¹ Kai heka Salumaõ rybe dohodỹỹna heka rare, Ezequias Iòlò deòdu mahãdy heka riritinyre Juda hãwã ludu wahe. ² Diarỹ boho heka Deuxu retyhynymyhỹrenyre aõnaõna bina iny laureny riwòmyhỹreki; kia ta tule aõwedu nihikỹ mahãdu retyhynymyhỹrenyre kiemy dori awimy aõ iny deereny riòbitinymyhỹreki. ³ Tiu heka iny-õ biu rarie tieryõtyhy, su urihina tule; iyrybyle tahe iny-õ tiu rieryõtyhy aõmybo Iòlò rarakynymyhỹre. ⁴ su mana womati bisuhòke kia tii wanale butulemy rymy roimyhỹre, kia tahe awimy aõhynamy relekre. ⁵ Wiòhedỹ ỹdu mahãdu bitake itxỹte mahãdu roimy rybedu mahãdu aõmysỹdỹỹna-ribi, iu tahe hãwã nihikỹ aõtaõki tai raumynykre. ⁶ Uritre isi sohoji-my nohõtiõ-my iwese iny wityhy tawãwi riijeõhyymyhỹre Iòlò-wana butumy. ⁷ Kiale heka awire tiu deòaridỹỹna adee ijõdikreu kia tahe awimy tai bòhònykre kia inywi mahãdu-txi beakre kia awimy adee raaõmysỹ-dỹ ỹnykre kai ryna witxi bunykre; mohõtinyini kai urile maisỹrumy bunykre. ⁸ Uritre aõmy wylemy ijaraõ-my, kia dori aratohonyreri aõbo teeryõmyhỹte kia òbitimy bierykremy. A~bo tahe relekre tiu abireludu umy robikreu aõbo ibinamy tewinyterimy? ⁹ Tai heka ywimy iny aõbin birarenyke, uritre ierysymy idi wisỹrỹ ỹ õ-my iny aõòtaòta-di. ¹⁰ Kiasõemy bede binabina-txi beakre kia ta roidumy maninikre, kia ibutumy iny araerykre bede hewo-ò itxỹtemy rybedu-ò. ¹¹ Dohodỹỹnawi heka txutyemy rawahidỹ ỹ myhỹre òbitimy, awimy heka rỹimyhỹre iwese bede-ò hyna rawymyhỹre wese byrena dena-ò bederaty-wana. ¹² Txibo iny-õ awimy rierymy roholareri riuhikre rierykremy, kia rybe luu òbitimy awimy iwese mana rỹsỹ isi sohoji-my rỹimyhỹre weselw wahe. ¹³ Iny aõmysỹdỹ ỹdu wityhy kia tadinodu ribedesadỹ ỹnymyhỹre; tii heka iwese bede jutàtà tya-ki rỹimyhỹre wese. ¹⁴ Hãbu aõnaõnawi-my relyymy rỹimyhỹre tiu riurihiõhyymyhỹre, iwese biuwetyy bijiu ratyadi ramyhỹre wese tiu biu ruty-õ reseõhyymyhỹre. ¹⁵ Webinadu aõdinodu heka umy robikre kai inatyhymy òbitimy atxite; sõemy marybeke isybyle ywimy tai dori kai aõsirasiratxi beakre bierymy. ¹⁶ kai aõbi bidi tetòte? Urihimyò-my birỹsỹke aõu aõu, tai dori kai urile araojinykre kia ta aribi hylòilemy aribi resihukre. ¹⁷ Uritre isyby isyby aheto biredu-ò noõ-my, tai dori tii tiu ibedesamy awimy aki rahãõtyhy. ¹⁸ Iny witxiramy roilemy iny ko telyymyhỹte kia heka ibinamy telyymyhỹte, tii arahãtenykreki woma-di kia aumy riwotõmonykre tõnori-di txibo wyhy-di aõbo. ¹⁹ Hãbu bityhynyke tii dori òbitimy ratximyhỹre, iwese iny txu-di wii riròmyhỹre wese tahe ijõ iwese iny wikokinamy reamyhỹre wesemy taruru-my aõwasina rakrokremy. ²⁰ Mobo wiu bedesamy riryrymyhỹre iny bederyryko iny deyweseko, kia tamy ibinatyhytyhyre, iwese iny-õ tayhyijena-di isi-ribi ritamyhỹre wese yhynihikỹ koribi, tahe ijõra iwese monahyre-di wiwotõmona rutxi idi rehumyhỹre wesele. ²¹ Txibi aòludu rama risamy ratxikreu rỹsỹna tamy biwahinyke; txibo bemomo risakeki bee urihimyò-my tamy biwahinyke. ²² Tai tahe tii aribi isawikre aõbo adee riwahinykre aõhe butỹ ỹnyhenylau. ²³ Iwese yhy debure biu-my ròamyhỹre wesemy, iny rybebinamy wii rirawyònymyhỹre kia heka ikiemy iny wii riteburedỹ ỹnymyhỹre. ²⁴ Kiale heka awire iny isi sohoji-my taherinawo-ki roimyhỹrele, kia iny heto rusera-ki tahãwyy eheheluku-wana rỹimyhỹre ratyremy wahe. ²⁵ Rybe wihikỹ iwitxira hãwã hãwãhãky-ribi rehemynyre awityhytyhy, iwese bejutàtà bedeò-ki rỹimyhỹre wesemy mobo bemomomy risareriò. ²⁶ Hãbu inytyhy aõ ibina relekreò reòbymyhỹre iny itxỹte mahãdu -wana butumy, iwese beijarana òraru su wesemy tahe ijõra iwese behãluu sõemy beubesudi rỹimyhỹre wesemy. ²⁷ Sõemy bidi ratòmyhỹre iny umyò ribinanymyhỹre; rekesityhynyreny iny witxira-ò rikisideòsinyrenykremy, iny boho aõnityhymy ratximyhỹrenyre aõbo ibinamy iny umyrenyò riwahinymyhỹremy. ²⁸ Hãbu taõbinabina ywidỹ ỹ erykõmy ratximyhỹre, kia itxỹtemy ratxikele tamywire iwese hãwã nihikỹ iitxeduõ-my rỹimyhỹre wesemy.