¹ Boholabenykeini, Warybe-di Ijohodu mahãdu! Boholabenyke israelita mahãdu! Boholabenyke iòlò sỹ ijoi mahãdureny! Kai boho aõhỹỹmy butỹỹnybenykre, kiemy dori Mispa-ki kai boho rubudỹỹdu ròsemyhỹre wesemy atxitenyte, Tabor hãwalò-ki ta lòysana wesenamy atxitenyte ² Akasia iworykita hãluu s ỹyhỹỹmy atxitenyte. Iurenana heka diarỹ arararytxynyrenykre. ³ Diarỹ reerywire aõbo israelita mahãdu riwinyrenyre: tii boho rerinanyrenyre ỹnyxiwe òtaòtamy kia iurenana heka ybinamy atximyhỹtenyte. ⁴ Aõnaõna aõòtaòta òraruki Israel iny mahãdu riwahinyõmyhỹrenyre tii boho taDeuxureny-ò ròòserenykemy. ⁵ Iixityhytyhydỹỹnareny heka riteòsinymyhỹrenyre itỹnymy taòrarurenyki tuu ratximyhỹrenyremy. Taòrarureny òraruki tii boho ratikròmy rariòwymyhỹrenyre, kia Juda iny mahãdu ihekile rariòwymyhỹrenyre. ⁶ Tabudoenireny tabroreni riòrereny ridymymyhỹrenyre xiwenamy idi rekoarenykremy Deuxu Tyhyhykỹ dee, kia tahe aõke aõkõtyhyyre. Tii boho itxi rekoarenyke aõkõre, kiemy dori tii iribireny rexilòhòrarienyre. ⁷ Tii boho Deuxu Tyhyhykỹ rityhynyrenyõre, kia iriòrerenytyhy aõkõ roire. Kiaremyta iòhòtyhylemy tii boho tasureny-wana rexihurenykre. ⁸ Ajuròna biwòdỹỹnyke Gibea-ki kia Hama-ki! Deòarinamy birajuabenyke Bete-Awe-ki! Bexiijemy matxibenykre Bejami iny mahãdureny! ⁹ Diarỹ tuu rarybere Israel iny mahãdureny-ò aõhebo inatyhymy bede rutỹỹnykremy: kia rareri rarytxyna txu, kia Israel tahe rexihukre. ¹⁰ Deuxu Tyhyhykỹ rarybere: — Juda wedu mahãdu Israel su ritybòtyònyrenyre kiata isureny-my rahãỹnanyrenyre. Iurenana wakyaramy watxireri kia arirarytxynykre tarurumy. ¹¹ Israel iny mahãdu anarỹỹnamy rekoarenyreri, kia aõ òbitimy idi rỹirenyre ratyhydỹỹõhyyreri kiemy dori tii boho rõhõtiõrenyre ỹnyxiwe òtaòta rityhynyrenyre. ¹² Kiaremyta iraça wesemy diarỹ Israel arihukre kia binana teytenaõmy rỹimyhỹre weemy arihukre Juda. ¹³ – Israel rexieryre iwebinadumy ratximyhỹmy kia Juda rexierylere rawotõmõmy ratximyhỹmy, Israel rare ixiwiòhedỹỹmy Assiria iòlò dee; kaa tii tahe timy teytedỹỹõna kia iwotõmona riteytenyke aõkõre. ¹⁴ Hãlòe wesele diarỹ Israel iny mahãdu arihukre kia Juda iny mahãdu tule. Diarỹ ariyreyrenykre irahudita arakre ixihemy ariwymy. Kia inyõ rihedỹỹnyrenyke aõkõre. ¹⁵ – Tai tahe wasỹ-ò aroosekre kia tai ararekre ihyy tahe tii boho taòrareny rieryrenykre, kia taõhỹỹhỹỹmy dỹỹnanareny-di tahe waitxesemy ydòidenykre.