¹ Txibo kai awò-ribi Deuxu bityhynykre-wana adee umywihikỹ-txi beakre, kia tahe dohodỹỹna bityhynykre rybewihikỹ tule. Mobo rybe òbiti ritxiỹnymyhỹre tahe kia iny itxỹte tuu rỹira. ² Kai heka hãbu-my teàlàmyhỹte kiemy dori aõ awi rierymyhỹre; ka hãbu tabinanymyhỹte-wana tahe hãbu ibinamy ratximyhỹre. ³ Bede binabina heka tiu bedewi-my bedesamy aõ riwahinyõhyymyhỹre, ka bede wihikỹ tahe aõwiwi sõemy awimy hãu-ò riwahinymyhỹre idi awimy bede riekre-my. ⁴ Hãwyytyhy iriraõmy rỹira kia heka òbitimy rỹimyhỹre aõtxile hãbu-ò, ka hãwyy itxỹte tahe aõtxile webinadu wesele rỹira kia tahe tahãbu-ribi aõwiwi ritamyhỹre. ⁵ Hãbu òbitimy rỹira kia sõemy aõwiwi-di taratiwomy rỹira, ka iny itxỹte mahãdu tahe aõnaõna binabinalemy rarakynymy rỹira kia urile raroimyhỹre. ⁶ Iny itxỹte mahãdu heka roilemy aõ ritxienymyhỹrenyre iny witxira ribinanykrelemy, iny wi mahãdu tahe iny riwiòhenamyhỹrenyre kia òbitimy rarybemyhỹre. ⁷ Deuxu heka iny itxỹte mahãdu ibutumy rahurenykre, iny wi mahãdu-di tahe ixitykyki idireny ratxikre. ⁸ Ibutumy awimy hãbu -ki iny boho rahãmyỹrenyre kiemy dori aõwiwilemy ratximyhỹre, ka hãbu itxỹte itxỹte-my ratximyhỹre kia dori sõemy aõnaõna binabina-di ratximyhỹre aõbinalemy raraykynymyhỹre. ⁹ Kia heka aõni awire iny òbitimy rỹira kia awimy aõmysỹdỹ ỹ utxie bimykre tai dori ixidee òbiti aõ bimykre ihyy tahe ixidee bede biteytenykre. ¹⁰ Hãbu taaõnadi awimy rỹira kia aõwiwi-ò tairòdu riòhãrunyõhyymyhỹre, ka hãbu bina mahãdu tahe tacoraçaõ aõnaõna binale rihynymyhỹre. ¹¹ Mobo sõetyhymy raaõmysỹdỹ ỹnymyhỹre, kia mahàdu heka alòbròmy aõwimy rexielehynymyhỹre, kia tahe sõemy rỹsỹna-di ratximyhỹre tariòre boho-ò; ka mobo taaõmysỹdỹỹna ribiòtule rõrõmyhỹre tahe tiu aõ rimyõhyymyhỹre kiemy teàwesereki. ¹² Iny itxỹte heka inydee roilemy aõmy iny ribònymyhỹre aõbinabinalemy inydee rarybemyhỹre, iny wi tahe sõemy iny riemyhỹre iny wiòhedỹỹmy tarybewihikỹ-di. ¹³ Hãbu bina heka sõemy raroimyhỹre tarybe òbitikile rexilòrelòrenymyhỹre, iny wi tahe sõemy rexihedỹ ỹnymyhỹre aõnaõna sira sira-ribi kiemy tii òbitile rarybemyhỹre. ¹⁴ Mobo ixybyixyby òbitimy rarybemyhỹre kia heka sõemy aõwiwi rimymyhỹre òbitimy rarybemyhỹreki; mobo tebò-di iny witxira riwiòhenanymyhỹre kia ikiemy iòwymy awimy rarekre. ¹⁵ Iny itxỹte heka ixybyixyby rarakynymyhỹre kia tahe sohojityhy aõwi-txi reamyhỹre, bedeery tahe dohodỹỹna-ò rybeõ-my roholamyhỹre. ¹⁶ Iny itxỹte heka aõtxile aõ ritòamyhỹre teburele-my, ka hãbu bedeery tahe tiu tarati riitxỹtedỹ ỹnyõhyymyhỹre aõ ibinamyhỹre hãrele. ¹⁷ Mobo òbitimy rarybemyhỹre kia heka aõwityhy riwiòhenanymyhỹre sõemy, ka rybe-ò ijohonadu mahãdu tahe roilemy aõmy relyymyhỹre, kia urile aõnaõna binana riòlòdỹ ỹnymyhỹre bòdỹỹna tule. ¹⁸ Iny òbiti ijõ kia tòròtò txurydese-my tõnori wesemy relekre riwiòhenanymyhỹre ywimy. ¹⁹ Aõ òbiti heka bede irehemy bede riijemyhỹre, ka roidu mahãdu tahe iõhõtyhylemy raerymyhỹre. ²⁰ Mobo tawoki aõòtaòtamy raraykynymy rỹimyhỹre kia sõemy bòdỹỹnadi aõna~na binadi rỹimyhỹre, ka mobo bede riywinykre-my tarybe riuhekre kia tahe sõemy teusamy tawoki idi ratximyhỹre. ²¹ Iny tiu heka aõhỹkỹ-my rutỹ ũnyõhyymyhỹre, kia tahe aõwi ibutemy riwyõhyymyhỹre, ka iny bina tahe sõemy aõnaõnamy sõemy kiemy itxỹte-my ratximyhỹreki. ²² Kai heka sõemy iny roi mahãdu-my tadònymyhỹte, iny òbiti mahãdu-ò tahe sõemy rybewi tewahinymyhỹte òbitimy. ²³ Hãbu òbiti heka tiu xiwede-my ratxiõhyymyhỹre aõ rierymyhỹredi, hãbu itxỹte tahe sõemy taitxỹte riteòsinymyhỹre ibutumy. ²⁴ Mobo sõetyhymy ixidi aõmysỹdỹỹ-my ratximyhỹre kia heka aõdinodu-my runykre; ka mobo txiòribile teywesena-ribi aõmysỹdỹỹ-my risỹnymyhỹre kia heka tiu aõmysỹdỹỹ-txi iijaraõna. ²⁵ Hãbu uwiõ-my rỹira heka urile tabiòwa ribinanymyhỹre, ka hãbu wi tahe tarybewi tabiòwa-ò riwahinymyhỹre riwiòhenanykre-my. Tahe tabiòwa-ò ywimy rỹira awimy. ²⁶ Inywi heka tabiòwa riwiòhenanymyhỹre bede awimy riekre-my, iny bina tahe urile iny ribinanymyhỹre, iny-di risinymyhỹre. ²⁷ Iny deywese mahãdu heka raaõmysỹdỹỹnyõhyymyhỹre iròdule ririunymyhỹre, ka hãbu aõmysỹdỹỹdu tahe sõemy riwahinymyhỹre aõtxile aõ-wana witxi reamyhỹre. ²⁸ Mbo rywihikỹ-di rariamy ramyhỹre kia heka bede wihikỹ rydi reakre, tiu heka rubulau brebuna ijaraõna.