aõbo, tai kai tiu aõbina-txi beòsaõtyhy. ¹³ Waisinadỹỹna-ò malòmyhỹke tai ta tiu bedebinabinamy matxiõtyhy! Tii, ywimy matxikre-my adee riwahinykre, kiemy òbitimy bede biekremy. ¹⁴ Uritre iny itxỹte mahãdu -ki ibinamy lahãsaõmy, uritre iny bina mahãdu rymy aõmy tuu rybeõmy. ¹⁵ òrarudu mahãdu -ribi urile bexiwòke; uritre ibire-di riraõmy! ¹⁶ Iny kia wesena mahãdu tiu rõrõõhyymyhỹre, kia aõ riwinyra-wana kia iny witxirale òraruna-txi riatymyhỹre. ¹⁷ Aõbinabina heka tamyreny rỹsỹna rare, rubudỹỹ tahe tamyreny imonarenyrare. ¹⁸ Hãbu òbiti mahãdu ry heka ywiywi-my ratỹnymy ramyhỹre tii rariawanaki; iwese txuu reamyhỹre wesemy kia bede ywiywimy ratỹnymy ramyhỹre, iwesele heka hãbu wi mahãdu ry rỹimyhỹre. ¹⁹ òrarudu mahãdu ry iny widi lisiluu mahãdu ry tahe iribi iwitxirare, turumy roimyhỹre iwese ruu turumy roimyhỹre wesele wahe. Tii rexieryõhyymyhỹre aõtxi resemyhỹre hãrele! ²⁰ Wariòre wadohodỹỹna-ò sõemy boholake! Bexiywinyhyylemy matximahãke boholakremy warybewi bimykremy. ²¹ Tii aõhe-wana ikiemy aratiwokihyy ratxireri, ikiemy acoracaõ wokile ratxireri. ²² Kiemy dori iribi iny aõòbitimy ramyhỹre, tai iny aõ ibinanamy aõkõ iny rỹimyhỹre awimy. ²³ Kia iribi ibutumy wariòre, kia sõemy bexiijekre arybe-di tii dori sõemy arabònykemy adi risỹnykre. ²⁴ Roi lau bexiijemy, aõòtaòtalau bexiijemy; urile iribi bexiwokre; ²⁵ Ikiemy ixiko-ò hyyle betehemy matxikre, uritre ixiweribi-ò ijere ijereõmy. ²⁶ Komy mohõtinykre riramy aõtxi bòhònykreki tai ikiemy rywi-di mariamy makre awityhylemy. ²⁷ Uritre ixiòkeseõmy aruruna weribi-ò kia ahywena weribi-ò! Uritre iny itxỹte mahãdu ry-di riraõmy!