¹ Kaheka bedeery rybe heka Rei Lemuel, kia heka rirawihikỹ rare, ise riki heka tuu riisinanyre, tii uladu-my raremyhỹu. ² Wariòre waderina, wariòre diarỹ heka arawinyre Dexu-ò, kaheka wadododỹỹna rare: ³ Uritre ixidi ahãnatxi adehuõ-my hãwyy mahãdu-ò; tii boho dori Iòlò rahurenyre. ⁴ Iòlò mahãdu Lemuel dee monahyre heka iòhãru rare isyruna, txibo monahyre wimy biõkeki. ⁵ Iòlò txibo sõemy riõmyhỹre kia taaõmysỹdỹỹna-ribi tõhõti rusamyhỹre, kia bededỹỹnana-ribi tõhõti ruõamyhỹre, tiu òbitimy aõmy rarybeõhyymyhỹre kia urile tahãwã nihikỹ riaõkõdỹỹnymyhỹre. ⁶ Monahyre heka webinadu mahãduyki awire, kiemy dori ràbu ryki rỹimyhỹre; monahyre heka iny aõnaõna binabina-my rỹimyhỹre biòwa heka rare. ⁷ Tii boho dori taaõkõ-ribi tõhõtireny rusake-my monahyre-my riõmyhỹrenyre, kia bede binamy ratximyhỹrenyre. ⁸ Arybereny biuhebenyke iny witxira biwiòhenanykre-my, iny aõkõ mahãdu tiityhyre, tii boho dori tiu rexiijerenyõtyhy. ⁹ Aõdinodu biuhekre aõ awi biwinykre-my iny aõkò mahãdu biwiòhenanykre-my rỹsỹna-ki. ¹⁰ Txibo kai hãwyy-txi beakeki òbitimy, òòreõyna-txi beakre oro ratyremy awimy idi atxikre. ¹¹ Hãwyy hãbu òbiti kia ikiemy awimy ratxikre, tii tiu tamy aõ isiraõna. ¹² Tii ikiemy tahãbu wiòhedỹỹ-my rarynykre; ikiemy aõnawiwi riekre tai ta ihãbu rabedesakre. ¹³ Tii tyyesi riõbranykre, kia tiile tyy riwinykre tariòre boho-ò. ¹⁴ Tiu reyweseõtyhy, rỹsỹnawi riemy rariamyhỹre tariòre boho-ò, rỹsỹna òwyriòre riemyhỹre. ¹⁵ Txuu ròhònykreko-ki tii rỹira-wanale komy rỹsỹna riywinymyhỹre tariòre boho-ò, irahudi tahe tadeòdu aõmysỹdỹỹna riywinymyhỹre. ¹⁶ Tii dori aõmysỹdỹỹ rieryre! Su riòre riõbranymyhỹre tamy-ò tahe aõwi ribrònymyhỹre nieru taaõmysỹdỹỹòwy-di rimymyhỹre wahe. ¹⁷ Tii ikiemy iny witxira-wana widee rarybedesemyhỹre, kia tiu taaõmysỹdỹỹna utxie-ribi rewòõhyymyhỹre. ¹⁸ Tii taaõmysỹdỹỹ rierymyhỹre idi xiery tariòre boho-di ròrenymyhỹre, iurenana tahe ruwetya riòre-di taaõmysỹdỹỹ-ribi rehemynymyhỹre. ^19-20 Tyyrurena-di arite-di tii tyy riwinymyhỹre irahudi tahe iny iaõkõ-my rỹira mahãdu-ò riwahinymyỹre. ²¹ Txibi tiu bede txutàtà-ò rehemynymyhỹreu tii aõmy rõhõtiyreõhyymyỹre, tiiemy tii tyky tariòre boho-ò riwiny rahumy rỹimyhỹre. ²² Tii òbiti herina hety mesa hety heto ijò hety riwinymyhỹre. Ityky kia tawidỹỹnadile ratximyhỹre, arite wityhy-di riwinymyhỹre. ²³ Hãwyy hãbu wityhy iinytyhy kia ibutumy iny rierymyhỹre kia iny rityhynykre hãwãyky-ribi; kia aõwedu nihikỹmy runykre taijoi mahãduyky-ribi. ²⁴ Uòhi, tyy, weretysana tiile riwinymyhỹre kia ta aõna-di ijohodu-ò idi rohonymyhỹre. ²⁵ Tii matuari mahãdu lau ruberuõhyymyhỹre. ²⁶ Tiu tariòre boho riisinanymyhỹreu tii bedeerytyhy riteòsiinymyhỹre, kia awimy roisinadỹỹmyhỹre roijemy òbitimy. ²⁷ Tii ibutmy rierymyhỹre aõbo iheto-ki ròhònymyhỹre, idi tiu taaõmysỹdỹỹna-ki reywesemy ratxiõhyymyhỹre. ²⁸ Iriòre boho myy tabiòwa mahãdu-ò rarybemyhỹrenyre: “Nadi heka brebudỹỹdu nihikỹ rare! Ibutu se mahãdu-ribi heka awire!" Ihãbu myy tamy raybera, kai sõemy texiijemyhỹte: ²⁹ "Kia aõwaõina hãwyywi rỹikre hãwãyky-ki, diarỹ heka inatyhymy reerymyỹre tiu ijõ awese ratxiõtyhy". ³⁰ Hãwyy aõwiwi kia txibo rasinanale rare aõwityhy dori tiu ikiemy rỹiaõkõ rare. Ka aõwi òbiti tahe hãwyy umy reòarikre aratyhynykre. ³¹ Hãwyy tuu riwinykeki komy aõnaõna-ribi ibutumy ixawike; kia iny-ribi rybewiwi rimykre ibutu-ribi kia hãwã riòre raaõmysỹdỹỹ-my rỹira-ribi.