¹ Tiu kai makreu byremy, iny ityhy arateòarinykreki, inatyhyhykỹ-my besiòhãrunykre! ² Uritre isihetyretyre-my rỹsỹna irỹsỹ õ-my, arỹsỹna urile biuhenyke! ³ Sõemy besiòhãrunyke, kai dori aõhe-wana araykywi-di aribi iwydymy risỹnyreri tarỹsỹna wihikỹ-di ritròanykemy. ⁴ Ityhy heka awi aõkõ rare bededỹỹnana nihikỹ-ò; tai heka uritre abede iuhekõmy araykywiwi nieru tarasamy. ⁵ Aõmybo sõemy ityhymy atxikre? Kia tii aõtàmaõkõle riõ-my reakre, iwese nawii bedereheò ruòmyhỹre wesele. ⁶ Uritre hãbu aõ adee riwahinykre iribi imynyõ-my, kia dori ityhynalemy raraykynymyhỹre! Uritre rỹsỹnamy isitòedỹỹõ-my, tii rỹsỹna wihikỹ rirỹsỹmyhỹre-ò, ⁷ Tai dori tiu iny riteòarinymyhỹreu inydee awityhy riwymyhỹre, tii arayky-di rõhõtinyreri:"Timykibo heka diarỹ kua aõwiwi iribi aritake?" ⁸ Kai aribi rỹsỹna wiwi hylòilemy resihukre, kia tahe aõwi biòwynykre, tii dori tiu aõyja rimyõtyhy "txiòtòe tuke". ⁹ Uritre abedeery rybe ihuduõ-my adohodỹỹna iny itxỹte mahãdu ki; tiu dori tii adee aõwityhy iwahidỹỹõna tamy tarybetemy. ¹⁰ Uritre inywi raykyõ iwasidỹỹõ-my, urile ta asuurisina behejike ¹¹ Deuxu dori inywi mahãdu-di retehemyhỹre kia tule riòhãrunymyhỹre, ta tii ròtena nihikỹ adee riwahinykre iutxiemy inihikỹ-my. ¹² Boholabenyke ywimy dohodỹỹnaò rybe kia rimykreò, urihinaõ biwinyke bierykemy aõbo awiremy. ¹³ Uritre iwahidỹỹõ-my ariòreò rierykelau; ròtena heka awimy rawahikre tiu uladu ribinaõtyhy. ¹⁴ Ròtena aõdese ariòre rihedỹỹnykre bede wesi bina-ribi. ¹⁵ Wariòre teysamy ratxikre kai hãbu wityhymy boosekreki. ¹⁶ Wawo teysamy ratxikre aryky-ò abedeery-ò roholakre awimy. ¹⁷ Uritre òrarudu mahãdu rybewiwi-wana rybeõ-my; Deuxule tahe bityhynyke ibutumy iaõnaõna wiwi. ¹⁸ Tii dori bede tỹmyra adee riwahinykre sõemy aõwiwi. Kai tiu bederyrymy atxiõtyhy kiemy Deuxule bityhynykre! ¹⁹ Wariòre, wadohodỹỹnaò boholake kia ta ywimy atxikre; ikiemy Deuxu ry-di mariamy atxikre. ²⁰ Uritre iny ykytxi ròteõ-my kia iny byrelemy mona hyrelemy raraykynymyhỹre. ²¹ Urile tii boho tanieru-di risinymyhỹrenyre, isenaki tule kia ta iaõko~lemy; sõemy riõmyhỹrenyre, kia sulemy tỹhilemy resemyhỹrenyre, tiu raõmysỹ dỹ ỹnyrenyõhyymyhỹre. ²² Boholabenyke bureny dohodỹỹnaò, adireny senadu bedeery rybe bimywibenyke. ²³ Tai dori ibutumy aõ rutaõ hãbu bede rierymy ròòsemyhỹre; uritre abedeery ihuduõ-my. ²⁴ Tai tahe buu adi-wana reysarenykre tahe tii boho awimy aki rahãrenylre. ²⁵ Tai tii boho ibedesamy uladuõ riwinyrenykre awesemy òbitimy raumynykremy awimy. ²⁶ Wariòre, wadohodỹỹna rimymyhỹre tawo-wana ibutumy! ²⁷ Irehemy wedena mahãdu-ribi ratximyhỹre! Tii boho heka rutya nihikỹ-di rỹimyhỹre. ²⁸ Tii boho heka itxỹte wesemy rỹimyhỹre aõnaõna wiwi rahumyhỹrenyre; tii boho hãbu itxỹte-my deuxu-ò ridymyhỹrenyre ihãwyy-wanale. ²⁹ Mobo iwo sõemy aõhỹkỹmydỹỹnana-di aõdese-di rỹire? Mobo aõbinakỹ-txi irehekỹle isidi ralòmyhỹre? Mobo isihetyretyrele rawotõmoreri? Mobo isihetyreytrele irue ratarinyreri? ³⁰ Kia hãbu isihetyrele mona-di ijohona raki ratximyhỹre riõmy, mona witxira-di riurinymyhỹre. ³¹ Uritre bòdỹỹna-ò isiwahidỹ ỹ õ-my aõ yri ruseraò, aõ tỹny-ò aõ breke-ò wityhy-ò. ³² Txibo mona momo-ribi besihukreu kia aõdesemy sõemy atxikre inihikỹmy, hemylala jurutana wesemy tese nihikỹmy. ³³ Kai aõnaõna witxira-di betehekre, aõnaõna binalemy. ³⁴ Kai arati raitxỹtekre iwese bera heòty juralàdu rỹimyhỹre wese bera nihikỹ rarie-di, kia bedeyky-ki yhydebureky-ki beòsakre tai kai mariowykre inyõ arawiòhenanyõtyhy. ³⁵ Irahudi tahe kai isitxi õhõti reakre òhòte aki rỹira rahudihikỹle wahe, kia ta myy marybekre:"Inyõ aõbo wamy raòhòtera, diarỹ òhòtedese reeryõhykyra" (...) Ihãra (ihãre?) tahe mohõtinykre: "Tiubo diarỹ arỹikre? Isyby urihimyò-my monamy ariõkemyreri."