¹ Kaheka rybe bedeeryna rare. Salumaõ rybe heka rare. Israel. Iòlò heka rare, Davi riòre wahe. ² Tii heka rybe riritinyre taijoi mahãdu ribedeerydỹỹnyrenykremy bede rierymy rỹikremy, kia sõmy aõnaõna sirasira-di rorenymyhỹre òbitimy rỹikemy. ³ Kia taijoi mahãdu-ò rarybemyhỹre. Tai heka iny awimy bede riemy rỹimyhỹre òbitimy ibedeerymy. ⁴ Diarỹ inywo arirahorekemyreri iraymy roikemy òbitimy bede rierymy! Myheka tii rarybera: - Kia jyre mahãdu-ò artiteòsinykre timybo iny ixidi ròrenymyhỹre timybo iny aõnaõnabina ixi-ribi ritòhòrarienymyhỹremy wahe. ^5-6 Hãbu bedeery txibo sõemy rybe-ò roholakreki rexiurihimy rỹira. Kia aõ widỹỹ rierykre. Kia tule aõnaõna sirasira riywinykre. ⁷ Timykibo tahe hãbu ixyby bede rierymy ròòsemyhỹre? Komy heka, ròtyhydỹỹmyhỹre. Deuxu rityhynymyhỹ. Iny itxỹte mahãdu sohojile heka rityhynyõmyhỹre kia tahe urile raixinadỹỹkre bedeery mahãu idi retehekre. ⁸ Tai heka wijina mahãdu boholabenyke bureny dohodỹỹna bityhynybenyke. Uritre ixiribi rybewi-di adehurenyõmy aõbo adireny-ribi teerytenta wahe. ⁹ Kia rybewi heka adeereny inihikỹmy aõwiwi riwahinykre aõwihikỹmy. ¹⁰ Wariòre, txibo tiu òrarudu mahãdu abòdỹỹdu rururkreki, roimy uritre ibònahemy ixeõmykre tuu adee rutỹỹnykreu. ¹¹ Txibo deòaridỹỹ riwinykreu wadeereny: manake waweribireny-ò inybedeeryõ iny inybò rehumyhỹrenyre wasilemy redymyhỹrenyre tahe rerubunymyhỹrenyre: Aõkõmy marybe! ¹² Tiiboho myy rarybemyhỹrenyre: iny bedeerykõ mahãdu rikihurenykre. Ibutumy rexihurenykre. Iwese hãluu radu mahãdu hãbu rirỹsỹmyhỹre wesele wahe. ¹³ Kia tahe ityhy nihikỹmy rakatxirenykre. Ibutumy aõnaõna sõmosõmo-di ityhymy rokoirekre òbitimy! ¹⁴ Manake waweribi-txi manalòke. Txibo aõ rikiwymyhỹrenykreu, kia wiweselemy rikitxuamyhỹrenykre. ¹⁵ Wariòre, uritre kia wesena iwidỹỹõmy! Kia wesena mahãdu-ribi irehemy matximyhỹke. Uritre iryreny-di riraõmy. Idi tiiboho rariamyhỹrenyredi. ¹⁶ Kia iny tuu ikiemy ratximyhỹre kia heka iny ibinamy tuu riwinymyhỹre. Kiemy rubudỹỹ sohojilemy rõhõtinymyhỹre iny hudulemy. ¹⁷ Tiu nawii riudumy robimyhỹreu ire biu-txi runymyhỹre. Kia tahe aõtamaõkõ rexiwomyhỹre. ¹⁸ Kia wesena iny riribiòtu iny rỹimyhỹre! ¹⁹ Kaheka ibutu nonana heka rare kiemy aõ-di risinymyhỹre ityhymy ratxikemy ixidi risỹnymyhỹre. Kamy iny ixidi rỹimyhỹre buturatyre ratxikemy. Kia tii òbitile rexihumyhỹre. ²⁰ Bedeery nihikỹ rytyalemy ixielehynatyalemy rariamyhỹre ryrymy iny mahãdu iiryò roholakremy. ²¹ Iny mahãdu-ò rytya-ò marybeke, hãwã dinodu nihĩkỹ hãwã sõmo sõmo riteòarinykremy ibutumy. ²² Iny aõkõmy rỹira aõ riteòsanymy kia wese aõbo matxibenykemy ixidi atximahãte? Kaiboho aõbina-di urile tesinymyhỹtenyte. Kia ta urihimyòle aõ wadeewi tewinymyhỹtenyte, tiubo tahe kia aõwihyyle biwinymy mabekre tiubo tahe arasireny ixihereny biryrybenykre inatyhyhykỹmy? ²³ Boholabenyke warybe-ò aõmy rarybemyhỹreò. Diarỹ dori aõbinabinareny ariywinykemy watximahãre! Waworỹsỹ atyrereny aritxiwikre irahudi tahe wabededỹỹna wihikỹ adeereny ariteòsinykre. ²⁴ Diarỹ tiwesewese aõkõ adeereny rarymyhỹre kia ta kiaboho waderalemy takoamyhỹtenyte! Wadebò retetemy retidimyhỹre adeereny, tiu inyõ wadee aõwi riwinyho aõkõ. ²⁵ Kaiboho aõwityhy tewahinyõtenyte wadohodỹỹna rewahinyrehãrele wahe. Kia warybe wihikỹ deralemy tekoatenyre. ²⁶ Tai heka tiubo aõhỹkỹmydỹỹnanareny txumy bede rỹikeu abrebunareny txumy abederyryna txumy bede rỹikreu, diarỹ urile arutxuenykre ibinamy akireny arahãkre. ²⁷ Txibo tiu aõbina nihikỹ atyrereny resekreu yhydeburemy, txibo tiu kaiboho aõhỹkỹ nihikỹmy butỹỹnybenykre sõemy. ²⁸ Tai tahe kaiboho wadohodỹỹ biebenykre wawiòhedỹỹnana wahe. Diarỹ tahe tiu warawyòdỹỹõna. Watxi lahãsamy bekoabenykre. Kia tahe aõtama aõkõ bòibenykre. ²⁹ Teeryteny aõbo aõherekibo tuu rutỹỹnykre? Kiemy kaiboho teerymyhỹtenyte aõ òbitimyhỹre hãrele aõderamy tekoamyhỹtenyre. Urile heka sõwemy bityhynybenyke inytybyreny. ³⁰ Kaiboho aõwiwityhy tewahinytenyõte wadehodỹỹna adeeryeny rewahinyre hãrele wahe. Kia wadohodỹỹna-txi teritenyõhyymyhỹtenyte. ³¹ Tai heka kiaboho bedraty hyrele bitòbenykre aitxỹtereny òrarumy wahe. Kia alòbrònareny raywimy rỹira yhyle heka alòbrònarenyre. Tai heka kaiboho yhynihikỹle bihebenykre. ³² Iny ixiyhyboho! Kaiboho bexihubenykre. Kiemy dori kaiboho urile waribi texilòhòrariemyhỹtenyte. Itxỹte boho, awityhylemy atixmyhỹtenytemy ixidireny tahõtinymhỹtenyte. Kia ywiywimy arubunareny-ò tariamyhỹtenyte. Itxỹte boho! ³³ Betehebenyini txibo wiribi iwitxiraremy! Mobo warybe-ò roholamyhỹre riwatyhynymyhỹre. kia mahãdu ywimy rỹimyhỹre reximywiwimy, aõbrebunalau ruberuõhyymyhỹre.