¹ Hãbu aõnaõna-ribi resiije-my rỹira sõemy kia tiu taaõna binabina-ribi resihitxinyõhyymyhỹre, kia ywiywi-my isitere-ribile resekre, kia tiu isyby awimy ratxiõtyhy. ² Txibo tiu hãwã dinodu hãbu wi inytyhy tuu runyra-wana iny mahãdu teysamy rỹimyhỹre, txibo tiu itxỹte-õ hãwã dinodu-my runykreu kia iny mahãdu brebumy urile resihurenykre bederyry nihikỹmy. ³ Iny tỹmyra-õ wijina inytyhy kia tyby reysamyhỹre tuu rawowydymyhỹre, ka weryrybò wedena hewomy reamyhỹre kia ini-di beubetxile rehumyhỹre isỹ mahãdu aõwiwi-di tule. ⁴ Iòlò inytyhy òbiti kia heka ahãwã riwiòhenanykre kia tule riumydỹ ỹnykre kia awimy roikremy aõbina ihoõkre; txibo Iòlò iny brò-ribi raityhynyke-my isi risỹnymyhỹre kia urile hãwã ribinanykre. ⁵ Mobo aõ ibina riwinymyhỹre tabiòwa-ò kia tamy hãluu riamyhỹre. ⁶ Hãbu òraru ibina kia aõjuhu hãluu wesemy sỹy-my rỹimyhỹre hãbu witxira riranaki, ka mobo Deuxury-di rariamyhỹre kia resimywi-my rariamyhỹre kia bedesahe-ribile rawiunymyhỹre. ⁷ Hãbu inytyhy mahãdu heka rõhõtiyremyhỹre iny iaõkõ-my rỹira aõnaõna-my rỹimyhỹre-di, ka itxỹte mahãdu tahe kia aõnaõna-my rõhõtinyõhyymyhỹrenyre. ⁸ Iny itxỹte mahãdu aõnaõna bina riywinymy rỹimyhỹre ibutumy bede bedemy, ka inywi mahãdu tahe iny wiòhedỹ ỹdumy rarunymyhỹre awimy rỹikre-my aõbina binaõ-my. ⁹ Iny itxỹte-wana widee marybekreki kia aõ iribi bieryõtyhy! Kia rybe isiyrybyhykyle rỹikre: aõhe-wana tii aõbinamy adee risỹnykre txibo aratyremy isimy adee rarybekre. ¹⁰ Hãbu mahãdu iaõkõkõ-my ywimy rỹira kia hãbu wi mahãdu-my radònymyhỹre, ka hãbu wi mahãdu tahe urile hãbu itxỹte mahãdu riwiòhenanyke-my rỹimyhỹre kia heka tamy iurihina rare. ¹¹ Itxỹte heka rajua rajua riisiranymyhỹre kia tiu ehehemy ratxira-wana; hãbu inytyhymy isidi rỹira kia tebure taehehe riywinymyhỹre. ¹² Tiu Iòlò-õ hãbu roiluu rityhynymyhỹeu kia ibutumy teòdu mahãdu iijedu mahãdu tadinodu heki raroimyhỹrenyre Iòlò-my reàlàkremy hãwã dinodu-my raòwònykremy. ¹³ Aõnaõna heka wiwese wiwesenare ityhy, aõkõ-wana myheka wiwese wiwesenare; loosona bede ritoosònymyhỹre kia heka Deuxu riwahinymyhỹre. ¹⁴ Iòlò iny aõkõ mahãdu-di tiu risinyõmyhỹre kiata ityhy mahãdu-ò riwahinykre irybewiwireny, kia tahe Iòlò irehe-my bede riijekre awimy. ¹⁵ Uladu raijemy rỹimyhỹre aõnaõna binana lau sõemy raòhãrudỹ ỹmy kia dori isiijese rieryõkre òbitimy. Uladu isyby isyby aõnaõna bina bina isideewi-my riwinymyhỹre kia urile tybydee isỹru nihikỹ riwahinymyhỹre ibutumy iny mahãdu rierymyhỹre. ¹⁶ Tiu aõdinodu mahãdu roiluukreki itxỹtekreki kia ijoi mahãdu iyrybyle iheki roiluu-my itxỹtemy rỹikre. ¹⁷ Ariòre bimukre bitòenykr aõnaõna lau tai kai ikiemy awimy atxikre abedesamy. ¹⁸ Txibo Deuxu rybewiwi-my ijoi mahãdu-ò belyyõkre-wana, kia ijoi mahãdu ywiywi-my rabinamy raitxỹtemy rỹikre; Txibo ijoi mahãdu Deuxu rybewiwi rityhynykreki tahe hãwã nihikỹ awimy resiywinymy roikre rabedesamy rỹikre. ¹⁹ Iny itỹte biywinykreki, kai aõnaõnawi-my beakre rybewiwi-my tule beakre, tii dori iwydyõna kai aõmybo tarybeta òbitimy. ²⁰ Sõemy iny itxỹte mahãdu aõnaõna bina riraò-my rỹimyhỹre iyrybyleta hãbu aõmy rõhõtinydi aõkõ aõmy rarybemyhỹre. ²¹ Txibo kai sõemy aõnawiwi arybewiwi tewahinymyhỹte-wana adeòdu-ò, tiu bedeu tii iwese uladu raywidỹ ỹ myhỹre wesele ratxike-my isi risỹnykre òbitimy. ²² Hãbu aõbinaluu kia urile raisiradỹỹ myhỹre aõtxi aõtxile raõbinanymyhỹre, kia urile òrarudu mahãdu rarybemyhỹre iny òbitimy mahãdu-my tule. ²³ Hãbu taõwiwi kile resiatykre; kia riàòwònyke-my isi risỹnykreki,iny ywimy ratxikre aõnaõnakõ-my. ²⁴ Hãbu wasidu mahãdu riwòmyhỹre aõwedu nihikỹ lau kia isidee òbitile bedebina riwahinyhỹre, kia wasidu wesele isidee rarytxyna nihikỹ isidee riwahinykre! ²⁵ Mobo hãbu mahãdu aõmysỹdỹ ỹwi lau ruberumyhỹre, kia roina rybe-di mohõtinyke iribi besihedỹ ỹnykre-my; mobo Deuxu rityhynymyhỹre kia awimy rỹimyhỹre kia tahe resierymyh`yre awimy resimywi-my ratximyhỹre. ²⁶ Kai aõbo isiwiòhedỹ ỹmy inatyhymy taruteri? Urile aõdinodu mahãdu-ò aõmy isitòedỹ ũõ-my! Deuxu oleta besitòenyke tii dori arawiòhenanykre awimy atxikremy. ²⁷ Inywi mahãdu heka iny itxỹte mahãdu-my sõemy radònymyhỹre. Iny itxỹte mahãdu inywi mahãdu aõmysỹdỹỹnamy urile radõnymyhỹre.