¹ Kiale heka awire ityhy mahãdu ratyre ratyhydỹỹmyhỹke; kiale heka awire aõdinodu ratyre orowomati ratyremy heka ratyhydỹỹmyhỹke. ² Iny ityhy iny iaõkõ-my rỹira kia ibutumy wiweselerenyre Deuxu dee, kiemy dori tii hãbu mahãdu riwinyre. ³ Hãbu wi mahãdu aõòhãru iko-ki rỹi-wana iribi resilòhòrarienymyhỹre, kiemy resiemyhỹre; iny bedeeryõ mahãdu iny ruety mahãdu urile ribrebunymyhỹre aõhỹkỹmy risỹnymyhỹre. ⁴ Ka iny ityhy-txi reakremy, hãbu mahãdu tyhydỹỹna. Kia heka bedewi bedesa rare, kai heka ywimy òbitimy Deuxu dee atxikre. ⁵ Hãbu Deuxu-di risinymyhỹre kia rydi rariamyhỹre sõemy aõtidese tuu rỹira hãluu-my tule; mobo isidee òbitimy isidi ratximyhỹre kia isi-ribi ryy teòrehemy riijàranymyhỹre. ⁶ Ariòre biwiòhenanyke aõdinodu nihikỹ-my runyke-my awimy uladu-my raresamy. Tai tii tiu rywi-di tisiõna, kia raumunykreu tule. ⁷ Iwese iny iaõkõ mahãdu iny ityhymy rỹira iratyremy rỹira, mobo nieru huòtemy reamyhỹre kia deòdu wesemy ròòsemyhỹre iny-ribi rihuòtera-ribi. ⁸ Mobo yhy wesemy aõ ribrònymyhỹre, kia yhy debure wesele rihemyhỹre; ka mobo aõbina ribrònymyhỹre, kia ta aõbina bianale rimymyhỹre, kia ibutumy taaõna wityhy isi-ribi riõnodỹ ỹnymyhỹre. ⁹ Hãbu inytyhy kia awityhymy ratxikre, kiemy taaõwiwi iny aõkõ mahãdu-wana riwirareamyhỹre. ¹⁰ Txibo aõbina sõeki rỹikre, kia urile biteònyke iny isihetyretyrele roisiradỹ ỹ myhỹre; kia aõbina bede òtaòta wylemy resihukremy. ¹¹ Hãbu òbitimy tawo-di rỹira ywimy kia iòlò biòwamy relekre. ¹² Kai iny teijemyhỹte awimy temymyhỹte mobo arybe rityhynymyhỹre, ka aõmysỹdỹỹna witainihe biwinyke itxỹte mahãdu resiywinykremy. ¹³ Iny deywese mahãdu tahe urile aõmy resiònanymyhỹre aõmysỹdỹ ỹmy rakõkrelemy. "Diarỹ waheto-ribi aròhònyõkre uriõ-ribi hãlòe-wana witxi areaheny hãwãyky-ki rariamy ratxike-ki kia tii riwarubunyke!", mỹ ỹ tii rarybere. ¹⁴ Hãwyy aderana kia behãluu wesemy rỹira sỹy-my; kia Deuxu hãbu ritxuhore kia tahe ibireòle rehemynykre, kia tahe irotxile resekre. ¹⁵ Kia ibutumy uladu itxỹte iny-di lisiluu mahãdu kia ibutumy resihukre rarytxuna nihikỹmy, woki ratxirenykre. ¹⁶ Mob iny iaõkõ mahãdu-di urile riuberanymyhỹre iribireny raityhynyke-my, kia tii òbitile ywiywi-my iaõna resihumy rakre; kia iyrubule mobo ityhy mahãdu riwiòhenanymyhỹre awimy raòwònymy rakrem. ¹⁷ Ywimy boholabenyke bedeery rybe-ò, boholawibenyke wadohodỹỹna wihikỹ-ò, ¹⁸ kiemy dori awire ibutumy raerykre iyri `bitimy isidee biwahinykre. ¹⁹ Kawesemy diarỹ araisinanykemy Deuxu sohojile bityhynykkre! ^20-21 Itxi aõbo õhõti reara wadohodỹỹna adee rewahire-di ehetxina bedeuhỹkỹle, itxi aõbo õhõti reara diarỹ òbitimy araisinanyre, ka iny witxira biwiòhenanykremy. ²² Uritre iny iaõkõ-my rỹira-di alisiõ-my, tiu dori tii resiijeõtyhy! Taaõna aõna ibinamy aõkõ riywinymyhỹre iny awimy rỹira mahãdu. ²³ Deuxule heka iny iaõkõ-my iny awimy rỹira mahãdu òraruki resukre, kia tahe rubumy riòwynykre mobo iny aõkõ mahãdu-di risinymyhỹre mahãdu-di. ²⁴ Uritre hãbu aõbina luu-wana isibiòwadỹỹõ-my, ²⁵ urikõ-ribi iwese beleheny, kia ta iyrybule ròtena-ò malokre. ²⁶ Uritre hãbu mahãdu yky-txi ròte~-my kia tabiòwa dewedỹỹna riòwynykremy rarybemyhỹre. ²⁷ Aõmy dori abede wihikỹ abinadỹỹõna? Kai dori aheto biwahinykre ewedỹỹna biòwynykremy iny witxira-ò. ²⁸ Uritre auhuari-di inihikỹdỹỹ-my wisỹdỹỹõ-my. Kia dori wasina tyhy rare. ²⁹ Kai aõbo teeryte inyõ aõmysỹdỹỹna riwinymyhỹre idi taruki-my? Kai tahe iòhãrutyhylemy aõwiwi rierykre, tii tahe tamy rybe rỹikre Iòlò-ò raaõmysỹdỹỹnykremy.