¹ Kia rỹirenykrekoki rudi-u tahe juhule riywinyrenyre rahurenykremy tule riywinyrenyõkre ijõ mahãdu. Kia tahe tiiboho rutamanyrenyre aõbo riwinyrenykre hyy iraykyrenyre tiiboho heka iruruterenyre. ² Tiubo aõbo riwyrenykremy rõtõtinymyhỹrenyre suu aõbo da heto aõbo kia inatyhykỹlemy riwymyhỹrerenyre. Iny riywinyõhyymyhỹrenyre ijõ iny witxira tule rityhynyõhymyhỹrenyre aõtxile iny suu wedu aõbo aõtxile. ³ Tai heka Deuxu rarybere: Ariwinykre jiarỹ aditeonykre aõbinahãkỹ atyrereny resekremy, tiu iribi bihenybenyõtyhy. Tii aõbohe bededỹỹna aõhõkỹmydỹỹna kaiboho tiu maxiwedenybenymy biròranyõtyhybeny. ⁴ Tiubo itxuu rehemynykreu ijõ ritxienykre rybe erysyna tyhyhykỹ adeereny rawinykremy bedewomy. Inyboho heka ibinatyhymy roire! Deuxu heka ritara inysureny inyribireny Tii ritare aõ inyhõrõreny riwahinyre aõ ritarenyre mahãdu-ò. ⁵ Tai tahe tiubo inydeereny suu riwahinykreu rikitxuatxuarenykre Deuxu ritynymyhỹre mahãdu-ò, tiu heka kaiboho ijõ bitabenyõtyhy. ⁶ Tii boho mahãdu raryberenyre: Txioiny biyryke Deuxu rybedu mahãdu! Tuu ryberenyõmy! Tii dori inatyhymy rare Kia Deuxu riwinyke aõhõkỹmydỹỹnana inytyrerehy reseke. ⁷ Kia aõbo Israeli mahãdu-ò raykarananyre? Tii aõbo tamyreny radònykre? Kawese heka tii iky reakre? Deuxu rarybere: Kaa heka warybe wihikỹ rewahinywãhãre iny mahãdu wihikỹ-ò. ⁸ Kaiboho wahe,kia òludu wesemy, tamyreny tekoatenyte. Tahe hãbu mahãdu aõbina ribi riòaserenyre, biu-ò henadihyy rõhõtinyrenyre, tahe kaiboho tawasinytenyte atyyreny-di. ⁹ Kaiboho biteònybenykre ixiribireny aluunadutyhyreny hãwyyboho asỹrenyludu tule ariòrereny dela tiu aõwihikỹtyhy riaõtyhy kia tuu rarybere. ¹⁰ Karibi rahònyrenyre! Tahe ròirenyre! Kia suu tamy boibenykre-ò aõki tai bexielehynybenykre aõ ihoõki awihikỹmy. Kaki tahe sõwemy iny ijõdikre iny òbiti-õ tule iixỹrutere. Kia sõwemy aõnaõna ludu kynyikre sõwemy. ¹¹ Deuxu rybemy rybedutyhy tuu riywinyre inydeereny tahe kia inydeereny Deuxu rybemy òbitimy aõkõ rarybemyhỹre ruilemy, mona besòhòkỹmy ibexibeximy rikiõmyhỹrenykemy rarybemyhỹrenyre inydeereny. ¹² Deuxu rarybere Israeli mahãdu-ò. Jiarỹ ibutumy arabutunyrenykre aõbo akireny rasiranyreri tule anadydenykre kia suu adeereny tuu rarybere-ò, kia Deuxumy rybedu mahãdu budòeni rihimy ramyhỹre ibyrena-ò da iòtilyreny-ò. Kia tahe ixyby hãwãkỹ rexiorykre sõwemy iny-di tỹxihikỹlemy roikre. ¹³ Deuxu kidiraynykre inydeereny ryy tiiboho riòlònyrenykre aõ tamyreny ròhònyõhyy bedebina tiiboho heka hãwãhãkỹ ijòtòbònadile riòlònykre. Wedu Deuxu heka ikoreny rakre ehekile tiiboho roikre.