¹ Wijina mahãdu bedeery heka tyby dohodỹỹna rybe mynamynamy ratximyhỹre; wijina mahãdu itxỹte tahe urile raitxỹtemyhỹre, urihimyòle aõòbiti riwinymyhỹre tyby-ò. ² Inywi heka sõemy aõwiwi-txi reamyhỹre, kiemy dori òbitimy aõmy rarybemyhỹre, ka iny bina tahe tarybe-my rarybemyhỹre, icoraçaõ sõemy aõnaõna òtaòta-di retyymy ramyhỹre. ³ Mobo tarybe riòhãrunymyhỹre kia heka rimymyhỹre, ka mobo ryberybe-my ratximyhỹre aomy rõhõtinymyhỹre, kia heka ibina-my rexihu-my ramyhỹre ixidee òbitile. ⁴ Iny deywese mahãdu heka sõemy rarasinymyhỹre kia tahe tiu aõtxi reaõhyymyhỹre; ijõ weribi-ò tahe iny mahãdu inatyhy-my aõmy reamyhỹre kia aõmysỹdỹỹdu inatyhymy tarasi riòbitinymyhỹre. ⁵ Hãbu wi mahãdu heka inyroi-ki ibinamy rahãmyhỹre; hãbu bina tahe ixybyixybyle raoimyhỹre, kia tahe ixỹmy rexirubunymyhỹre. ⁶ Inytyhy heka hãbu rimymyhỹre aõnaõnawi tahe tamy riemyhỹre, òrarudu tahe tii òbitile rexiatymyhỹre taòraru-ki. ⁷ Sõemy heka iny raityhynyke-my ixi-di risỹnymyhỹre aõ riwinyõmyhỹre-ribi, ijõ weribi-ò iny sõemy ityhy mahãdu raõkõke-my risỹnymyhỹre. ⁸ Ityhy mahãdu heka sõemy wasidu mahãdu lau reamyhỹre inieru iribi riwyhenylau. iny aõkõ mahãdu tahe tiu brebu-my reaõhyymyhỹre. ⁹ Inywi mahãdu bede heka sõemy loosonadi rỹimyhỹre raràsonadi tule, iny bina mahãdu ry tahe turuhỹkỹle-my ramyhỹre bede luru wesele roimyhỹre. ¹⁰ Aõbina rybeluu kia heka urile iny ribinanymyhỹre; ka iny òbitimy rỹira tahe rybe-ò roholamyhỹre, kia tahe bede rierymy ròòsemyhỹre. ¹¹ Nieru irutaõ-my inydee ramyhỹre kia heka aõtamaõkõ iny-ribi ramyhỹre tahe iny-ki sõemy aõ rỹimyhỹre-ribi rexihumyhỹre. ¹² Rasi heka tiu inydee inatyhy-my raaõkõ rare, urile heka bederyry-di iny coraçaõ ritỹsinymy rexihumy ramyhỹre, tiu iny aõmysỹdỹỹnareny awi reamyhỹreu inydeereny inihikỹ-my bedesa riwahinymyhỹre. ¹³ Deuxu rybe-di alisiõmyke tai heka sõemy aõhykỹ-my rarytxyna nihikỹ-ki matxikre, tii tuu rarybere wahe; Deuxu rybe heka bityhynyke kia tahe aõnaõna wiwi-txi sõemy beakre tii tuu rarybemyhỹre wahe. ¹⁴ Iny bedeery dohodỹỹna kia heka iny rihedỹ ỹnymyhỹre mobo irybe-ò roholamyhỹre, kia tule aõòhaãru-ribi rihedỹ ỹnymyhỹre tii aõ-wana witxi reamyhỹre-ribi. ¹⁵ Hãbu òbtimy rỹira kia heka sõemy tabiòw-txi reamyhỹre, ka iny itxỹte mahãdu tahe iryreny isirara kia dori sõemy aõnaõna òhãru tuu rỹimyhỹre. ¹⁶ Hãbu òbitimy rỹira kia heka iny riwiòhenanymyhỹre tabedeery-di, ka mobo Deuxu urile ritxiõnymyhỹre tai heka iny itxỹte riteòsinymyhỹre kia iaõnaõna wiwi ihoõre. ¹⁷ Rybe wahidỹỹdu heka tiu inydee rybewi riwahiõhyymyhỹre kia urile iny-di risinymyhỹre iny awi aõkõ riemyhỹre, ka rybe wahidỹỹdutyhy tahe awimy rỹimyhỹre iny witxira riwiòhenanymyhỹre awimy ratxikre-my. ¹⁸ Iny dohodỹỹna-ribi ribiòtu-my rỹimyhỹre kia heka dohodỹỹna ywiywiwi-my raisỹru-my rexihumy ramyhỹre; ka mobo inatyhy-my dohodỹỹna rityhynymyhỹre, kia heka rybe wihikỹ rimymyhỹre. ¹⁹ Aõ inatyhy-my relemyhỹre kia heka bede deysa nihikỹ iny wo-ò riwymyhỹre. Iurenana heka tiu itxỹte mahãdu taõbinaibnareny ixiworeny-ribi risuhòõtyhy. ²⁰ Iny bedeery mahãdu heka bieke tai kai bede biery-my boosekre iwesele; txibo kai iny bina mahãdu-wana bexibutumy matxikreki tahe ibina-my bexihumy makre iweserenyle. ²¹ Beryry heka òrarudu mahãdu wanale rỹimyhỹre, inywi mahãdu tahe ikiemy aõwi-txi reamyhỹre bedesa-my ratximyhỹre. ²² Tiu hãbu inatyhy-my rurumyhỹreu kia taõnawiwi tariòreriòre boho-ò taõnawiwi ririmyhỹre; ka òrarudu nihikỹ ruru-wana tahe iaõna wiwi iny inytyhy mahãdu-ò rararemyhỹre. ²³ Iny iaõkõ-my rỹira mahãdu aõwasina bederaty sõemy ribrònykre, ka tahe rityhynyrenyõkre-wana tiu tii boho bede wihikỹ-txi tahãsarenyõna. ²⁴ Uladu tyby tariòre tiu aõhykỹ-my risỹnyõtyhy kia heka idi awimy aõkõ ratximyhỹre riteòsinymyhỹre. Ka uladu tyby tariòredi awimy ratximyhỹre kia tahe uladu-my ratximyhỹreule aõnaõnalau ritòenymyhỹre. ²⁵ Inywi heka ikiemy rỹsỹna tamy ijõdire rama-my reahenylau; iny bina tahe ramasa-my rexihumyhỹre aõmybo inatyhy-my reamyhỹre.