¹ Aõni heka ibedesa rare hãbu riòre inytyhymy itxỹteõmy rỹimyhỹre; hãwyy riòre itxỹtemy iaõnaõna rỹimyhỹre tahe sõemy ise aõhyymy rutỹ ỹnymyhỹre. ² Iny ityhymy inierudi-my rỹimyhỹre heka sõemy ròtamyhỹre iny aõkõ mahãdu-ò aõ riwahiõhyymyhỹre deysanabedeõ; bedewihikỹ òbitimy rỹira tahe sõemy aõnawiwi inydee riwymyhỹre taworỹsỹ-ribi. ³ Wahareny uritre hãbu rubu-ò iwahisidỹỹõmy ramadese-my rurukelau, kia ijõ mahãdu tahe sõemy rexitòenymyhỹre xieryle rỹsỹnaõ ixidee riwymyhỹre. ⁴ Mobo taõmysỹdỹỹnana-ki teywesemy ratximyhỹre kia aõtamaõkõle iaõnaõna wylemy rexihumy ramyhỹre; ka mobo inatyhyhykỹmy raõmysỹdỹỹnymyhỹre tahe kia wylemy iaõnaõna raòwònymy ramyhỹre. ⁵ Jyre mahãdu ibedeerymy rỹimyhỹre kia urile bededỹỹnana wiwi rimymyhỹre, ka jyre mahãdu bededỹỹnana wiwi-di urile risinymyhỹre tahe kia urile sõemy tyby mahãdu-ò ixỹru nihikỹ riwahinymyhỹrenyre. ⁶ Hãbu wi inytyhymy rỹira kia ixihetyrele rybewiwi rimymyhỹre, ka hãhu itxỹte tahe urile tabedeòbynaribi-ò tule iribi irehemy rỹimyhỹre. ⁷ Ibutumy hãbu wi-txi õhõtireny reamyhỹre ibedesamy kia rubu-my rỹimyhỹre hãrele; ka hãbu itxỹteni mahãdu tahe urile idi risinymyhỹre rubu mahãdu òle idi rehumyhỹre. ⁸ Hãbu bedeery heka teysamy bedewiwi rirarenymyhỹre, ka mobo myy rarybemyhỹre "kia diarỹ reeryre!" kia heka tii òbitile tabededỹỹnana ixiribi rahumyhỹre. ⁹ Mobo bedewiwihikỹ riwymyhỹre kia tiu aõhe rutỹ ỹnyõhyymyhỹre, ka rybina-di rariamyhỹre tahe tii òbitile aõhyymy rexisỹnymyhỹre. ¹⁰ Hãbu deòsa tii òbitile tabededỹỹnana ritỹxinymyhỹre bedebinana-di, iny ijõ rybedu tule tabededỹỹnanawiwi ixi-ribi rahumyhỹre. ¹¹ Hãbu rybewityhy iny witxira riwiòhenamyhỹre, hãbu bina tahe inydee deburele rieryre. ¹² Eheheluu roiluu kia heka aõbinale bedelòrelòrele riwahinymyhỹre; ka bedesa tahe iny-ribi ehehe riinodỹỹnymyhỹre tahe widee rybewi iny riwahinymyhỹre ibutu dee. ¹³ Hãbu bedeery mahãdu nihikỹ heka awimy ritohodỹ ỹ myhỹre, ka mobo bedeeryõmy rỹira tahe rarytxy wihikỹ rimymyhỹre ihyy tahe raratxymyhỹre. ¹⁴ Hãbu tyhy-my uritre wymy taryyrybe rybeòraõ-my, hãbu bina tahe aõtxile rarybemyhỹre aõmy rõhõtiõhyymyhỹre, iurenana tahe sõemy aõnaõna-my ròhònymyhỹre bederyry tule riòlòdỹ ỹnymyhỹre. ¹⁵ Hãbu ityhy heka taityhy-di rõhõtinymyhỹre aõwaxina aõna aõnawi riwahinykre òbitimy. ¹⁶ Aõmysỹdỹỹdu heka taõmysỹdỹỹòwy-my ròtamyhỹre, kia tahe iny witxira mahãdu riwiòhenanymyhỹre, awimy ratxikre-my hãbu bina mahãdu tahe urile tanieru rinodỹỹnymyhỹre itxỹtekile aõbinabinakile. ¹⁷ Mobo dohodỹỹna rityhynykre aõnaõna bina riwinyõkre-my, tii mahãdu heka rywihikỹ bede-di rariamyhỹre, ka mobo urile aõnaõna rityhynyõ-my risinymyhỹre, kia mahãdu heka rubu wese-my rỹimyhỹre riõmy. ¹⁸ Coracaõ isu-my rỹimyhỹre kia sõemy iny tawòki roidi rỹimyhỹre; ka hãbu ywimy rỹikõmyhỹre kia heka hãbu rybeluu-my rexirahòremyhỹre kia tahe tule rarajiỹ-di ijohodu-my rexirahòremyhỹre. ¹⁹ Mobo sõemy ixybyxyby rarybemyhỹre kia heka aõmy rõhõtinyõhyymyhỹre; ka hãbu bedeery ywimy rỹimyhỹre kia tahe tarybe riywinymyhỹre. ²⁰ Tiu tii rarybe-wana, kia irybe awimy ròhònymyhỹre kiainy tamy roholamyhỹre; ijõwe-ribi mahãdu rybe tahe aõmy irybe tiu awimy ròhònyõhyymyhỹre kiemy itxỹte rybereki. ²¹ Hãbu bedeery mahãdu dohodỹỹna heka awirare, kia iny riwiòhenanymyhỹre, ka itxỹte mahãdu dohodỹỹna tahe kia urile iny rihumyhỹre kiemy dori awimy aõkõ rarybemyhỹre. ²² Arybewihikỹ iny dee tewahinymyhỹte kia heka òbitimy tewahinymyhỹte, kiemy dori tiu bederyry nohõtiyrena tewahinyõhyymyhỹte. ²³ Hãbu itxỹte mahãdu kia urile aõnaõna binabinalemy rexiixinanymyhỹrenyre, ka hãbu bedeery mahãdu tahe urile rabedesamyhỹrenyre ixyby bedeery-my ratxirenykre-my. ²⁴ Hãbu bina mahãdu aõhyymydỹỹnana-txi rekoarenykre kia aõbo inatyhymy brebunamy rỹimyhỹre wahe, ka hãbu wi mahãdu tahe ibutumy aõnaõna wiwi-my robikre inatyhy-my òbitimy tamy rehemynykre. ²⁵ Iny itxỹte mahãdu wylemy rexihurenykre iwese biu dele ròamyhỹre wesele kiata wylemy rawinymyhỹre, ka iny inytyhy mahãdu tahe tahãwareny awimy riwinyrenyre. ²⁶ Iny deòdu-ki rỹimyhỹre deywesemy kia heka urile tadinodu-di risinymyhỹre, kia ratidesemy rexiònanymyhỹre kia heka ibinamy tadinodu-ò riwahinymyhỹre. ²⁷ Hãbu Deuxu rityhynymyhỹre kia heka ire tabedewi riumydỹỹnymyhỹre, ka hãbu Deuxu bededỹỹnana-di risinymyhỹre tahe kia iyjalemy bede riekre ibinamy ratxikre. ²⁸ Iny inytyhy mahãdu raròsòna kia bedesamy inatyhymy rexirahòremyhỹre, ka itxỹte mahãdu rarasinymyhỹre tahe tiu inatyhymy tamyreny ròòseõtyhy. ²⁹ Arybe bededỹỹnana wihikỹ kia tarurumy iny rimymyhỹre mobo aratyhynymyhỹre-ò, kia dori iòwykõ-my aõkõ tewahinymyhỹte txibo mobo Deuxu òludumy ratxireri. ³⁰ Kia tiu inywi mahãdu rexihuõtyhy, ka iny itxỹte mahãdu tahe suyle rexihurenykre. ³¹ Hãbu wi mahãdu tadohodỹỹwihikỹ riwahinymyhỹre urihinamy, ka hãbu itxỹte mahãdu ureraru tahe ikiemy awimy aõkõ rarybemyhỹre. ³² Hãbu wi mahãdu kia awimy iny rirawyònymyhỹre kia inymy reàlàmyhỹre ka hãbu bina tahe tarayy rybele binalemy iny rirawyònymyhỹre.