¹ Uladu, txibo kai warybe-ó boholakeu warybewiwi ixiwo-ki birarenykreki, ² tai rybe-ò bieryhỹkỹlemy boholamyhỹkre òbitimy, kia acoracaõ rexihumy roimyhỹkre aõrybe òbitilemy rimymyhỹkre. ³ txibo kai Deuxu dee bedeeryna nihikỹmy, txibo bedeery nihikỹõ biijekre iwese òsi eresyna riõmyhỹre wesemy, ⁴ iwese nieru nihikỹ riõmyhỹre wesemy, ⁵ kai inatyhymy itxi beakre. Kia ikonanatxi tahe bierykre timybo Deuxu ratyhydỹỹ myhỹre timybo irybe-ò iny roholamyhỹre wahe. ⁶ Wahareny mobo tahe adee bedeery nihikỹ riwahinyre. Ary ribi heka arybewihikỹ òbitimy ròhònymyhỹre. ⁷ Kia ibutumy riwahinymyhỹre mobo iweribi-ki rityhynymy ixidi ratximyhỹreò. Tii heka wyhy itxena wesena rare mobo Deuxu tacoracaõ-wana rityhynymyhỹre wahe. ⁸ Tii dori ryy riwirareare bedeery mahãdu-ò, kia iny rỹimyhỹre mahãdu ò tule; tii òbitile riywinymy rirarenymyhỹre iny wi mahãdu idi rariakremy. ⁹ Deuxu iny wityhymy arawinykre ywimy mabekremy, aõnaõna òbitimy biywinymyhỹkremy. ¹⁰ Kiemy dori bedeery nihikỹ abededỹỹnana tya-ki ratxikre, tai heka kai sõemy beysakre aõnaõna wiwi bierykreki wahe. ¹¹ Umy wityhy bedeery nihikỹ sõemy araywinykre aõnaõna bina-ribi. ¹² Tii boho rybina-di mariakrelau aratòenykre, kia hãbu-wana matxikelau tule aratòenykre hãbu dori urile aõnaõnalemy aõmy wimy relyymyhỹre. ¹³ Tii boho hãbu mahãdu-ribi aratòhòrarienykre hãbu mahãdu dori òrarudu mahãdu rydi mariakelemy arateranymyhỹrenyre, kia aõtxikile hãbu wi mahãdu ydi tariamyhỹte. ¹⁴ Kia ibedesamy rỹira wana-ki kiemy aõnaõna bina rierymyhỹre urenana tuu rỹimyhỹre, kia ta ijõle rubudỹỹmy rarybemyhỹre aõnaõna bina riwinykre-my. ¹⁵ Tii boho tiu aõ awi riwinyõhyymyhỹrenyre, kia dori iryreny ikòekòemy ikiemy tuu ramyhỹre, tiiemy urile dori aõnaõna òbiti-ribi rexilòhòrarienymyhỹre. ¹⁶ Iny tybyreny rybe bedeeryna roiluu-ribi aratarenykre hãwyy roiluu-ribi tule, ¹⁷ Kia hãwyy urile tahãbu ririmyhỹre, tahãbu-my herina-ribi tõhõti rusamyhỹre, kiemy iny roimyhỹreu heka Deuxu iny rierymyhỹre. ¹⁸ Mobo hãwyy-wana rasỹnymy rỹimyhỹre, kia tii òbitile bede sira nihikỹ ixidee riwahinymyhỹre; mobo tii-wana ratximyhỹre kia òbitihyylemy rubuna rydi rariamyhỹrenyre. ¹⁹ Hãbu mahãdu wedena mahãdu-wana widi rỹimyhỹ renyre, kia rybina-txi rirònymyhỹrenyre, tiu ixyby ròòserenykemy aõkõ wahe; tiu taòrarureny ixiribireny risuhòrenyõtyhy, kiemy dori tii boho òbitile aõnaõna bina ixideereny riwinymyhỹ renyre. ²⁰ Bedeery mahãdu, araisinanyrenykre ry òbiti-di mariabenykremy, iny òbiti mahãdu ry-di. ²¹ Iny wi mahãdu heka ibutumy aõnaõna wiwi rimymyhỹ renyre, kiemy dori bede wiwihikỹ iny dee riwahinymyhỹre urenana; mobo suki rahãwãnykre, kia mobo Deuxu tacoracaõ-wana rityhymyhỹrele tai rahãwãnykre. ²² Hãbu itxỹte mahãdu hãbu roiluu mahãdu ibutumy taaõnaõnareny-ribi rexihurenykre ikonanau tahe suu rexihukre.