¹ Hãwyy bedeery heka taõwiwi ixidee riwinymyhỹre, ka hãwyy itxỹte tahe ixi sohojile rỹira kia tahe taseriòre boho aõnaõna urile ribinanymyhỹre. ² Inyõ rexiurihi-my ratximyhỹre kia heka ywimy rỹimyhỹre, kia heka iny awimy adi ratximyhỹre aratyhynymyhỹre riteòsinymyhỹre; ka mobo aõòtaòata mahãdu rydi rariamy ratximyhỹre, kia tahe iny aratxiõnymyhỹre tuu riteòsinymyhỹre. ³ Hãbu rybe bina òbitityhy kia Deuxu tamyreny ihoõre tai heka rarytxynale tamyreny riwahinymyhỹre tuu rekoamyhỹrenyre wahe, ka hãbu òbitimy rỹimyhỹre kia tahe tanireny rirarenymyhỹrenyre. ⁴ Uhuari broreniõ-my roimyhỹre, kia heka tiu aõmysỹdỹỹ riwahinyõhyymyhỹre kia tahe tyrahykyle-my roimyhỹre. ⁵ Iny aõmy robimyhỹre kia òbitimy tuu relyymyhỹre, ka iny aõmy roilemy robimyhỹre tahe kia tuu relyymyhỹre. ⁶ Hãbu inatyhy-my itxỹte-my rexirahòremyhỹre, kia heka tiu bedeery-my ròòseõtyhy, ka hãbu òbitimy rỹira tahe aõwesele bede wihikỹ-txi reamyhỹre òbitimy. ⁷ Txibo tiu kai dohodỹỹnarahi beakreu, uritre iny Deuxudi risinymyhỹre kia mahãdu iijeseõ-my; kia mahãdu dohodỹỹna kia tiu aõ-my rũiõhyymyhỹre. ⁸ Hãbu awimy rỹira aõ rierymyhỹre òbitimy aõnaõna relemyhỹre rỹira; iny itxỹte roi tahe sõemy aõbinabina-di rỹira kia tahe tiile rexibònymy rexirubunymyhỹre tii òbitile. ⁹ Iny Deuxu ribiòtu ratximyhỹre aõwasina Deuxu-my rarybemyhỹkre, kia tahe tiu Deuxu tuureny reàlàõtyhy; ka mobo Deuxu rityhynymyhỹre kia tahe Deuxu tarybewi tamy riwahinymyhỹkre. ¹⁰ Inywo bederyry-my rỹimyhỹre ti-wana bedesa-my rỹimyhỹre, kia mobo tuu ratximyhỹrele rierymyhỹre; tiu iny-õ tuu robiõtyhy tiu iny witxira rieryõtyhy aõmybo rutỹ ỹnyreri. ¹¹ Hãbu Deuxu-my radònymyhỹre kia tii òbitile rexirubunykre ixideewi-my; ka mobo Deuxu rityhynymyhỹre tahe kia ikiemy irehemy bede riekre. ¹² Ry òbiti heka awimy itỹnymy ramyhỹre, ka mobo rybina-di ramyhỹre tahe rexihukre rubunatxile reakre. ¹³ Tiu heka iny ajue-my tawo bederyry iwòteõna; txibo tiu bedesa ròhònykreu kia tahe iwo-ki bederyry ijõdireri. ¹⁴ Mobo deuxudi risinymyhỹre kia heka bederaty ihyre-my rihemyhỹre ixi taòraruki; ka mobo Deuxidi òbitimy ratximyhỹre tahe bederaty ibree-my rihekre kia sõemy bedesa tamy riwahinymyhỹre. ¹⁵ Kia inatyhy-my iny itxỹte sõemy aõ rityhynymyhỹre aõriòre itxi rityhynymyhỹ. Ka iny bedeery tahe komy urile aõ-ò roholamyhỹre aõ ròhònyra-wana. ¹⁶ Mobo inytyhy-my rỹira kia sõemy rexiijemyhỹre aõ sirasira-txi reahenylau, ka iny itxỹte tahe aõlau rexiòhãrunymy aõkõ rỹimyhỹre komy r~hõtiny-di aõkõ aõmy reamyhỹre. ¹⁷ Mobo aõtaõkõ reburemyhỹre kia heka aõ ibina tuu riwinymyhỹre, ka iny bedee tahe tahe irehe-my bede riijemyhỹre ywimy. ¹⁸ Mobo aõ riywinyKõmyhỹre aõwi-ò kia heka itxỹele-my rexihu-my ròòsemy ramyhỹre, ka hãbu bedeery tahe ixyby bedeerymy rỹimyhỹre txuu rariamyhỹre wanale. ¹⁹ Tiu txumy inywi mahãdu awimy rỹikre, iny bina mahãdu tahe ihetorenywo-ò ròte-my risỹnymyhỹre uritre ijò rihetenykre. ²⁰ Iny aõkõ mahãdu heka taheto bireludu yhyralemy rỹimyhỹre; ka iny ityhymy rỹira tahe kia heka sõemy ibiòwa rỹira tuu reamyhỹre wahe. ²¹ Mobo iny iaõkõ-my ryĩra-di risinymyhỹre kia heka òraruna riwinymyhỹre, Deuxu heka uny-my reàlàmyhỹre mobo sõemy rỹsỹna riwahinymyhỹre-ò. ²² Mobo aõ ibina riwinymyhỹre iny witxira heka òraruna ry-di rariamyhỹre, Deuxu heka inydee tarybe wihikỹ riwahimyhỹre mobo awimy aõnaõna riwinymyhỹre iny witxira-ò. ²³ Aõtxile aõmysỹdỹ ỹ kia rỹimyhỹre sõemy ixiratyre inydee ròhònymyhỹre; ka mobo urile ijyylemy ratximyhỹre kia tahe iaõnakõ-my rexihu-my ramyhỹre. ²⁴ Bedeery mahãdu aõna kia heka iny ityhy-my rỹira mahãdu le rimymyhỹre; ka itxỹte mahãdu tahe ikiemy itxỹteitxỹte-my rỹikre, ityhy-my rỹikre hãrele. ²⁵ Iny-my inatyhy-my robimyhỹre kia heka iny rihedỹ ỹnymyhỹre, ka iny roile-my wimy robimyhỹre kia tahe urile iny bedeerykõ mahãdu rihumyhỹre. ²⁶ Mobo arybe rityhynymyhỹre aratyhynymyhỹre, kia iruru sõemy aõni-my ijõdire, kia biwiòhenanykre isiramy; iriòre mahãdu tahe arybe wihikỹ tamyreny biwahinykre kia tahe kai idireny betehekre. ²⁷ Iny aratyhynykre òbitimy kia itỹmyra-my aruru tamy biwanykre, awimy ixidi ratxikre-my òhãru-ribi rubu-ribi rexihedỹ ũnukre-my. ²⁸ Hãwã-õ relemyhỹre iny ijõdi-my rỹimyhỹre; hãwã-õ relemyhỹre kia ta urile rayja-my ramyhỹre kiemy idinodureny ibinareki. ²⁹ Iny ywimy rỹira kia heka bede riery-my ròòse-my ramyhỹre; mobo awimy ratximyhỹre-ribi rexibinanymyhỹre kia urile tii òbitile rexitòamyhỹre tiu tako-ò raõtyhy. ³⁰ Iny heludu inytyhy awimy iny irehe-my rỹimyhỹre, ka iny rybe luu tahe hãbu aõwiwi iribi rahumyhỹre. ³¹ Mobo iny iaõkõ mahãdu awimy aõkõ idireny rỹimyhỹre, kia heka Deuxu-ò ibinare; ka mobo iny iaõkõ-my rỹira riwiòhenanymyhỹre tarỹsỹnadi kia tahe Deuxu sõemy riwiòhenanymyhỹre taruru nihikỹ-di. ³² Itxỹte mahãdu heka taòraru òbitikile rexirubunymyhỹre. ka inytyhy mahãdu tahe awimy tabede wihikỹ riraòmyhỹre, rubu nihikỹ rỹikre sỹtybymy. ³³ Bedeery nihikỹ heka hãbu bedee woki rexirarenywi-my roimyhỹre, ka hãbu itxỹte mahãdu woki tahe aõnaõna binabinale tuu rỹimyhỹre. ³⁴ Iny òbitimy rỹimyhỹre mahãdu heka Deuxu hãwã nihikỹ-my riòkesedỹ ỹnymyhỹre, ka òrarudu mahãdu tahe ixỹruna nihikỹle riwahinymyhỹre tahãwãreny-ò. ³⁵ Iny aõdinodu-my rỹira kia heka aõmysỹdỹ ỹdu-di retehemyhỹre awimy, ka aõmysỹdỹ ỹ bina tahe ikiemy tadinodu heto-ribi wasilemy ramyhỹre.