¹ Deuxu Tyhyhykỹ irybe ijõdire iny mahãdu ka-my su-my w rahãwanymyhỹrenyre òludumy. Boholabenyke israelita iny mahãdu, aõmybo Deuxu rarybereri-ò: — Bede òbitimy roike aõkõre, aõwiwi ijõdike aõkõre, kia inyõ ka suu-my rỹimyhỹrenyre Deuxu-my bede rieryrenyke aõkõre. ² Òbitimy aõkõ aõmy rarybemyhỹrenyre, raroimyhỹrenyre, ròrubudỹỹmyhỹrenyre, rawasinymyhỹrenyre kia aõòtamy rekoamyhỹrenyre. Rubudỹỹ kia rubudỹỹdu nasõemyhỹde. ³ Iurenana heka suu rarubukre, kia ibutumy aõbo tuu rỹimyhỹre rurukre. Iròdu iròdu rurukre, nawii nawii rurukre kia utura dorile rururenykre. ⁴ Deuxu Tyhyhykỹ rarybere: — Uritre roimy iixỹrudỹỹrenyõmy wasỹ wajoi mahãdu. Warybe heka aòludurenymy aõnaõna binaninamy, warybe-di ijohodureny boho. ⁵ Txumy kia rumy kai boho tanariamyhỹtenyte aryreny ihoõmy, kia Profeta mahãdu ayryburenytyhyle diwinymyhỹdenyde. Kia Israel arihukre asereny yda adireny. ⁶ Wasỹ waijoi wadi ratxike aõkõhyyre iurenana heka rexihumy rareri. Kia kai boho tule Warybe-di Ijohodu mahãdu biwaerybenyke aõkõre kia warybe wahidỹỹna-ribi õhõti rusarenyre; kiaremyta diarỹ adeereny areòbyõkre ixyby Warybe-di Ijohodumy, kia ariòre boho dee areòbyõkre warybe-di ijohodu-my. ⁷ Warybe-di Ijohodu rasõemyhỹre wana-wana, kia tule aõnaõna òtaòta nasõemyhỹde; iurenana iaõwiwireny aõnaõna binabinahãkỹmy arirahorekre. ⁸ Tii boho idi dòtamyhỹdenyde iru-my ratxirenykremy iny mahãdu òrarunareny-di, iurenana heka iny mahãdu òraruna riwinyrenykemy risỹnymyhỹrenyre. ⁹ Iurenana, Warybe-di Ijohodu mahãdu aõhỹỹhỹỹmy rutỹỹnyrenylekre kia waijoi wasỹ mahãdu dee ariwinykre yrybutyhyle. Arirarytxynyrenykre, kia tii boho tahe riòwynyrenykre aõnaõnabinabina riwinyrenyre òwymy. ¹⁰ Warybe-di Ijohodu mahãdu riwaatyrenyre kia iwitxira ỹnyxiwele-my derinanymyhỹdenyde. Iurenana riròrenykre iny mahãdu xiwena wadee riwahinymyhỹrenyre, kiata awityhytyhymy ratxirenyõhyyrenykre; ỹnyxiwe uladu tamyreny rawahinymyhỹremy rerinanyrenykre, kia tahe iriòrereny ijõõrenykre. ¹¹ Deuxu rarybere: — Waijoireny wasỹreny iraykyreny riõrenyreri kia sõemy mona besò-my diõ-my diriranymyhỹdenyde. ¹² Òwòrukre-ò rexitòenymyhỹrenyre kia tamyreny riòbitinyrenykremy aõbo rieryrenykremy ijõbede wyrau, kiata òwòrukrehe-ò rỹỹraximyhỹrenyre. Tii boho riwaatymy riwarirenyre. Iwese hãwyy wedenamy rexirahòremyhỹre wesemy, tii boho riwaatyrenyre kiata rexiwahinyrenyre ỹnyxiwe òtaòta-ò. ¹³ Roxiwemyhỹrenyre ỹnyxiwe òtaòta xiwena-ò hãwalò ratyy rariehekỹki ibedekita ritoonyrenyre heòty bederade witxira witxira rawoki sõemy bederade, tai sõemy bedeubròrò wihikỹ rỹimyhỹ. — Kia wesemy tahe hãwyy iriòre boho tuu robirenyre wedena rabrò-my, kia irioreriore boho tahe hãbu witxiramy rekoamyhỹrenyre. ¹⁴ Kiaremyta ihãremy iòraruki diarỹ arirarytxynyke aõkõre; kiaremy kai boho hãbu boho, wedena boho-wana witxi tekoatenyte ỹnyxiwe òtaòta heto dohod: yỹna-ki, kia tii boho-wana tòimyhỹtenyte xiwena biwahinybenykremy ỹnyxiwe òtaòta-ò. Kia-my tahe iny mahãdu raykyõ wymy ririranymy ròimyhỹrenyre rexihurenykremy! ¹⁵ –Israel iny mahãdu ròtyhydỹỹmy aõkõ ratxirenyreri wadi, kia uritre Juda iny derinarenyõmykre, kia uritre tai iwidỹỹrenyõmy aõmybo rekoarenyreri riwinyrenykremy Deuxu Tyhyhykỹni-my ikiemy ratximyhỹremy. ¹⁶ Israel iny mahãdu heka tõhõtiõrenyre broreni hãwyy debure wesemy. Timyhe waijoi wasỹreny-di warukiõna iwese budoeni wedu tarukimy ratximyhỹre wesemy asiyky nihikỹ-ki. ¹⁷ Wasỹreny waijoireny heka rexiwahinyrenyre ỹnyxiwe òtaòta-my rerinanyrenykremy, timyhe aõ tai wawidỹỹõna kua weseki. ¹⁸ Tii boho raòdewyrimyhỹrenyre kiata aõòtaòta-ò rexiwahinymyhỹrenyre, kawesemy tahe ratximyhỹrenyre aõbinabinamy. ¹⁹ Yhy heka ridyrenykre irehe-ò, kiata raixỹrurenykre taaõòtaòreny tyhydỹỹnareny-di.