¹ Kaheka Agur rybe rare Jaque riòre heka rar, Massà suki heka raremyhỹ. Diarỹ reywesereri, Deuxu diarỹ reywesereri arierykre-my mobo kai tatemy! ² Diarỹ heka iny itxỹte rare! Diarỹ òsỹny heka waraykykõre ibutumy hãbu mahãdu -ribi. ³ Diarỹ bede reeryõhyyre timybo rỹimyhỹre, kiemy reerykõmyhỹre timykibo Deuxu bedeery nihikỹmy ratximyhỹre-ki! ⁴ Kiale heka reeryre: tiu iny-õ Deuxu wesemy su-ò ibereseõna tahe tiu isyby biu-ò ròòseõtyhy! Tiu heka iny-õ Deuxu wesemy yhy tebò-ki rimyõtyhy, tiu heka biu biuwetyy-ki rimyõtyhy! Kai aõbo Deuxu teeryte, ariòre aõbo teeryte? ⁵ Deuxu rybe sohoji sohoji òbitimy rarybere. Tii ikiemy iny riijemyhỹre aõnaõna brebunalau ibutumy mobo rityhynymyhỹre wahe. ⁶ Uritre dohodỹỹna rybe òbiti awo-ribi iwidỹ ỹ õ-my Deuxu rybemy, uriõ-ribi tii taròtena-ò araròtenyhemy, ibutumy iny mahãdu-ò arateòsinykre aõbo ibutumy roimy tuu tarybetemy. ⁷ Deuxu diarỹ adee aresitòenykre inatxi-my wadee bedewi biwahinykre-my: ⁸ Uritre roi lau biwatòenykre! kia heka komy waisitòedỹỹna rare. Kia-ribi tasỹ uritre inihikỹmy aõkõtyhy-my aratxike lau biwatòenykre! Kiale wadee biwahinymyhỹ aõmybo inatyhymy reamyhỹrele. ⁹ Diarỹ ao~mysỹdỹ ỹdu-my aratxiõtyhy, ityhy mahãdu le arityhynykre kia ta isiweribiòle ararikre kai ta wadee ibinare, tule diarỹ iny aõkõ mahãdu idi arisinyõtyhy txibo rybe-õ itxỹte-õ riwaitxỹtenykreki, ka txibo ani risuhokre kia iwitxira-my animy rarybekre. ¹⁰ Tiu deòdu mahãdu roimy tadinodumy rarybeõmyhỹre txibo rarybekeki tahe tii iròdu sõmo-di adee rehukre aòraru òrarukile wahe. ¹¹ Kia iny mahãdu urile tyby-di, tadi-di risinymyhỹre kia urile iròdu sõmo-di rehumyhỹre tuòlàdu-my. ¹² Iny mahãdu awimy ròtyhydỹ ỹ myhỹre kia tiu tõhõtireny tyramy rỹiõhyymyhỹrenyre kiemy isuhykỹlemy idi rỹimyhỹrenyre isi taòrarukile wahe! ¹³ Timybo iny mahãdu iaõna làkurenyre! Timybo aõnaõna-di tỹsimy rỹimyhỹre! ¹⁴ Iny mahãdu webinadumy iaõkõ-my rỹira mahãdu-my raòhòtemyhỹre, iwese hãlòe ràma risamyhỹre wesemy, txuu txurydesemy rỹimyhỹre. ¹⁵ Inaubiòwa-my aõnaõna tiu awimy rỹiõtyhy, iwese hãlàbu tiu iny umy-ribi teòrehemy rỹiaõkõ rare. ¹⁶ Bede wesilàdu kia ikiemy isyby ràbumy risỹnymyhỹre, hãwyy iriòreõ-my rỹira, bederahhy suràbuki, kia ikiemy isyby aõ worodỹ ỹmy risỹnymyhỹre. ¹⁷ Mobo tyby rirawyònymyhỹre mobo tadi rirawyònymyhỹre kia urile irue ratàkre; Kia iny mahãdu rue nawii òsitàmaru ritakre, irahu-di tahe rara iumymy rirosikre. ¹⁸ Inaubiòwa-my aõnaõna tiu raeryõhyymyhỹre kiemy dori isirare timy iny idi iijereõna: ¹⁹ Nawiihikỹ biu wetyy-di ruò-my ramyhỹre tiu iny rieryõhyymyhỹre, iwese hemylala mànatyre-di ramyhỹre wese mo iryrorieryõhyymyhỹre, iwese bera heòty beri nihikỹ-di ramyhỹre wese, katahe ikonana rara ijadòòma aõna tỹmyra hãbu-ò rawahimyhỹre. ²⁰ Ka wesemy heka hãwyy tahãbu ribònymyny ririmyhỹre hãbu witxira-ò; òrarudu-ò marybeke, irahu-di ta bitỹ ỹrasinyke, iòsỹny bedeeryõ-my irutaõ-my, "Aõwe diarỹ ibinamy rewira?" ²¹ Inaubiòwa-my aõnaõna suu rimytàtàdỹ ỹnymyhỹre: ²² Deòdu-õ txibo Iòlò-my runykeki, iny raityhynykeki. ²³ Kia hãwyy isiòhyy-my ikonanamy roimyhỹre, kai hãwyy deòdu-my rỹira tiu wytetyby-wana roimyhỹre tadinodu ehetxi-wana. ²⁴ Inaubiòwa-my iròdu yja roisinadỹ ỹ myhỹre hãbu sõemy bedeery-di rỹimyhỹre-ò; ²⁵ òlòbure yjayja iaõkõ bede rierymy tarỹsỹna rirarenymyhỹre bede jutàtà-ò; ²⁶ Iròdu yja iaõkõ kia ihãrele hãluu mànaykyki riwinymyhỹre tai resierenykre-my; ²⁷ Sei boho idinodureny ihoõre, ihãrele tahe ibutumy ruòmyhỹrenyre sõemy; ²⁸ Ijare iny tebòkile riràbunymyhỹre, kia tahe ijõ iòlò heto rarieki rỹimyhỹ myhỹre. ²⁹ Kia inaubiòwa-my aõnaõna widỹỹdu rỹira rariamy ywimy òbitimy: ³⁰ Hãlòe, Iòlò iròdu, kia tiu aõ-ò iwahisidỹỹ õna aõmybo rearerimy. ³¹ Rararesa rasiwedemy rỹira tasira txòtxò-my, watxi òbiti òbitimy rariamyhỹre, kia tiu aõtyre rariaõtyhy, Iòlò taòlàdu mahãdu-ribi ehehe-ribi isawira. ³² Txibo kai aõnaõna bòd`yỹnatxi besekreu iheribi, kia teeryta aõnaõna bina widỹ ỹ iny witxira-ò, isiki maisỹrikre kia tahe iribi isawikre! <sup>33</sup> Kai dori aõnaõna òbiti ijõdire: Txibo kai broreni huỹsy sõemy bihetenykreki kia urile sõemy adee radenykre manteiga-my; txibo òhòte deasỹki rỹira-wana kia sõemy hãlàbu reamyh`yre: txibo kai sõemy aehehe bibutunykre iny witxira dee, kia sõemy tii-wana maaõbinanykre txibo wii birubunybenykre.